ആഗോള യുദ്ധങ്ങള്‍ കാരണം തടസ്സപ്പെട്ട ഷിപ്പിംഗ് മേഖല, കുതിച്ചുയരുന്ന പലിശ നിരക്കുകള്‍... അമേരിക്കന്‍ സമ്പദ്വ്യവസ്ഥ ഇന്ന് മുന്‍പെങ്ങുമില്ലാത്തവിധം വലിയൊരു സാമ്പത്തിക മന്ദഗതിയിലൂടെയും അനിശ്ചിതത്വത്തിലൂടെയും കടന്നുപോകുകയാണ്. വന്‍കിട കോര്‍പ്പറേറ്റുകള്‍ മുതല്‍ സാധാരണക്കാരായ പ്രവാസികള്‍ വരെ ഈ സാമ്പത്തിക പ്രതിസന്ധിയുടെ പ്രത്യാഘാതങ്ങള്‍ അനുഭവിച്ചറിയുന്നു.

ഈ വിഷമഘട്ടത്തില്‍, അമേരിക്കയിലെ പ്രവാസി മലയാളി സമൂഹം ഒന്നിച്ചുനില്‍ക്കേണ്ടതിന്റെയും നമ്മുടെ പ്രിയപ്പെട്ട ചെറുകിട ബിസിനസുകളെ ചേര്‍ത്തുപിടിക്കേണ്ടതിന്റെയും ആവശ്യകത മുന്‍പെന്നത്തേക്കാളും വര്‍ധിച്ചിരിക്കുകയാണ്.

ചരക്കുനീക്കത്തിനുള്ള ഷിപ്പിംഗ്, ഹാന്‍ഡ്ലിംഗ് നിരക്കുകള്‍ കുത്തനെ ഉയര്‍ന്നതോടെ ഇന്ത്യയില്‍ നിന്നും മറ്റ് ഏഷ്യന്‍ രാജ്യങ്ങളില്‍ നിന്നും അമേരിക്കയിലെത്തിക്കുന്ന ഉല്‍പ്പന്നങ്ങള്‍ക്ക് വന്‍തോതില്‍ വിലവര്‍ധനവാണ് ഉണ്ടായിരിക്കുന്നത്. ഗ്യാസ്, പെട്രോള്‍, ഡീസല്‍ എന്നിവയുടെ വിലവര്‍ധനവ് പ്രാദേശിക വിതരണ ശൃംഖലയെയും സാരമായി ബാധിച്ചു.

ഇതിനുപുറമെ, ബാങ്ക് പലിശ നിരക്കുകള്‍ ഉയര്‍ന്ന നിലയില്‍ തുടരുന്നത് റിയല്‍ എസ്റ്റേറ്റ്, കണ്‍സ്ട്രക്ഷന്‍ മേഖലകളെ നിശ്ചലാവസ്ഥയിലാക്കിയിട്ടുണ്ട്. പുതിയ നിര്‍മ്മാണ പ്രവര്‍ത്തനങ്ങള്‍ കുറഞ്ഞതും വീടുകളുടെ വില്‍പ്പന മന്ദഗതിയിലായതും അനുബന്ധ മേഖലകളിലെ തൊഴിലവസരങ്ങളെ ബാധിച്ചു. മുന്‍പ് ലഭ്യമായിരുന്ന ഓവര്‍ടൈം ജോലികളും അധിക ഷിഫ്റ്റുകളും വെട്ടിച്ചുരുക്കപ്പെട്ടതോടെ പല കുടുംബങ്ങളുടെയും പ്രതിമാസ വരുമാനത്തില്‍ വലിയ കുറവുണ്ടായി. ഇത് ജനങ്ങളില്‍ സാമ്പത്തിക അരക്ഷിതാവസ്ഥയും മാനസിക പിരിമുറുക്കവും (Financial Stress) സൃഷ്ടിച്ചിട്ടുണ്ട്. തല്‍ഫലമായി, ആളുകള്‍ അത്യാവശ്യ കാര്യങ്ങള്‍ക്ക് മാത്രം പണം ചെലവഴിച്ച്, വളരെ ജാഗ്രതയോടെയാണ് മുന്നോട്ട് പോകുന്നത്.

പ്രതിസന്ധിയിലാകുന്ന ഇന്ത്യന്‍ ഗ്രോസറികളും റെസ്റ്റോറന്റുകളും സാധാരണക്കാരുടെ സ്‌പെന്‍ഡിംഗ് പവര്‍ കുറഞ്ഞത് ഏറ്റവും കൂടുതല്‍ ബാധിച്ചിരിക്കുന്നത് നമ്മുടെ കമ്മ്യൂണിറ്റിയെ മാത്രം വിശ്വസിച്ച് പ്രവര്‍ത്തിക്കുന്ന ചെറിയ ഇന്ത്യന്‍ ഗ്രോസറി കടകളെയും, കുടുംബങ്ങള്‍ നടത്തുന്ന നാടന്‍ റെസ്റ്റോറന്റുകളെയുമാണ്.

