വാഷിങ്ടൺ: ഇന്ത്യൻ വംശജരായ വോട്ടർമാരെ ആകർഷിക്കാൻ ദോശയുണ്ടാക്കി ടെക്സസ് സെനറ്റ് സ്ഥാനാർഥി ജെയിംസ് തലാരിക്കോ. ഇന്ത്യൻ റസ്റ്ററന്റിൽ മസാല ദോശ തയ്യാറാക്കുന്ന തലാരിക്കോയുടെ ദൃശ്യങ്ങൾ സമൂഹമാധ്യമങ്ങളിൽ വൈറലായതോടെ ഇന്ത്യൻ-അമേരിക്കൻ സമൂഹത്തിൽനിന്ന് വലിയ പിന്തുണയാണ് ലഭിക്കുന്നത്.

ടെക്സസിലെ ഇർവിങിലുള്ള മദിര എൻ മസാല (Madira N Masala) റസ്റ്ററന്റിലായിരുന്നു ഡെമോക്രാറ്റിക് സ്ഥാനാർഥിയുടെ ദോശ പരീക്ഷണം. ദോശമാവ് ചൂടുള്ള തവയിൽ പരത്തി, മസാല നിറച്ച് ദോശ മടക്കുന്ന തലാരിക്കോയുടെ ദൃശ്യങ്ങൾ ശ്രദ്ധ നേടി. ഇന്ത്യൻ ഭക്ഷണസംസ്കാരത്തോടുള്ള ആദരവായാണ് നിരവധി പേർ ഈ നീക്കത്തെ വിലയിരുത്തിയത്.

ടെക്സസിൽ ഇന്ത്യൻ വംശജർക്കെതിരെ വർധിച്ചുവരുന്ന വംശീയ പരാമർശങ്ങളുടെ പശ്ചാത്തലത്തിലാണ് തലാരിക്കോയുടെ പ്രചാരണപരിപാടി ശ്രദ്ധേയമാകുന്നത്. ഡാളസിനെ 'ഡാളസ്പുരം' എന്ന് പരിഹസിക്കുന്നതടക്കമുള്ള പരാമർശങ്ങൾ ഇന്ത്യൻ സമൂഹത്തിൽ പ്രതിഷേധത്തിന് ഇടയാക്കിയിരുന്നു.

ഇന്ത്യൻ വംശജരെ ലക്ഷ്യമിട്ടുള്ള വംശീയ അധിക്ഷേപങ്ങൾക്കെതിരായ നിലപാടായും തലാരിക്കോയുടെ ദോശയുണ്ടാക്കൽ ചിലർ വിലയിരുത്തി. ഇന്ത്യൻ-അമേരിക്കൻ വോട്ടർമാരുടെ പിന്തുണ തിരഞ്ഞെടുപ്പിൽ നിർണായകമാകുമെന്ന് സമൂഹമാധ്യമങ്ങളിലെ പ്രതികരണങ്ങൾ സൂചിപ്പിക്കുന്നു.

ടെക്സസിൽ റിപ്പബ്ലിക്കൻ സ്ഥാനാർഥി കെൻ പാക്സ്റ്റണിനെതിരെയാണ് തലാരിക്കോയുടെ മത്സരം. പരമ്പരാഗതമായി റിപ്പബ്ലിക്കൻ പാർട്ടിക്ക് ശക്തമായ സ്വാധീനമുള്ള ടെക്സസിൽ ഡെമോക്രാറ്റുകൾക്ക് വിജയസാധ്യതയുണ്ടെന്ന പ്രതീക്ഷയും ഉയരുന്നുണ്ട്.

ടെക്സസിൽ 38 വർഷമായി ഡെമോക്രാറ്റുകൾക്ക് സെനറ്റ് സീറ്റ് നേടാനായിട്ടില്ല. ഇന്ത്യൻ-അമേരിക്കൻ വോട്ടർമാരുടെ പിന്തുണയും ഹിസ്പാനിക് സമൂഹത്തിന്റെ വോട്ടുകളും ഇത്തവണ തിരഞ്ഞെടുപ്പ് ഫലത്തിൽ നിർണായകമായേക്കുമെന്നാണ് രാഷ്ട്രീയ നിരീക്ഷണം.

ഒന്നോ രണ്ടോ ശതമാനം വോട്ടുകളുടെ വ്യത്യാസം പോലും നിർണായകമാകുന്ന മത്സരത്തിൽ ഇന്ത്യൻ വംശജരുടെ പിന്തുണ നേടാനുള്ള ശ്രമത്തിലാണ് സ്ഥാനാർഥികൾ.