വാഷിങ്ടൺ: ഇടക്കാല തിരഞ്ഞെടുപ്പിൽ യുഎസ് ഹൗസിന്റെ നിയന്ത്രണം തിരിച്ചുപിടിച്ച് ഡെമോക്രാറ്റിക് പാർട്ടി. ഇതോടെ ന്യൂയോർക്കിൽ നിന്നുള്ള 56-കാരനായ ഹക്കീം ജെഫ്രീസ് അമേരിക്കൻ   ഹൗസിന്റെ ആദ്യ കറുത്തവർഗക്കാരനായ സ്പീക്കറാകാനുള്ള വഴി തുറന്നു. ജനുവരി മൂന്നിന് പുതിയ കോൺഗ്രസ് ചുമതലയേൽക്കുമ്പോൾ ജെഫ്രീസ് സ്പീക്കറായി തിരഞ്ഞെടുക്കപ്പെടുമെന്നാണ് പ്രതീക്ഷ.

'അമേരിക്കയുടെ വിജയം!' എന്നായിരുന്നു തിരഞ്ഞെടുപ്പ് ഫലങ്ങൾ പുറത്തുവന്നതിനു പിന്നാലെ ജെഫ്രീസ് എക്സിൽ കുറിച്ചത്. എട്ടാം തവണയും ഹൗസിലേക്ക്  തിരഞ്ഞെടുക്കപ്പെട്ട ജെഫ്രീസ് നിലവിൽ ഹൗസ് മൈനോറിറ്റി ലീഡറാണ്. സ്പീക്കർ സ്ഥാനത്തേക്ക് എത്തണമെങ്കിൽ ഹൗസിലെ ഔദ്യോഗിക വോട്ടെടുപ്പിൽ ഭൂരിപക്ഷ പിന്തുണ നേടണം.

ഡെമോക്രാറ്റുകൾക്ക് ഭൂരിപക്ഷം ലഭിച്ചതോടെ പ്രസിഡന്റ് ഡോണൾഡ് ട്രംപിന്റെ ഭരണനയങ്ങളെ ചോദ്യം ചെയ്യാനും ഭരണകൂടത്തിനെതിരെ അന്വേഷണം നടത്താനും പാർട്ടിക്ക് കൂടുതൽ അധികാരം ലഭിക്കും. ഹൗസിലെ വിവിധ മേൽനോട്ട സമിതികളുടെ അന്വേഷണാധികാരവും ഡെമോക്രാറ്റുകൾക്ക് ലഭിക്കും.

ട്രംപ് ഭരണകൂടത്തിന്റെ പ്രവർത്തനങ്ങൾ, കുടിയേറ്റ നയങ്ങൾ, വിദേശനയങ്ങൾ, ഭരണത്തിലെ അഴിമതി ആരോപണങ്ങൾ എന്നിവയിൽ വിശദമായ അന്വേഷണം നടത്താനാണ് ഡെമോക്രാറ്റുകളുടെ നീക്കം. ട്രംപ് കുടുംബവുമായി ബന്ധപ്പെട്ട ആരോപണങ്ങളും എപ്സ്റ്റീൻ രേഖകൾ കൈകാര്യം ചെയ്തതിലെ വീഴ്ചകളും അന്വേഷണ പരിധിയിൽ ഉൾപ്പെടുത്തുമെന്ന് ഓവർസൈറ്റ് കമ്മിറ്റി അധ്യക്ഷനാകുമെന്ന് പ്രതീക്ഷിക്കുന്ന റോബർട്ട് ഗാർസിയ വ്യക്തമാക്കി. 'നിയമോപദേശം തേടിക്കൊള്ളൂ' എന്നായിരുന്നു ഫലം പുറത്തുവന്നതിനു പിന്നാലെ ഗാർസിയയുടെ മുന്നറിയിപ്പ്.

അതേസമയം, പാർട്ടിക്കുള്ളിലെ പുരോഗമനവാദികളും മിതവാദികളും തമ്മിലുള്ള അഭിപ്രായവ്യത്യാസങ്ങൾ കൈകാര്യം ചെയ്യുക ജെഫ്രീസിന് പ്രധാന വെല്ലുവിളിയാകും. ജീവിതച്ചെലവ് കുറയ്ക്കൽ, ആരോഗ്യപരിരക്ഷ, നികുതി ഇളവുകൾ തുടങ്ങിയ വിഷയങ്ങൾക്കൊപ്പം ട്രംപ് ഭരണകൂടത്തിന്റെ നടപടികൾക്ക് ഉത്തരവാദിത്തം ഉറപ്പാക്കുന്നതിനും പുതിയ നേതൃത്വം മുൻഗണന നൽകും.

ഹൗസിനു പുറമെ സെനറ്റിലും ഡെമോക്രാറ്റുകൾ ഭൂരിപക്ഷം 
നേടി. ഇതോടെ കോൺഗ്രസിന്റെ ഇരുസഭകളുടെയും നിയന്ത്രണം റിപ്പബ്ലിക്കൻ പാർട്ടിക്ക് നഷ്ടമാകുന്ന സാഹചര്യമാണ് രൂപപ്പെട്ടിരിക്കുന്നത്. 2027 ജനുവരിയിൽ പുതിയ കോൺഗ്രസ് ചുമതലയേൽക്കുന്നതോടെ ട്രംപ് ഭരണകൂടത്തിന് നിയമനിർമാണത്തിലും ഭരണനയങ്ങളിലും ശക്തമായ പ്രതിപക്ഷത്തെ നേരിടേണ്ടിവരും.