വാഷിങ്ടൺ: അമേരിക്കൻ തിരഞ്ഞെടുപ്പ് ചരിത്രത്തിലെ ഏറ്റവും ചെലവേറിയ പ്രസിഡന്റ് ഇതര തിരഞ്ഞെടുപ്പായി ടെക്സസ് സെനറ്റ് പോരാട്ടം. റിപ്പബ്ലിക്കൻ കെൻ പാക്സ്റ്റണും ഡെമോക്രാറ്റ് ജെയിംസ് തലാരിക്കോയും ഏറ്റുമുട്ടുന്ന മത്സരത്തിൽ രാഷ്ട്രീയ പരസ്യങ്ങൾക്കായി ചെലവഴിച്ചതും നീക്കിവച്ചതുമായ തുക 573 മില്യൺ ഡോളറിലെത്തി. പരസ്യ ചെലവുകൾ സംബന്ധിച്ച വിവരങ്ങൾ ശേഖരിക്കുന്ന അഡ്ഇംപാക്ട് (AdImpact) ആണ് കണക്കുകൾ പുറത്തുവിട്ടത്.

നവംബർ 3ന് നടക്കുന്ന യുഎസ് ഇടക്കാല തിരഞ്ഞെടുപ്പിന് മുന്നോടിയായി ടെക്സസിൽ ശക്തമായ പോരാട്ടമാണ് നടക്കുന്നത്. ഏറ്റവും പുതിയ സർവേകളിൽ ഡെമോക്രാറ്റ് സ്ഥാനാർഥി ജെയിംസ് തലാരിക്കോയ്ക്ക് മുൻതൂക്കമുണ്ടെന്നാണ് റിപ്പോർട്ടുകൾ.

അഡ്ഇംപാക്ടിന്റെ കണക്കുകൾ പ്രകാരം പ്രൈമറി തിരഞ്ഞെടുപ്പിൽ 165.7 മില്യൺ ഡോളറും പൊതുതിരഞ്ഞെടുപ്പിൽ 407.5 മില്യൺ ഡോളറുമാണ് പരസ്യങ്ങൾക്കായി ചെലവഴിച്ചതും നീക്കിവച്ചതും. 2024ലെ ഒഹായോ സെനറ്റ് തിരഞ്ഞെടുപ്പിൽ രേഖപ്പെടുത്തിയ 542.7 മില്യൺ ഡോളറിന്റെ ചെലവാണ് ടെക്സസ് മറികടന്നത്.

500 മില്യൺ ഡോളർ കടക്കുന്ന രണ്ടാമത്തെ പ്രസിഡന്റ് ഇതര തിരഞ്ഞെടുപ്പാണ് ടെക്സസിലേത്. ഈ വർഷത്തെ ഒഹായോ സെനറ്റ് തിരഞ്ഞെടുപ്പിലും 514.3 മില്യൺ ഡോളറിന്റെ പരസ്യച്ചെലവ് രേഖപ്പെടുത്തിയിട്ടുണ്ട്. 2025-26 തിരഞ്ഞെടുപ്പ് ചക്രത്തിൽ രണ്ട് പ്രസിഡന്റ് ഇതര മത്സരങ്ങൾ 500 മില്യൺ ഡോളർ കടക്കുന്നത് ഇതാദ്യമാണ്.

പൊതുതിരഞ്ഞെടുപ്പിലെ പരസ്യച്ചെലവിൽ റിപ്പബ്ലിക്കൻ പക്ഷം ഡെമോക്രാറ്റുകളെക്കാൾ 140.7 മില്യൺ ഡോളർ അധികം ചെലവഴിച്ചു. 2024ൽ ടെക്സസിൽ റിപ്പബ്ലിക്കൻ ടെഡ് ക്രൂസും ഡെമോക്രാറ്റ് കോളിൻ ആൾറെഡും ഏറ്റുമുട്ടിയപ്പോൾ ആകെ പരസ്യച്ചെലവ് 202.2 മില്യൺ ഡോളറായിരുന്നു. അന്ന് ഡെമോക്രാറ്റുകൾക്കായിരുന്നു 34.1 മില്യൺ ഡോളറിന്റെ ചെലവുമുൻതൂക്കം.

ഓഗസ്റ്റ് പകുതി വരെ പരസ്യരംഗത്ത് ഡെമോക്രാറ്റുകൾക്കായിരുന്നു മുൻതൂക്കം. ജെയിംസ് തലാരിക്കോയും ഡെമോക്രാറ്റ് അനുകൂല സംഘടനകളും 21.4 മില്യൺ ഡോളർ ചെലവഴിച്ചപ്പോൾ റിപ്പബ്ലിക്കൻ പക്ഷം ചെലവഴിച്ചത് 2.5 മില്യൺ ഡോളർ മാത്രം.

