സേവനത്തിന്റെയും സൗഹൃദത്തിൻറെയും കൂട്ടായ്മയുടെയും അഭിമാനനിമിഷങ്ങളുമായി ഫോമാ സൗത്ത് ഈസ്റ്റ് റീജിയൻ 2024-2026 നേതൃത്വം പടിയിറങ്ങുന്നു.

അറ്റ്ലാന്റ: രണ്ടുവർഷത്തെ പ്രവർത്തനങ്ങൾക്ക് തിരശ്ശീല വീഴുമ്പോൾ ഫോമാ സൗത്ത് ഈസ്റ്റ് റീജിയന്റെ 2024-2026 നേതൃത്വത്തിന് പറയാനുള്ളത് നേട്ടങ്ങളുടെ കണക്കുകൾ മാത്രമല്ല, ചേർത്തുപിടിച്ച മനുഷ്യരുടെയും കൈകോർത്ത കൂട്ടായ്മകളുടെയും സാക്ഷാത്കരിച്ച സ്വപ്നങ്ങളുടെയും കഥകളാണ്. സേവനത്തിനും സാംസ്കാരിക പൈതൃകത്തിനും സാമൂഹിക പ്രതിബദ്ധതയ്ക്കും ഒരുപോലെ പ്രാധാന്യം നൽകി മുന്നേറിയ ഈ കാലഘട്ടം, നിറഞ്ഞ ചാരിതാർഥ്യത്തോടെയും അഭിമാനത്തോടെയുമാണ് നേതൃത്വം പൂർത്തിയാക്കുന്നത്.

സ്ഥാനങ്ങൾ താൽക്കാലികമാണ്; എന്നാൽ ആത്മാർഥതയോടെ ചെയ്ത പ്രവർത്തനങ്ങൾ കാലത്തിനപ്പുറവും ഓർമിക്കപ്പെടും. ഈ തിരിച്ചറിവായിരുന്നു കഴിഞ്ഞ രണ്ടുവർഷക്കാലം ഫോമാ സൗത്ത് ഈസ്റ്റിൻ്റെ ഓരോ ചുവടുവയ്പിനും കരുത്തായത്.

2024 നവംബർ 17-ന് ചേർന്ന ആദ്യ റീജിയണൽ കമ്മിറ്റി യോഗത്തിൽ രൂപപ്പെട്ടത് ഒരു പുതിയ നേതൃത്വനിര മാത്രമായിരുന്നില്ല; വ്യക്തമായ ലക്ഷ്യബോധവും കൂട്ടായ പ്രവർത്തനത്തിനുള്ള ഉറച്ച തീരുമാനവുമായിരുന്നു. റീജിയണൽ വൈസ് പ്രസിഡൻ്റ് പ്രകാശ് ജോസഫിന്റെ നേതൃത്വത്തിൽ നാഷണൽ കമ്മിറ്റി അംഗങ്ങളായ കാജൽ സക്കറിയ, ബബ്ലു ചാക്കോ, യുവജന പ്രതിനിധി അമൽ സാം, റീജിയണൽ ചെയർമാൻ ജെയിംസ് കല്ലറക്കാനിയിൽ, സെക്രട്ടറി ഉഷ പ്രസാദ്, ട്രഷറർ ദിവ്യ അമരയിൽ എന്നിവരടങ്ങിയ ടീം, സൗത്ത് ഈസ്റ്റിലെ മലയാളി സമൂഹത്തെ കൂടുതൽ അടുപ്പിക്കുന്നതിനും സമൂഹനന്മയ്ക്കായി പ്രവർത്തിക്കുന്നതിനുമാണ് മുൻഗണന നൽകിയത്.

ആഘോഷങ്ങൾക്കപ്പുറം സേവനത്തിൻ്റെ കൈയൊപ്പ് പതിപ്പിച്ച് ഫോമാ സൗത്ത് ഈസ്റ്റ്

സാംസ്കാരിക കൂട്ടായ്മകൾക്കൊപ്പം സാമൂഹിക സേവനത്തിനും ജീവകാരുണ്യ പ്രവർത്തനങ്ങൾക്കും മുൻഗണന നൽകിയ ഫോമാ സൗത്ത് ഈസ്റ്റ് റീജിയൻ്റെ 2024-2026 കാലഘട്ടം ശ്രദ്ധേയമായ നിരവധി പ്രവർത്തനങ്ങൾക്ക് സാക്ഷ്യം വഹിച്ചു. 2024 ഡിസംബറിൽ 'Meals by Grace' എന്ന സന്നദ്ധസംഘടനയുമായി സഹകരിച്ച് അൻപതിലധികം പ്രവർത്തകരുടെ പങ്കാളിത്തത്തോടെ ഭക്ഷ്യസഹായ പ്രവർത്തനങ്ങൾ സംഘടിപ്പിച്ചു. അറ്റ്ലാൻ്റയിലെ ഇന്ത്യൻ കോൺസുലേറ്റ് ജനറലുമായുള്ള കൂടിക്കാഴ്ച പ്രവാസി സമൂഹത്തിന്റെ സാമൂഹിക, സാംസ്കാരിക മേഖലകളിലെ സഹകരണം ശക്തിപ്പെടുത്തുന്നതിനുള്ള അവസരമായി. 2025 ഫെബ്രുവരിയിൽ മുന്നൂറിലധികം പേർ പങ്കെടുത്ത ഔദ്യോഗിക സ്ഥാനാരോഹണ ചടങ്ങും വിവിധ സംസ്ഥാനങ്ങളിൽ നിന്നുള്ള മലയാളികളെ ഒരുമിപ്പിച്ച ഓണാഘോഷവും സംഘടനയുടെ ഐക്യവും സംഘാടകമികവും വിളിച്ചോതി. റീജിയണൽ അഡ്വൈസറി ബോർഡിൻ്റെ രൂപീകരണവും വിവിധ മലയാളി അസോസിയേഷനുകളുമായുള്ള സഹകരണവും ഈ കാലഘട്ടത്തിലെ ശ്രദ്ധേയമായ നേട്ടങ്ങളായി.

