അറ്റ്ലാന്റ: അമേരിക്കയിലെ ഇന്ത്യൻ പ്രവാസികൾക്ക് കോൺസുലാർ സേവനങ്ങൾ സംബന്ധിച്ച വിവരങ്ങൾ എളുപ്പത്തിൽ ലഭ്യമാക്കാൻ അറ്റ്ലാന്റയിലെ ഇന്ത്യൻ കോൺസുലേറ്റ് ജനറൽ ‘കോൺസേതു എഐ’ (ConSetu AI) എന്ന നിർമിതബുദ്ധി ചാറ്റ്ബോട്ട് അവതരിപ്പിച്ചു. പാസ്‌പോർട്ട് പുതുക്കൽ, വിസ, ഓവർസീസ് സിറ്റിസൺ ഓഫ് ഇന്ത്യ (ഒസിഐ) അപേക്ഷകൾ തുടങ്ങിയവയുമായി ബന്ധപ്പെട്ട സംശയങ്ങൾക്ക് മറുപടി നൽകുകയാണ് പുതിയ സംവിധാനത്തിന്റെ ലക്ഷ്യം.

നിലവിൽ ബീറ്റാ പരീക്ഷണ ഘട്ടത്തിലുള്ള ചാറ്റ്ബോട്ട് വികസനത്തിലാണെന്നും സേവനം കൂടുതൽ മെച്ചപ്പെടുത്തുന്നതിനായി പൊതുജനങ്ങളിൽ നിന്ന് അഭിപ്രായങ്ങളും നിർദേശങ്ങളും ക്ഷണിച്ചിട്ടുണ്ടെന്നും കോൺസുലേറ്റ് അറിയിച്ചു.

‘കോൺസേതു എഐ അവതരിപ്പിക്കുന്നു – അറ്റ്ലാന്റ ഇന്ത്യൻ കോൺസുലേറ്റുമായി ബന്ധപ്പെടാനുള്ള നിങ്ങളുടെ സ്മാർട്ട് ലിങ്ക്. എപ്പോൾ വേണമെങ്കിലും, എവിടെനിന്നും വിവരങ്ങൾ ലഭ്യമാക്കാം’ എന്ന സന്ദേശത്തോടെയാണ് കോൺസുലേറ്റ് സമൂഹമാധ്യമങ്ങളിലൂടെ പുതിയ സംവിധാനത്തെ പരിചയപ്പെടുത്തിയത്.

പാസ്‌പോർട്ട് പുതുക്കൽ, ഒസിഐ അപേക്ഷകൾ, വിസാ രേഖകളുടെ ചെക്ക്‌ലിസ്റ്റ്, അപേക്ഷകളുടെ നിലവിലെ സ്ഥിതി, രേഖകളുടെ അറ്റസ്റ്റേഷൻ തുടങ്ങിയ വിഷയങ്ങളിൽ ചാറ്റ്ബോട്ടിനോട് ചോദ്യങ്ങൾ ചോദിക്കാം. കോൺസുലാർ സേവനങ്ങളുമായി ബന്ധപ്പെട്ട പതിവ് സംശയങ്ങൾക്ക് സമയപരിധിയില്ലാതെ വിവരങ്ങൾ ലഭ്യമാക്കുകയാണ് ഇതിലൂടെ ലക്ഷ്യമിടുന്നത്.

ബീറ്റാ പരീക്ഷണത്തിന്റെ ഭാഗമായി ഉപയോക്താക്കൾക്ക് അനുഭവങ്ങളും നിർദേശങ്ങളും ചിത്രങ്ങളും പങ്കുവയ്ക്കാം. അഭിപ്രായങ്ങൾ പങ്കുവയ്ക്കുന്നവരുടെ സംഭാവനകൾ സമൂഹമാധ്യമങ്ങളിലൂടെ ഹൈലൈറ്റ് ചെയ്യുമെന്നും കോൺസുലേറ്റ് അറിയിച്ചു. ജനപങ്കാളിത്തത്തിലൂടെ സംവിധാനം കൂടുതൽ ഫലപ്രദമാക്കുകയാണ് ലക്ഷ്യം.

വിദേശരാജ്യങ്ങളിലെ ഇന്ത്യൻ പ്രവാസികൾക്കുള്ള സേവനങ്ങൾ മെച്ചപ്പെടുത്തുന്നതിന് നിർമിതബുദ്ധി അധിഷ്ഠിത സംവിധാനങ്ങൾ ഉപയോഗിക്കുന്നതിന്റെ ഭാഗമായാണ് പുതിയ സംരംഭം.

ജർമനിയിലെ മ്യൂണിക്കിലുള്ള ഇന്ത്യൻ കോൺസുലേറ്റ് ജനറൽ അവതരിപ്പിച്ച ‘സാരഥി’ എഐ അവതാറും ഇന്തോനേഷ്യയിലെ ഇന്ത്യൻ എംബസി പുറത്തിറക്കിയ ‘ദേവി’ എന്ന എഐ അധിഷ്ഠിത വെർച്വൽ അവതാറും സമാനമായ സംരംഭങ്ങളാണ്.

സാങ്കേതികവിദ്യയുടെ സഹായത്തോടെ ഭരണനിർവഹണവും പൊതുജനസമ്പർക്കവും കൂടുതൽ കാര്യക്ഷമമാക്കണമെന്ന പ്രധാനമന്ത്രിയുടെ ആഹ്വാനത്തിന്റെ പശ്ചാത്തലത്തിലാണ് ഇത്തരം ഡിജിറ്റൽ സംവിധാനങ്ങൾ വ്യാപകമാകുന്നത്. വിദേശത്തുള്ള ഇന്ത്യക്കാർക്ക് കോൺസുലാർ വിവരങ്ങൾ കൂടുതൽ വേഗത്തിലും എളുപ്പത്തിലും ലഭ്യമാക്കുന്നതിൽ എഐ സംവിധാനങ്ങൾ നിർണായക പങ്കുവഹിക്കുമെന്നാണ് വിലയിരുത്തൽ.

-