കേരളപ്പിറവി എന്നത് ഒരു നാടിന്റെ സംസ്കാരത്തിന്റെ ഉയിർത്തെഴുന്നേൽപ്പ് ആണ്. പ്രകൃതിയുടെ പച്ചപ്പും പുഴകളുടെ സംഗീതവും കടലിന്റെ നീലിമയും മനുഷ്യസ്നേഹത്തിന്റെ ചൂടും ചേർന്നൊരുക്കിയ നാടാണ് കേരളം. എന്നാൽ കേരളത്തിന്റെ മഹത്വം പ്രകൃതിസൗന്ദര്യത്തിൽ മാത്രം ഒതുങ്ങുന്നില്ല, ഭാഷയും സംസ്കാരവും ഐക്യബോധവും സാമൂഹിക പുരോഗതിയും ചേർന്നാണ് കേരളം മലയാളിയുടെ അഭിമാനമായി മാറിയത്.

 1956 നവംബർ ഒന്നിന് ഭാഷാടിസ്ഥാനത്തിൽ രൂപംകൊണ്ട കേരളം, മലയാളിയുടെ ദീർഘകാല ഐക്യകേരള സ്വപ്നത്തിന്റെ സാക്ഷാത്കാരമായിരുന്നു. തിരുവിതാംകൂർ കൊച്ചി, മലബാർ, കാസർഗോഡ് താലൂക്ക് എന്നിവ ഒന്നിച്ചു ചേർന്ന ആ ചരിത്രദിനം, ഒരു സംസ്ഥാനത്തിന്റെ പിറവിയേക്കാൾ ഏറെ ഒരേ ഭാഷയും സംസ്കാരവും പങ്കിടുന്ന ജനതയുടെ ഐക്യബോധത്തിന്റെ വിജയമായിരുന്നു. കേരളത്തിന്റെ പിറവി കേവലം ഭൂപടത്തിൽ അതിർത്തികൾ വരച്ചുചേർത്ത ഒരു രാഷ്ട്രീയ സംഭവമായിരുന്നില്ല. ഭാഷയും സംസ്കാരവും ജീവിതരീതികളും കൊണ്ട് ഒരേ മനസ്സായി നിലകൊണ്ട ജനതയുടെ ഐക്യബോധത്തിന്റെ വിജയമായിരുന്നു അത്. 

ദേശങ്ങൾ പലതായിരുന്നെങ്കിലും മലയാളിയുടെ ഹൃദയമിടിപ്പ് ഒന്നായിരുന്നു. ആ ഐക്യത്തിന്റെ അടയാളമാണ് കേരളം. പ്രകൃതിസൗന്ദര്യം മാത്രമല്ല, സാമൂഹിക പുരോഗതിയുടെ ചരിത്രവും കേരളത്തെ വ്യത്യസ്തമാക്കുന്നു. വിദ്യാഭ്യാസം, ആരോഗ്യം, സാക്ഷരത, സാമൂഹിക പരിഷ്കരണം എന്നീ മേഖലകളിൽ കേരളം കൈവരിച്ച നേട്ടങ്ങൾ ലോകശ്രദ്ധ നേടിയിട്ടുണ്ട്. ശ്രീനാരായണഗുരു, ചട്ടമ്പിസ്വാമികൾ, അയ്യങ്കാളി തുടങ്ങിയ നവോത്ഥാന നായകർ തെളിച്ച വഴികളിലൂടെ സഞ്ചരിച്ചാണ് കേരളസമൂഹം അന്ധവിശ്വാസങ്ങളുടെയും ജാതിവിവേചനങ്ങളുടെയും ഇരുട്ടിൽനിന്ന് അറിവിന്റെയും സമത്വത്തിന്റെയും വെളിച്ചത്തിലേക്ക് മുന്നേറിയത്. 

ഓണത്തിന്റെ പൂവിളിയും വള്ളംകളിയുടെ ആവേശവും തെയ്യത്തിന്റെ താളവും കഥകളിയുടെ ചാരുതയും മോഹിനിയാട്ടത്തിന്റെ ലാസ്യവും മലയാളിയുടെ സാംസ്കാരിക സ്വത്വത്തിന് നിറംപകരുന്നു. വിവിധ മതങ്ങളും വിശ്വാസങ്ങളും ആചാരങ്ങളും നിലനിൽക്കുമ്പോഴും പരസ്പര സ്നേഹത്തിന്റെയും സഹവർത്തിത്വത്തിന്റെയും സന്ദേശം പകരുന്ന നാടാണ് കേരളം. മലയാളഭാഷയാണ് ഈ വൈവിധ്യങ്ങളെ ഒരേ വൈകാരിക നൂലിൽ കോർത്തിണക്കുന്നത്. എന്നാൽ, കേരളപ്പിറവി ആഘോഷിക്കുമ്പോൾ നാം സ്വയം ചോദിക്കേണ്ട ചില ചോദ്യങ്ങളുണ്ട്.

