വാഷിങ്ടൺ: അമേരിക്കയിലെ തൊഴിൽ അധിഷ്ഠിത രണ്ടാം മുൻഗണനാ വിഭാഗമായ ഇബി-2 ഗ്രീൻ കാർഡിനായി കാത്തിരിക്കുന്നവരിൽ 91 ശതമാനവും ഇന്ത്യക്കാർ. യുഎസ് സിറ്റിസൺഷിപ്പ് ആൻഡ് ഇമിഗ്രേഷൻ സർവീസസ് (USCIS) പുറത്തുവിട്ട 2026 ജൂൺ വരെയുള്ള കണക്കുകളിലാണ് ഇക്കാര്യം വ്യക്തമാക്കുന്നത്.

ഉന്നത വിദ്യാഭ്യാസ യോഗ്യതയുള്ള പ്രൊഫഷണലുകൾക്കുള്ള ഇബി-2 വിഭാഗത്തിൽ അംഗീകരിക്കപ്പെട്ട 3,91,296 അപേക്ഷകളാണ് വിസ ലഭ്യതയ്ക്കായി കാത്തിരിക്കുന്നത്. ഇതിൽ 3,56,360 അപേക്ഷകൾ ഇന്ത്യയിൽ ജനിച്ചവരുടേതാണ്. ആകെ അപേക്ഷകളുടെ 91.1 ശതമാനമാണിത്.

ചൈനയിൽ നിന്നുള്ളവരുടെ 34,936 അപേക്ഷകളാണ് കാത്തിരിപ്പിലുള്ളത്. ഇത് 8.9 ശതമാനമാണ്. മെക്സിക്കോ, ഫിലിപ്പീൻസ്, മറ്റ് രാജ്യങ്ങൾ എന്നിവിടങ്ങളിൽ നിന്നുള്ള ഇബി-2 അപേക്ഷകൾ വിസ ലഭ്യതയ്ക്കായി കാത്തിരിക്കുന്നവരുടെ പട്ടികയിൽ ഇല്ലെന്നും കണക്കുകൾ വ്യക്തമാക്കുന്നു.

എല്ലാ തൊഴിൽ അധിഷ്ഠിത ഗ്രീൻ കാർഡ് വിഭാഗങ്ങളും ചേർത്താൽ 8,56,662 അംഗീകരിക്കപ്പെട്ട അപേക്ഷകളാണ് വിസ ലഭ്യതയ്ക്കായി കാത്തിരിക്കുന്നത്. ഇതിൽ 4,91,773 അപേക്ഷകൾ ഇന്ത്യക്കാരുടേതാണ്. ആകെ അപേക്ഷകളുടെ 57.4 ശതമാനമാണിത്.

ഇബി-3 വിഭാഗത്തിലും ഇന്ത്യക്കാരാണ് ഏറ്റവും കൂടുതൽ. വിദഗ്ധ തൊഴിലാളികൾക്കും പ്രൊഫഷണലുകൾക്കുമുള്ള ഈ വിഭാഗത്തിൽ കാത്തിരിക്കുന്ന 1,47,492 അപേക്ഷകളിൽ 1,06,214 എണ്ണം ഇന്ത്യക്കാരുടേതാണ്. ഏകദേശം 72 ശതമാനം.

മുൻഗണനാ തൊഴിലാളികൾക്കുള്ള ഇബി-1 വിഭാഗത്തിൽ 31,962 അപേക്ഷകൾ കാത്തിരിക്കുമ്പോൾ 17,861 എണ്ണം ഇന്ത്യക്കാരുടേതാണ്. 56 ശതമാനമാണ് ഇന്ത്യക്കാരുടെ പങ്ക്.

