ന്യൂയോർക്ക്: വെസ്റ്റ്ചെസ്റ്റർ കൗണ്ടിയിലെ വോട്ടിംഗ് യന്ത്രങ്ങളിലുണ്ടായ തകരാറുകൾ മൂലം വോട്ടെണ്ണലിൽ കാലതാമസം നേരിട്ട NY-17 ഡിസ്ട്രിക്ട്  തിരഞ്ഞെടുപ്പിൽ, റിപ്പബ്ലിക്കൻ കോൺഗ്രസംഗം  മൈക്ക് ലോലറെ പരാജയപ്പെടുത്തി ഡെമോക്രാറ്റിക് സ്ഥാനാർത്ഥി കെയ്റ്റ് കോൺലി വിജയിച്ചു.

ചൊവ്വാഴ്ച രാത്രി 11 മണിയോടെ പുറത്തുവന്ന കണക്കുകൾ പ്രകാരം കെയ്റ്റ് കോൺലി ഏകദേശം 9% വോട്ടുകൾക്ക് മുന്നിലെത്തിയതോടെ, മൈക്ക് ലോലർ പരാജയം സമ്മതിച്ചു.

ഡെമോക്രാറ്റിക് സ്ഥാനാർത്ഥി കെയ്റ്റ് കോൺലിയെ ഫോണിൽ വിളിച്ച് അഭിനന്ദിച്ചതായി  മൈക്ക് ലോലർ ഇലക്ഷൻ പാർട്ടിയിൽ  പറഞ്ഞത് അമ്പരപ്പിച്ചു. വെസ്റ്റ്ചെസ്റ്റർ കൗണ്ടിയിലെ വോട്ടുകൾ എണ്ണിക്കഴിയുമ്പോൾ കോൺലിയുടെ വിജയം ഉറപ്പാകുമെന്ന് അദ്ദേഹം വ്യക്തമാക്കി.

തന്റെ നാല് വർഷത്തെ ഔദ്യോഗിക കാലയളവിൽ കൈവരിച്ച നേട്ടങ്ങളെക്കുറിച്ച് ഏകദേശം 15 മിനിറ്റോളം സംസാരിച്ച ലോലർ, തന്റെ സ്റ്റാഫിനും  കുടുംബത്തിനും നന്ദി അറിയിച്ചു.  'എന്റെ പ്രവർത്തന നേട്ടങ്ങളിൽ   അഭിമാനിക്കുന്നു,' ലോലർ പറഞ്ഞു. 'തിരഞ്ഞെടുപ്പ് ഫലം എന്തുതന്നെയായാലും, ഈ പദവിയിൽ സേവനമനുഷ്ഠിക്കാൻ അവസരം ലഭിച്ചതിൽ ഞാൻ അങ്ങേയറ്റം നന്ദിയുള്ളവനാണ്.'

വെസ്റ്റ്ചെസ്റ്ററിലെ വോട്ടെണ്ണൽ ഇന്ന് (ബുധൻ) രാവിലെ 11 മണിക്ക് ആരംഭിക്കും 
വെസ്റ്റ്ചെസ്റ്ററിലെ വോട്ടുകളെക്കുറിച്ച് വോട്ടർമാർക്കും കെയ്റ്റ് കോൺലിയുടെ ആസ്ഥാനത്തുണ്ടായിരുന്ന ജനക്കൂട്ടത്തിനുമായി കൗണ്ടി എക്സിക്യൂട്ടീവ് കെൻ ജെൻകിൻസ് ചില കാര്യങ്ങൾ പങ്കുവെച്ചു.

'ഇന്ന് നിങ്ങൾ രേഖപ്പെടുത്തിയ വോട്ടുകളെല്ലാം തീർച്ചയായും കണക്കിലെടുക്കും, ജെൻകിൻസ് പറഞ്ഞപ്പോൾ സദസ്സിൽ നിന്ന് കൈയടികളുയർന്നു. 'അവയെല്ലാം എണ്ണപ്പെടും, എന്നാൽ ഒരുപക്ഷേ നാളെ മാത്രമേ അത് നടക്കൂ,' അദ്ദേഹം പറഞ്ഞപ്പോൾ സദസ്സിൽ നിന്ന് നിരാശ കലർന്ന ശബ്ദങ്ങൾ ഉയർന്നു.

ആദ്യഘട്ട വോട്ടെടുപ്പിൽ (early voting) കോൺലി 70% വോട്ടുകൾ നേടിയെന്നും, പട്ട്നാം, റോക്ക്‌ലാൻഡ്, ഡച്ചസ് കൗണ്ടികളിലെ ആദ്യഘട്ട വോട്ടെടുപ്പിലും അവർ മുന്നിലാണെന്നും ജെൻകിൻസ് ചൂണ്ടിക്കാട്ടി.