ചരക്കുകൂലി വര്‍ധിച്ചതോടെ മാതൃരാജ്യത്തുനിന്ന് എത്തിക്കുന്ന നാടന്‍ പലവ്യഞ്ജനങ്ങളുടെയും പച്ചക്കറികളുടെയും അടക്കം ലാന്‍ഡിംഗ് കോസ്റ്റ് (Landing Cost) വന്‍തോതില്‍ കൂടി.
ലാഭവിഹിതത്തിലെ കുറവ് വിലക്കയറ്റം മുഴുവനായും ഉപഭോക്താക്കളിലേക്ക് അടിച്ചേല്‍പ്പിക്കാന്‍ സാധിക്കാത്തതിനാല്‍, സ്വന്തം ലാഭവിഹിതം വെട്ടിക്കുറച്ചാണ് പല ചെറുകിട വ്യാപാരികളും സ്ഥാപനങ്ങള്‍ മുന്നോട്ട് കൊണ്ടുപോകുന്നത്.
പ്രവര്‍ത്തനച്ചെലവ് വാടക, വൈദ്യുതി, തൊഴിലാളികളുടെ വേതനം എന്നിവയിലുണ്ടായ വര്‍ധനവ് ഇവരുടെ നിലനില്‍പ്പ് തന്നെ അപകടത്തിലാക്കുന്നു.

അമേരിക്കയിലെ മലയാളി സമൂഹത്തിന്റെ വളര്‍ച്ചയില്‍ ഈ ചെറുകിട സ്ഥാപനങ്ങള്‍ വഹിച്ച പങ്കു ചെറുതല്ല. നമ്മുടെ പ്രാദേശിക കൂട്ടായ്മകള്‍, അസോസിയേഷനുകള്‍, സാംസ്‌കാരിക പരിപാടികള്‍, ഓണം-വിഷു ആഘോഷങ്ങള്‍ എന്നിവ നടക്കുമ്പോള്‍ ആദ്യമായി സ്‌പോണ്‍സര്‍ഷിപ്പുമായി മുന്നോട്ടുവരുന്നത് ഈ സ്ഥാപനങ്ങളാണ്. കമ്മ്യൂണിറ്റി മീറ്റിംഗുകള്‍ക്കും ദുരിതാശ്വാസ പ്രവര്‍ത്തനങ്ങള്‍ക്കും സൗജന്യമായി ഭക്ഷണവും സാമ്പത്തിക സഹായവും നല്‍കി നമ്മെ പിന്തുണച്ചവരാണ് ഈ സംരംഭകര്‍.

വലിയ സൂപ്പര്‍മാര്‍ക്കറ്റുകള്‍ക്കും കോര്‍പ്പറേറ്റ് ശൃംഖലകള്‍ക്കും ഇത്തരം പ്രതിസന്ധികളെ അതിജീവിക്കാന്‍ വലിയ മൂലധന ശേഷിയുണ്ടാകും. എന്നാല്‍, നമ്മെ വിശ്വസിച്ച് ബിസിനസ് ചെയ്യുന്ന നമ്മുടെ പ്രവാസി സഹോദരങ്ങള്‍ക്ക് നമ്മള്‍ നല്‍കുന്ന പിന്തുണ മാത്രമാണ് ഏക പിടിവള്ളി.

വലിയ ചെയിന്‍ സ്റ്റോറുകളെ ആശ്രയിക്കുന്നതിന് പകരം നമ്മുടെ തൊട്ടടുത്തുള്ള ഇന്ത്യന്‍ ഗ്രോസറി കടകളില്‍ നിന്നും റെസ്റ്റോറന്റുകളില്‍ നിന്നും സാധനങ്ങളും ഭക്ഷണവും വാങ്ങാന്‍ ശ്രദ്ധിക്കുക.

ആഴ്ചയിലൊരിക്കലെങ്കിലും പ്രാദേശികമായി മലയാളി മാനേജ് ചെയ്യുന്ന റെസ്റ്റോറന്റുകളില്‍ നിന്ന് ഭക്ഷണം കഴിക്കുകയോ ഡെലിവറി എടുക്കുകയോ ചെയ്യുക. നമ്മുടെ സുഹൃത്തുക്കള്‍ക്കും പരിചയക്കാര്‍ക്കും ഈ സ്ഥാപനങ്ങളെക്കുറിച്ച് നല്ല അഭിപ്രായങ്ങള്‍ പങ്കുവെക്കുക, സോഷ്യല്‍ മീഡിയയിലൂടെ അവരെ പിന്തുണയ്ക്കുക.

ഈ സാമ്പത്തിക മാന്ദ്യവും കഠിനമായ കാലവും കടന്നുപോകും. എന്നാല്‍, വിഷമഘട്ടത്തില്‍ പരസ്പര താങ്ങായി നിന്ന ചരിത്രമാണ് പ്രവാസി മലയാളികള്‍ക്കുള്ളത്. പ്രിയപ്പെട്ട പ്രവാസി സഹോദരങ്ങളുടെ ബിസിനസുകള്‍ തകര്‍ന്നുപോകാതെ സംരക്ഷിക്കേണ്ടത് ഒരു സമൂഹമെന്ന നിലയില്‍ നമ്മുടെ ഓരോരുത്തരുടെയും കടമയും ഉത്തരവാദിത്തവുമാണ്. നമുക്ക് ഒന്നിച്ചുനില്‍ക്കാം, നമ്മുടെ സ്വന്തം സ്ഥാപനങ്ങളെ നെഞ്ചോട് ചേര്‍ത്ത് പിടിച്ച് ഈ പ്രതിസന്ധിയെ അതിജീവിക്കാം.