വാഷിങ്ടൺ: അമേരിക്കയിൽ എച്ച്-1ബി, എൽ-1 വിസകളിൽ ജോലി ചെയ്യുന്ന വിദേശികൾക്ക് വിസ കാലാവധി നീട്ടുന്നതുമായി ബന്ധപ്പെട്ട ട്രംപ് ഭരണകൂടത്തിന്റെ നിർദിഷ്ട നിയമമാറ്റം ഏറ്റവും കൂടുതൽ ബാധിക്കുക ഇന്ത്യൻ പ്രൊഫഷണലുകളെയെന്ന് യുഎസ് സിറ്റിസൺഷിപ്പ് ആൻഡ് ഇമിഗ്രേഷൻ സർവീസസിന്റെ (USCIS) കണക്കുകൾ.

എച്ച്-1ബി വിസയിൽ തുടർജോലിക്കുള്ള അംഗീകാരങ്ങളിൽ 80 ശതമാനത്തോളം ഇന്ത്യയിൽ ജനിച്ചവർക്കാണ് ലഭിക്കുന്നതെന്ന് കണക്കുകൾ വ്യക്തമാക്കുന്നു. മുൻപ് അംഗീകരിച്ച വിസ അപേക്ഷകളുടെ അടിസ്ഥാനത്തിൽ തുടർ അപേക്ഷകൾ പരിഗണിക്കുമ്പോൾ ഉദ്യോഗസ്ഥർ അതേ അംഗീകാരത്തെ ആശ്രയിക്കേണ്ടതില്ലെന്ന നിർദേശമാണ് ട്രംപ് ഭരണകൂടം മുന്നോട്ടുവച്ചിരിക്കുന്നത്.

നിർദിഷ്ട നിയമമാറ്റത്തെക്കുറിച്ചുള്ള പൊതുജനാഭിപ്രായം അറിയിക്കാനുള്ള സമയപരിധി നവംബർ 13ന് അവസാനിക്കും. ഒക്ടോബർ 14ന് ഫെഡറൽ രജിസ്റ്ററിൽ പ്രസിദ്ധീകരിച്ച നിർദേശത്തിൽ നവംബർ 13 വരെ regulations.gov വഴി അഭിപ്രായങ്ങൾ സമർപ്പിക്കാം.

നിലവിലെ ചട്ടപ്രകാരം, മുൻപ് അംഗീകരിച്ച അപേക്ഷയിൽ അതേ കക്ഷികളും വസ്തുതകളും ഉൾപ്പെടുന്നുവെങ്കിൽ, കാര്യമായ പിഴവോ മാറ്റമോ പുതിയ പ്രതികൂല വിവരങ്ങളോ ഇല്ലാത്തിടത്തോളം മുൻ തീരുമാനത്തെ അംഗീകരിക്കാൻ ഉദ്യോഗസ്ഥർക്ക് നിർദേശമുണ്ട്. ഈ വ്യവസ്ഥ ഒഴിവാക്കാനാണ് ആഭ്യന്തര സുരക്ഷാ വകുപ്പ് (DHS) നിർദേശിക്കുന്നത്.

എച്ച്-1ബി, എൽ-1 എന്നിവയ്ക്കു പുറമെ ഒ-1, ടി.എൻ, ഇ, പി വിഭാഗങ്ങളിലുള്ള വിസാ അപേക്ഷകളെയും നിയമമാറ്റം ബാധിക്കും. എന്നാൽ പുതിയ ചട്ടം പ്രാബല്യത്തിൽ വരുന്നതുവരെ നിലവിലെ നിയമം തുടരും.

2024 സാമ്പത്തിക വർഷത്തിൽ യുഎസ്‌സിഐഎസ് ഏകദേശം 3.99 ലക്ഷം എച്ച്-1ബി അപേക്ഷകൾ അംഗീകരിച്ചു. ഇതിൽ 71 ശതമാനവും ഇന്ത്യയിൽ ജനിച്ചവർക്കായിരുന്നു. തുടർജോലിക്കുള്ള ഏകദേശം 2.58 ലക്ഷം അംഗീകാരങ്ങളിൽ 2.03 ലക്ഷം, അഥവാ 79 ശതമാനം, ഇന്ത്യയിൽ ജനിച്ചവർക്കാണ് ലഭിച്ചത്.

