ന്യൂയോര്‍ക്ക്: നഗരത്തിലെ മുനിസിപ്പല്‍ പാര്‍ക്കിംഗ് സ്ഥലങ്ങള്‍ ഐ.സി.ഇ (Immigration and Customs Enforcement) ഏജന്റുമാര്‍ അനധികൃതമായി ഉപയോഗിക്കുന്നത് അവസാനിപ്പിച്ചില്ലെങ്കില്‍ ട്രംപ് ഭരണകൂടത്തിനെതിരെ നിയമനടപടി സ്വീകരിക്കുമെന്ന് ന്യൂയോര്‍ക്ക് സിറ്റി മേയര്‍ സോഹ്‌റാന്‍ മാംദാനി മുന്നറിയിപ്പ് നല്‍കി. ഹോംലാന്‍ഡ് സെക്യൂരിറ്റി സെക്രട്ടറി മാര്‍ക്വെയ്ന്‍ മുള്ളിന് അയച്ച കത്തിലാണ് മേയര്‍ ഈ നിലപാട് വ്യക്തമാക്കിയത്.

ക്വീന്‍സ്, ബ്രോങ്ക്സ് തുടങ്ങിയ സ്ഥലങ്ങളിലെ സിറ്റി ഉടമസ്ഥതയിലുള്ള പാര്‍ക്കിംഗ് കേന്ദ്രങ്ങള്‍ ഫെഡറല്‍ ഇമിഗ്രേഷന്‍ ഏജന്റുമാര്‍ തങ്ങളുടെ പ്രവര്‍ത്തനങ്ങള്‍ക്കായി ഉപയോഗിക്കുന്നത് അനധികൃതമാണെന്നും ഇത് ജനങ്ങളില്‍ ഭീതി പടര്‍ത്തുന്നുവെന്നും മാംദാനി ചൂണ്ടിക്കാട്ടി.

എന്നാല്‍, പൊതു പാര്‍ക്കിംഗ് സ്ഥലങ്ങളിലെ ഐ.സി.ഇ സാന്നിധ്യം ഫെഡറല്‍ നിയമപ്രകാരം പൂര്‍ണ്ണമായും നിയമവിധേയമാണെന്നും തങ്ങളുടെ പ്രവര്‍ത്തനങ്ങള്‍ തുടരുമെന്നും ഹോംലാന്‍ഡ് സെക്യൂരിറ്റി വക്താവ് വ്യക്തമാക്കി.

കഴിഞ്ഞ മാസം ബ്രോങ്ക്സില്‍ വെച്ച് ആയുധധാരിയല്ലാത്ത ഒരു കുടിയേറ്റക്കാരന് നേരെ ഐ.സി.ഇ ഏജന്റുമാര്‍ വെടിവെച്ചതിനെ തുടര്‍ന്ന് മേയറും ഇടതുപക്ഷ രാഷ്ട്രീയ പ്രവര്‍ത്തകരും വലിയ പ്രതിഷേധത്തിലായിരുന്നു. ഇതിനുപിന്നാലെ പാര്‍ക്കുകളിലും മറ്റും ജുഡീഷ്യല്‍ വാറന്റില്ലാതെ എത്തുന്ന ഐ.സി.ഇ ഏജന്റുമാര്‍ക്ക് പ്രവേശനം നിഷേധിക്കാന്‍ പാര്‍ക്ക് ജീവനക്കാര്‍ക്ക് അധികാരം നല്‍കുന്ന പുതിയ നയവും മാംദാനി പ്രഖ്യാപിച്ചിട്ടുണ്ട്.