എന്നാൽ ഓഗസ്റ്റ് 25ന് ശേഷമുള്ള ആഴ്ചകളിൽ റിപ്പബ്ലിക്കൻ പരസ്യപ്രചാരണം ശക്തമായി. തിരഞ്ഞെടുപ്പ് ആഴ്ച വരെയുള്ള കാലയളവിൽ ഓരോ ആഴ്ചയും ശരാശരി 15.3 മില്യൺ ഡോളർ അധികം റിപ്പബ്ലിക്കൻമാർ ചെലവഴിച്ചു. സെപ്റ്റംബർ 15ന് ആരംഭിച്ച ആഴ്ചയിൽ മാത്രം ഡെമോക്രാറ്റുകളെക്കാൾ 29.2 മില്യൺ ഡോളർ അധികം ചെലവഴിച്ചു.

റിപ്പബ്ലിക്കൻ അനുകൂല ബാഹ്യസംഘടനകളുടെ വൻ നിക്ഷേപമാണ് ചെലവുകൾ ഉയർത്തിയത്. സെനറ്റ് ലീഡർഷിപ്പ് ഫണ്ടുമായി ബന്ധപ്പെട്ട ടെക്സസ് പിഎസി, കെൻ പാക്സ്റ്റണെ പിന്തുണയ്ക്കാനും തലാരിക്കോയെ ആക്രമിക്കാനുമായി 182.1 മില്യൺ ഡോളർ പരസ്യങ്ങൾക്കായി ചെലവഴിച്ചു. നിലവിലെ തിരഞ്ഞെടുപ്പ് ചക്രത്തിലെ ഏറ്റവും വലിയ പരസ്യദാതാക്കളിൽ എട്ടാം സ്ഥാനത്താണ് ഈ സംഘടന.

പാക്സ്റ്റണിന് അനുകൂലമായി ബാഹ്യസംഘടനകൾ 251.7 മില്യൺ ഡോളറിന്റെ പരസ്യപിന്തുണ നൽകിയപ്പോൾ തലാരിക്കോയ്ക്ക് ലഭിച്ചത് 30.6 മില്യൺ ഡോളറാണ്. ഡെമോക്രാറ്റ് അനുകൂല സംഘടനകളിൽ ലോൺ സ്റ്റാർ റൈസിങ് പിഎസി 14 മില്യൺ ഡോളറും ടെക്സസ് ഫോർഎവർ 7.8 മില്യൺ ഡോളറും ചെലവഴിച്ചു.

അതേസമയം, ന്യൂയോർക്ക് ടൈംസ്-സിയേന സർവകലാശാലയുടെ അവസാന സർവേകളിൽ തലാരിക്കോ 50 ശതമാനം പിന്തുണയോടെ മുന്നിലാണ്. പാക്സ്റ്റണിന് 43 ശതമാനം പിന്തുണയാണ് ലഭിച്ചത്.

1988നുശേഷം ടെക്സസിൽ നിന്ന് ഒരു ഡെമോക്രാറ്റ് പോലും യുഎസ് സെനറ്റിലേക്ക് തിരഞ്ഞെടുക്കപ്പെട്ടിട്ടില്ല. അതിനാൽ നിലവിലെ സർവേ ഫലങ്ങൾ ഡെമോക്രാറ്റുകൾക്ക് നിർണായകമാണ്. സെനറ്റിൽ ഭൂരിപക്ഷം തിരിച്ചുപിടിക്കാൻ നിലവിലെ സീറ്റുകൾ നിലനിർത്തുന്നതിനൊപ്പം റിപ്പബ്ലിക്കൻമാരിൽ നിന്ന് കുറഞ്ഞത് നാല് സീറ്റുകൾ കൂടി നേടണം.

സാമ്പത്തിക പ്രതിസന്ധിയും ജീവിതച്ചെലവിലെ വർധനയും തിരഞ്ഞെടുപ്പിൽ നിർണായക വിഷയങ്ങളാണ്. ഏഴ് പോരാട്ട സംസ്ഥാനങ്ങളിലെ സർവേകളിൽ ജീവിതച്ചെലവ് വിഷയത്തിൽ ഡെമോക്രാറ്റുകൾക്ക് ഒമ്പത് ശതമാനം പോയിന്റിന്റെ മുൻതൂക്കമുണ്ടെന്ന് ന്യൂയോർക്ക് ടൈംസ്-സിയേന സർവേ വ്യക്തമാക്കുന്നു.

ടെക്സസിലെ ഇടക്കാല തിരഞ്ഞെടുപ്പ് പ്രചാരണത്തിന്റെ ആകെ ചെലവ് ഒരു ബില്യൺ ഡോളർ കടക്കുമെന്നാണ് പ്രതീക്ഷ. ഇതിൽ പകുതിയിലധികം തുക സെനറ്റ് മത്സരത്തിനായി ചെലവഴിക്കപ്പെടും.

-