നിർദിഷ്ട മാറ്റം പ്രതിവർഷം ഏകദേശം 2.08 ലക്ഷം അപേക്ഷകളെ ബാധിക്കുമെന്നാണ് ആഭ്യന്തര സുരക്ഷാ വകുപ്പിന്റെ കണക്ക്. അപേക്ഷകളിൽ കൂടുതൽ തെളിവുകൾ ആവശ്യപ്പെടുന്ന (Request for Evidence – RFE) നിരക്ക് മൂന്ന് ശതമാനം വർധിക്കുമെന്നും ഇതുവഴി പ്രതിവർഷം ഏകദേശം 6,000 അധിക അപേക്ഷകൾക്ക് തെളിവുകൾ ആവശ്യമായി വരുമെന്നും വകുപ്പ് വിലയിരുത്തുന്നു.

കൂടുതൽ തെളിവുകൾ ആവശ്യപ്പെട്ട അപേക്ഷകൾ തീർപ്പാക്കാൻ കഴിഞ്ഞ നാല് സാമ്പത്തിക വർഷങ്ങളിൽ ശരാശരി 64 ദിവസം അധികമായി വേണ്ടിവന്നതായും റിപ്പോർട്ടിൽ പറയുന്നു. അപേക്ഷകർക്ക് പ്രതിവർഷം ഏകദേശം 1.34 ലക്ഷം ഡോളറിന്റെ അധിക ചെലവുണ്ടാകുമെന്നും കണക്കാക്കുന്നു.

മുൻ അംഗീകാരങ്ങളെ ആശ്രയിക്കുന്ന നിലവിലെ നയം അപേക്ഷകരുടെ ഉത്തരവാദിത്വം കുറയ്ക്കുകയും മുൻ തീരുമാനത്തിൽനിന്ന് മാറാൻ ഉദ്യോഗസ്ഥർക്ക് കൂടുതൽ വിശദീകരണം നൽകേണ്ട സാഹചര്യം സൃഷ്ടിക്കുകയും ചെയ്യുന്നുവെന്നാണ് DHS-ന്റെ വാദം.

അതേസമയം, മുൻ അംഗീകാരങ്ങൾ പരിഗണിക്കുന്നതിൽ നിന്ന് ഉദ്യോഗസ്ഥരെ പുതിയ നിർദേശം വിലക്കുന്നില്ലെന്നും, മുൻ തീരുമാനത്തെ നിർബന്ധമായും അംഗീകരിക്കണമെന്ന വ്യവസ്ഥ മാത്രമാണ് ഒഴിവാക്കുന്നതെന്നും വകുപ്പ് വ്യക്തമാക്കി.

അമേരിക്കയിൽ ജോലി തുടരാനും നിയമപരമായ താമസം നിലനിർത്താനും കഴിയുമെന്ന പ്രതീക്ഷയിൽ തൊഴിലുടമകളും ജീവനക്കാരും തൊഴിൽപരവും വ്യക്തിപരവുമായ പദ്ധതികൾ തയ്യാറാക്കിയിട്ടുണ്ടെന്ന കാര്യവും വകുപ്പ് അംഗീകരിച്ചു.

മുൻ അംഗീകാരങ്ങൾക്ക് പ്രാധാന്യം നൽകുന്ന നയത്തിൽ പലതവണ മാറ്റങ്ങളുണ്ടായിട്ടുണ്ട്. 2004ൽ അവതരിപ്പിച്ച നയം 2017ൽ റദ്ദാക്കുകയും 2021ൽ പുനഃസ്ഥാപിക്കുകയും ചെയ്തു. 2024ൽ ഇത് ചട്ടത്തിന്റെ ഭാഗമാക്കി.