പ്രധാന അപേക്ഷകരെ മാത്രമാണ് കണക്കുകളിൽ ഉൾപ്പെടുത്തിയിരിക്കുന്നതെന്ന് USCIS വ്യക്തമാക്കി. പങ്കാളികളും കുട്ടികളും ഉൾപ്പെടുന്ന ആശ്രിതരുടെ അപേക്ഷകൾ ഇതിൽ ഉൾപ്പെടുത്തിയിട്ടില്ല. അവ കൂടി കണക്കിലെടുത്താൽ കാത്തിരിപ്പ് പട്ടിക കൂടുതൽ വലുതാകും.

ഒരാൾക്ക് ഒന്നിലധികം അപേക്ഷകൾ സമർപ്പിക്കാനാകുന്നതിനാൽ ഒരേ വ്യക്തിയുടെ ഒന്നിലധികം അപേക്ഷകൾ റിപ്പോർട്ടിൽ ഉൾപ്പെട്ടേക്കാമെന്നും ഏജൻസി മുന്നറിയിപ്പ് നൽകി. ഇതിനകം സ്ഥിരതാമസാവകാശമോ പൗരത്വമോ നേടിയവരെ കണക്കുകളിൽ ഉൾപ്പെടുത്തിയിട്ടില്ല.

തൊഴിൽ അധിഷ്ഠിത ഗ്രീൻ കാർഡുകൾ അനുവദിക്കുന്നതിൽ ഒരു രാജ്യത്തിന് ഏഴ് ശതമാനത്തിൽ കൂടുതൽ വിഹിതം ലഭിക്കരുതെന്ന നിയമപരമായ പരിധിയാണ് ഇന്ത്യക്കാരുടെ നീണ്ട കാത്തിരിപ്പിന് പ്രധാന കാരണം.  എച്ച്-1ബി വിസയിൽ അമേരിക്കയിലെത്തുന്ന നിരവധി ഇന്ത്യൻ പ്രൊഫഷണലുകൾ പിന്നീട് തൊഴിലുടമയുടെ സ്പോൺസർഷിപ്പിലൂടെ ഗ്രീൻ കാർഡിന് അപേക്ഷിക്കുന്നതിനാൽ ഇന്ത്യയിൽ നിന്നുള്ള അപേക്ഷകളുടെ എണ്ണം ഉയർന്നതാണ്.

2026 സാമ്പത്തിക വർഷത്തേക്കുള്ള ഇന്ത്യയുടെ ഇബി-2 വിസ പരിധി പൂർത്തിയായതായി യുഎസ് സ്റ്റേറ്റ് ഡിപ്പാർട്ട്മെന്റ് നേരത്തേ അറിയിച്ചിരുന്നു. ഒക്ടോബർ ഒന്നിന് 2027 സാമ്പത്തിക വർഷം ആരംഭിക്കുന്നതുവരെ ഇന്ത്യക്കാർക്ക് ഇബി-വിഭാഗത്തിൽ കൂടുതൽ വിസകൾ അനുവദിക്കാനാകില്ലെന്നായിരുന്നു അറിയിപ്പ്.

എച്ച്-1ബി വിസാ നടപടികൾ കൂടുതൽ കർശനമാക്കുന്നതിനിടെയാണ് ഗ്രീൻ കാർഡ് കാത്തിരിപ്പിന്റെ കണക്കുകൾ പുറത്തുവന്നത്. ഇന്ത്യൻ പ്രൊഫഷണലുകൾക്ക് സ്ഥിരതാമസാവകാശം ലഭിക്കുന്നതിനുള്ള പ്രധാന മാർഗമായ എച്ച്-1ബി  സംവിധാനത്തിൽ നിയന്ത്രണങ്ങൾ ശക്തമാക്കുന്നതിനൊപ്പം, ഒക്ടോബറിൽ നിരവധി ടെക്നോളജി കമ്പനികളെ PERM തൊഴിൽ സർട്ടിഫിക്കേഷൻ നടപടികളിൽ നിന്ന് സസ്പെൻഡ് ചെയ്തിരുന്നു.