വാഷിങ്ടൺ: ഒഹായോ ഗവർണർ സ്ഥാനാർഥി വിവേക് രാമസ്വാമിക്ക് പിന്തുണയുമായി ഡോണൾഡ് ട്രംപ്. നവംബർ മൂന്നിന് നടക്കുന്ന ഇടക്കാല തിരഞ്ഞെടുപ്പിന് മുന്നോടിയായി ഒഹായോയിലെ ചിലിക്കോത്തിയിൽ നടന്ന പ്രചാരണ റാലിയിൽ രാമസ്വാമിയെ വേദിയിലേക്ക് ക്ഷണിച്ച ട്രംപ്, അദ്ദേഹത്തെ ഗവർണറായി തിരഞ്ഞെടുക്കണമെന്ന് വോട്ടർമാരോട് അഭ്യർഥിച്ചു.

തിരഞ്ഞെടുപ്പിന് ആറു ദിവസം മാത്രം ശേഷിക്കെ നടന്ന റാലിയിൽ റിപ്പബ്ലിക്കൻ പാർട്ടി വിജയം ഉറപ്പാണെന്ന് ട്രംപ് പ്രഖ്യാപിച്ചു. രാമസ്വാമിയെ പിന്തുണയ്ക്കുന്നതിനൊപ്പം കോൺഗ്രസ് തിരഞ്ഞെടുപ്പിൽ മത്സരിക്കുന്ന റിപ്പബ്ലിക്കൻ സ്ഥാനാർഥികൾക്കും വോട്ട് ചെയ്യണമെന്ന് അദ്ദേഹം ആവശ്യപ്പെട്ടു.

ഗവർണറായി തിരഞ്ഞെടുക്കപ്പെട്ടാൽ ഒഹായോയുടെ ചരിത്രത്തിലെ ഏറ്റവും വലിയ പ്രോപ്പർട്ടി ടാക്സ് ഇളവ് പാക്കേജ് നടപ്പാക്കുമെന്ന് രാമസ്വാമി വാഗ്ദാനം ചെയ്തു. സംസ്ഥാനത്തെ സാങ്ച്വറി സിറ്റികൾ അവസാനിപ്പിക്കുമെന്നും അദ്ദേഹം പ്രഖ്യാപിച്ചു. അധികാരത്തിലെത്തുന്ന ആദ്യ ദിവസം തന്നെ എക്സിക്യൂട്ടീവ് ഉത്തരവിലൂടെ ഇതിനുള്ള നടപടി സ്വീകരിക്കുമെന്നും രാമസ്വാമി നേരത്തെ വ്യക്തമാക്കിയിരുന്നു.

ട്രംപിന്റെ ദേശീയ രാഷ്ട്രീയ നിലപാടുകളെ സംസ്ഥാനതലത്തിൽ പിന്തുടരുമെന്ന് വ്യക്തമാക്കിയ രാമസ്വാമി, ‘പ്രസിഡന്റ് ട്രംപ് അമേരിക്കക്കാർക്ക് മുൻഗണന നൽകുന്നു. ഞാൻ ഒഹായോക്കാർക്ക് മുൻഗണന നൽകും’ എന്ന് പറഞ്ഞു.

ഡെമോക്രാറ്റിക് സ്ഥാനാർഥി ആമി ആക്ടണുമായാണ് രാമസ്വാമി ഗവർണർ സ്ഥാനത്തേക്ക് മത്സരിക്കുന്നത്. ആക്ടന്റെ കോവിഡ് കാലത്തെ ഭരണനടപടികളെ രാമസ്വാമി വിമർശിച്ചു. ആക്ടന്റെ രാഷ്ട്രീയ നിലപാടുകളെയും ഭരണരേഖയെയും ട്രംപും വിമർശിച്ചു.

റിപ്പബ്ലിക്കൻ പാർട്ടി കോൺഗ്രസിന്റെ ഇരുസഭകളിലും വിജയിച്ചാൽ അമേരിക്കയിലെ പ്രായപൂർത്തിയായ പൗരന്മാർക്ക് 5,000 ഡോളർ വീതം നൽകുമെന്നും ട്രംപ് റാലിയിൽ പ്രഖ്യാപിച്ചു. ഏകദേശം ഒരു ട്രില്യൺ ഡോളർ ചെലവ് വരുമെന്ന് കണക്കാക്കിയ പദ്ധതിയെ ‘ഡിവിഡന്റ്’ എന്നാണ് ട്രംപ് വിശേഷിപ്പിച്ചത്. പണം അമേരിക്കയ്ക്കുള്ളിൽ തന്നെ ചെലവഴിക്കണമെന്നും അദ്ദേഹം ആവശ്യപ്പെട്ടു.

എന്നാൽ പദ്ധതിയുടെ ധനസമാഹരണ മാർഗങ്ങളോ പണം വിതരണം ചെയ്യുന്ന സമയക്രമമോ ട്രംപ് വ്യക്തമാക്കിയില്ല. പ്രഖ്യാപനം തിരഞ്ഞെടുപ്പ് വാഗ്ദാനമായി തുടരുകയാണ്.

തീരുവ നയങ്ങളിലൂടെ അമേരിക്കൻ കമ്പനികളെ ആഭ്യന്തര ഉൽപ്പാദനത്തിലേക്ക് പ്രോത്സാഹിപ്പിക്കുകയാണെന്നും അതുവഴി തൊഴിലവസരങ്ങളും കുടുംബങ്ങളുടെ വരുമാനവും സംരക്ഷിക്കപ്പെടുമെന്നും ട്രംപ് അവകാശപ്പെട്ടു.

ഒഹായോയിലെ ഗവർണർ തിരഞ്ഞെടുപ്പിനെ റിപ്പബ്ലിക്കൻ പാർട്ടിയുടെ ദേശീയ രാഷ്ട്രീയ ലക്ഷ്യങ്ങളുമായി ബന്ധിപ്പിച്ചായിരുന്നു റാലി. വോട്ടർമാർ വിജയം ഉറപ്പാണെന്ന് കരുതി വോട്ടെടുപ്പിൽ നിന്ന് വിട്ടുനിൽക്കരുതെന്ന് ട്രംപ് മുന്നറിയിപ്പ് നൽകി.

റാലിയുടെ സമാപനത്തിൽ രാമസ്വാമിയും ട്രംപും റിപ്പബ്ലിക്കൻ സ്ഥാനാർഥികൾക്ക് വോട്ട് ചെയ്യണമെന്ന് ആവർത്തിച്ച് അഭ്യർഥിച്ചു.