 പ്രകൃതിയെ സംരക്ഷിക്കാൻ നമുക്കാകുന്നുണ്ടോ? മണ്ണും പുഴയും മലകളും വരുംതലമുറയ്ക്കായി നമ്മൾ സംരക്ഷിക്കുന്നുണ്ടോ? കേരളത്തിന്റെ യഥാർഥ വളർച്ച അളക്കേണ്ടത് ഉയരുന്ന കെട്ടിടങ്ങളിലോ വികസനത്തിന്റെ കണക്കുകളിലോ മാത്രമല്ല, മനുഷ്യന്റെ മനസ്സിൽ വളരുന്ന കരുണയിലും സമൂഹത്തിൽ പുലരുന്ന നീതിയിലും പ്രകൃതിയോടുള്ള കരുതലിലുമാണ്. ആരും വിശന്നിരിക്കാത്ത, ആരും അവഗണിക്കപ്പെടാത്ത, സ്ത്രീയും പുരുഷനും തുല്യനീതിയോടെ ജീവിക്കുന്ന, മതത്തിന്റെയും ജാതിയുടെയും പേരിൽ മനുഷ്യർ വേർതിരിക്കപ്പെടാത്ത ഒരു കേരളമാണ് നമ്മുടെ സ്വപ്നം. 

നമ്മുടെ പൂർവികർ നമുക്ക് കൈമാറിയത് ഒരു ഭൂപ്രദേശം മാത്രമല്ല, അധ്വാനത്തിന്റെയും അതിജീവനത്തിന്റെയും അറിവിന്റെയും സ്നേഹത്തിന്റെയും മഹത്തായ പാരമ്പര്യമാണ്. ആ പൈതൃകം സംരക്ഷിക്കേണ്ടത് ഓരോ മലയാളിയുടെയും ഉത്തരവാദിത്വമാണ്. കേരളം നമ്മുടെ ജന്മനാടാണ്, മലയാളം നമ്മുടെ മാതൃഭാഷയാണ്; ഈ മണ്ണിന്റെ നന്മ നമ്മുടെ സ്വന്തം ആണ്. കാലം എത്ര മാറിയാലും ആ തിരിച്ചറിവ് നമ്മിൽനിന്ന് മാഞ്ഞുപോകരുത്. 

കേരളപ്പിറവി എന്നത് കഴിഞ്ഞകാലത്തിന്റെ മഹത്വം ഓർമിക്കുന്ന ഒരു ദിനം മാത്രമല്ല, വരുംകാല കേരളത്തെ കൂടുതൽ മനോഹരവും നീതിപൂർവകവും മാനവികവുമാക്കാനുള്ള പ്രതിജ്ഞ പുതുക്കുന്ന ദിനം കൂടിയാണ്. നമുക്ക് ഒരുമിച്ച് സ്വപ്നം കാണാം, അറിവിന്റെ വെളിച്ചം നിറഞ്ഞ, സ്നേഹത്തിന്റെ പൂക്കൾ വിരിയുന്ന, സമത്വത്തിന്റെ തണൽ പരക്കുന്ന ഒരു നവകേരളത്തെ. കേരളം വെറുമൊരു നാടല്ല, മലയാളിയുടെ ഹൃദയത്തിൽ അതിരുകളില്ലാതെ ജീവിക്കുന്ന ഒരനുഭവമാണ്. എന്റെ കേരളം എന്റെ അഭിമാനം. 

എന്റെ കേരളം  (കവിത : അഡ്വ വത്സ മരങ്ങോലി)

പച്ചപ്പട്ടു വിരിച്ചൊരു നാടേ, പൊന്നോണപ്പൂക്കളം തീർക്കും നാടേ, കായലോളം താളം തുള്ളും, 
കേരനിരകൾ കാറ്റിലാടും.

മലകൾ കാക്കും മഴയുടെ നാട്, 
പുഴകൾ പാടും പാട്ടിന്റെ നാട്, 
തിരമാല തഴുകും തീരം നീളെ, 
സന്ധ്യ ചുവക്കും സ്വർണ്ണം പോലെ.

പള്ളിയും പള്ളിക്കൂടവും ക്ഷേത്രവും, ഒരുമിച്ചുയരും മണ്ണിതല്ലോ, 
സ്നേഹത്തിൻ പൂക്കൾ വിരിയും മുറ്റത്ത്, ഭേദമില്ലാ മനസ്സുകളോടെ.

തിരുവാതിരയും തെയ്യവും കഥകളിയും, ചെണ്ടമേളം മുഴങ്ങും നേരം, അക്ഷരം പൂക്കും വഴിത്താരയിൽ, അറിവിൻ വെളിച്ചം നിറയും നാട്. 
എത്ര ദൂരം പോയാലും ഞാൻ,
ഹൃദയത്തിൽ നിന്നെ ചേർത്തു വയ്ക്കും, 
എന്റെ കേരളം, എന്റെ അഭിമാനം, 
എന്റെ അമ്മ, എന്റെ ജന്മഭൂമി.