ഡാളസ് /ബാങ്കോക്ക് (തായ്ലന്‍ഡ്): ചര്‍ച്ച് ഓഫ് ഗോഡ് ഏഷ്യ പസിഫിക് റീജിയന്റെ പുതിയ പ്രസിഡന്റായി ഡാലസില്‍ നിന്നുള്ള ചര്‍ച്ച് ഓഫ് ഗോഡ് ഇന്‍ സൗത്ത് ഇന്ത്യയുടെ പ്രസിഡന്റ് റവ. ജോണ്‍സണ്‍ തരകനെ ഐകകണ്‌ഠ്യേന തെരഞ്ഞെടുത്തു. തായ്ലന്‍ഡില്‍ വച്ച് നടന്ന സംഘടനയുടെ ഏഷ്യ പസിഫിക് റീജിയണല്‍ സമ്മേളനത്തിലാണ് ഈ ചരിത്രപരമായ തീരുമാനം ഉണ്ടായത്. കഴിഞ്ഞ നാല് വര്‍ഷമായി ചര്‍ച്ച് ഓഫ് ഗോഡ് ഏഷ്യ പസിഫിക് റീജിയന്റെ വൈസ് പ്രസിഡന്റായി മികച്ച രീതിയില്‍ സേവനമനുഷ്ഠിച്ചു വരികയായിരുന്നു അദ്ദേഹം. അദ്ദേഹത്തിന്റെ കാര്യക്ഷമമായ നേതൃത്വവും സംഘടനയുടെ വളര്‍ച്ചയ്ക്കായി നല്‍കിയ സംഭാവനകളും പരിഗണിച്ചാണ് ഈ ഉന്നത പദവിയിലേക്ക് ഐക്യകണ്‌ഠ്യേന തെരഞ്ഞെടുത്തത്.

ഏഷ്യ പസിഫിക് മേഖലയിലെ 23 രാജ്യങ്ങളില്‍ നിന്നുള്ള പ്രതിനിധികള്‍ പങ്കെടുത്ത ഉന്നതതല യോഗത്തിലാണ് തെരഞ്ഞെടുപ്പ് പ്രക്രിയ പൂര്‍ത്തിയായത്. റവ. ജോണ്‍സണ്‍ തരകന്റെ നേതൃത്വത്തില്‍ ഏഷ്യ പസിഫിക് മേഖലയിലെ സഭാ പ്രവര്‍ത്തനങ്ങളും ജീവകാരുണ്യ പ്രവര്‍ത്തനങ്ങളും കൂടുതല്‍ ഊര്‍ജ്ജസ്വലമായി മുന്നോട്ട് കൊണ്ടുപോകാന്‍ സാധിക്കുമെന്ന് യോഗത്തില്‍ പങ്കെടുത്ത വിവിധ രാജ്യങ്ങളിലെ പ്രതിനിധികള്‍ പ്രത്യാശ പ്രകടിപ്പിച്ചു.

1997 മുതല്‍ 2004 വരെ ജോണ്‍സണ്‍ ചര്‍ച്ച് ഓഫ് ഗോഡിന്റെ കൗണ്‍സില്‍ അംഗമായി സേവനമനുഷ്ഠിച്ചു. കൗണ്‍സില്‍ അംഗമെന്ന നിലയില്‍ ഈ കാലഘട്ടങ്ങളില്‍, സഭാ ശുശ്രൂഷയും സ്വയം സഹായ പദ്ധതികളും വികസിപ്പിക്കാന്‍ അദ്ദേഹം സഹായിച്ചു. 2006 മുതല്‍ 2012 വരെ ഇന്ത്യയിലെ നാഗ്പൂരില്‍ ചര്‍ച്ച് ഓഫ് ഗോഡ് മിനിസ്ട്രികളുടെ പ്രസിഡന്റായി സേവനമനുഷ്ഠിച്ച അദ്ദേഹം, തുടര്‍ന്ന് 2012 ഒക്ടോബര്‍ 30-ന് ചര്‍ച്ച് ഓഫ് ഗോഡിന്റെ പ്രസിഡന്റായും ഏകകണ്ഠമായി തിരഞ്ഞൈടുക്കപ്പെട്ടിട്ടുണ്ട്. നിയമത്തിലും ശാസ്ത്രത്തിലും ബിരുദാനന്തര ബിരുദത്തിന് പുറമേ, ദിവ്യത്വത്തിലും കലയിലും ബിരുദാനന്തര ബിരുദം നേടിയിട്ടുള്ള അദ്ദേഹത്തിന്റെ ഭാര്യ ലെത മോളും രണ്ട് കുട്ടികളുമടങ്ങുന്നതാണ് കുടുംബം.

ഏഷ്യ പസിഫിക് മേഖലയിലുടനീളം ആരോഗ്യകരമായ സുവിശേഷ പ്രവര്‍ത്തനങ്ങള്‍  നടക്കുന്നുണ്ടെന്ന് ഉറപ്പാക്കുന്നതിനും , വികസിപ്പിക്കുന്നതിനും ഒരുമിച്ച് പ്രവര്‍ത്തിക്കുന്നതിനും  താല്‍പ്പര്യമുള്ള പാസ്റ്റര്‍മാരുടെ ഒരു സംഘത്തെ വളര്‍ത്തിയെടുക്കുക എന്നതിലൂടെ   സഭകളെ ശാക്തീകരിക്കുക എന്നതാണ് അദ്ദേഹത്തിന്റെ പ്രധാന ദര്‍ശനം.