സ്ത്രീശാക്തീകരണത്തിനൊപ്പം ജീവകാരുണ്യ പ്രവർത്തനങ്ങൾക്കും പുതിയ മാനം നൽകിയ വിമൻസ് ഫോറത്തിന്റെ 'ലേഡീസ് നൈറ്റ്', കേരളത്തിലെ സാമ്പത്തികമായി പിന്നാക്കം നിൽക്കുന്ന മൂന്ന് വിദ്യാർഥിനികളുടെ വിദ്യാഭ്യാസസ്വപ്നങ്ങൾക്ക് കൈത്താങ്ങായി. രണ്ട് നഴ്സിങ് വിദ്യാർഥിനികൾക്കും ഒരു പ്ലസ് ടൂ വിദ്യാർഥിനിക്കും സമാഹരിച്ച ധനസഹായം ഫോമാ കൺവെൻഷനിൽ നേരിട്ട് കൈമാറി. അതേസമയം, റീജിയന്റെ ഏറ്റവും അഭിമാനകരമായ സംരംഭങ്ങളിലൊന്നായി കേരളത്തിലെ നിർധന കുടുംബങ്ങൾക്കായുള്ള ഭവനനിർമാണ പദ്ധതി മാറി. ഒരു വീടെന്ന ലക്ഷ്യത്തോടെ ആരംഭിച്ച പദ്ധതി, പ്രവർത്തകരുടെയും അഭ്യദയകാംക്ഷികളുടെയും പിന്തുണയോടെ രണ്ട് വീടുകളിലേക്ക് വികസിച്ചു. ഇതിനായി പതിനായിരം ഡോളറിലധികം സമാഹരിക്കാൻ സാധിച്ചു. രണ്ടാമത്തെ വീടിൻ്റെ നിർമാണം ഇപ്പോഴും പുരോഗമിക്കുകയാണ്. ഭരണകാലാവധി അവസാനിക്കുമ്പോഴും ഈ ജീവകാരുണ്യ ദൗത്യം തുടരുന്നു എന്നത് സംഘടനയുടെ സാമൂഹിക പ്രതിബദ്ധതയുടെ തെളിവാണ്.

2025 ഡിസംബറിൽ സംഘടിപ്പിച്ച ക്രിസ്മസ്-വർഷാന്ത്യ സംഗമത്തിൽ സംഘടനയുടെ വിജയങ്ങൾക്ക് പിന്നിൽ പ്രവർത്തിച്ച സന്നദ്ധപ്രവർത്തകരെയും അംഗങ്ങളെയും ആദരിച്ചു. സാംസ്കാരിക പൈതൃകത്തിന്റെ സംരക്ഷണം, സ്ത്രീശാക്തീകരണം, വിദ്യാഭ്യാസസഹായം, ഭവനനിർമാണം, പ്രാദേശിക സാമൂഹിക സേവനം തുടങ്ങി വിവിധ മേഖലകളിൽ വ്യക്തമായ സാന്നിധ്യം രേഖപ്പെടുത്തിയാണ് ഫോമാ സൗത്ത് ഈസ്റ്റ് 2024-2026 നേതൃത്വം പടിയിറങ്ങുന്നത്. കമ്മിറ്റി അംഗങ്ങളുടെയും വിവിധ മലയാളി അസോസിയേഷനുകളുടെയും സ്പോൺസർമാരുടെയും സന്നദ്ധപ്രവർത്തകരുടെയും കൂട്ടായ പരിശ്രമമാണ് ഈ നേട്ടങ്ങൾക്ക് അടിത്തറയായത്.
നിറഞ്ഞ ചാരിതാർഥ്യത്തോടെ രണ്ടുവർഷത്തെ പ്രവർത്തനങ്ങൾക്ക് വിരാമമിടുമ്പോൾ, പദവികൾ മാറിയാലും സേവനത്തിലൂടെ സൃഷ്ടിച്ച നന്മകളും കൂട്ടായ്മയുടെ കരുത്തും നിലനിൽക്കുമെന്ന വിശ്വാസമാണ് നേതൃത്വത്തിന് പങ്കുവയ്ക്കാനുള്ളത്.