വാഷിങ്ടൺ: ഇന്ത്യക്കെതിരായ പ്രസിഡന്റ് ഡൊണാൾഡ് ട്രംപിന്റെ താരിഫ് നയങ്ങളെ ശക്തമായി വിമർശിച്ച ഡെമോക്രാറ്റിക് നേതാവും ഇന്ത്യൻ അമേരിക്കൻ കോൺഗ്രസ് അംഗവുമായ റോ ഖന്ന ആറാം തവണയും യുഎസ് ഹൗസിലേക്ക്  തിരഞ്ഞെടുക്കപ്പെട്ടു. ഡെമോക്രാറ്റുകൾ ഭൂരിപക്ഷം തിരിച്ചുപിടിച്ച ഹൗസിൽ സിലിക്കൺ വാലിയെ പ്രതിനിധീകരിക്കുന്ന ഖന്നയുടെ തിരിച്ചുവരവ് ശ്രദ്ധേയമായി.

കാലിഫോർണിയയിലെ 17-ാം കോൺഗ്രഷണൽ ഡിസ്ട്രിക്ടിൽ റിപ്പബ്ലിക്കൻ സ്ഥാനാർഥി റിതേഷ് ടണ്ടനെ ഏകദേശം 71 ശതമാനം വോട്ടുകൾ നേടിയാണ് ഖന്ന പരാജയപ്പെടുത്തിയത്. ടണ്ടന് 29 ശതമാനം വോട്ടുകളാണ് ലഭിച്ചത്. പ്രതീക്ഷിക്കുന്ന ആകെ വോട്ടുകളിൽ 44 ശതമാനത്തോളം എണ്ണിക്കഴിഞ്ഞപ്പോഴാണ് ഖന്നയുടെ വിജയം പ്രഖ്യാപിച്ചത്.

കോൺഗ്രഷണൽ ഇന്ത്യ കോക്കസിന്റെയും ഇന്ത്യൻ അമേരിക്കൻ സമൂഹത്തിന്റെയും സഹ അധ്യക്ഷനായ റോ ഖന്ന അമേരിക്ക-ഇന്ത്യ ബന്ധത്തിലെ പ്രശ്നങ്ങളിൽ കഴിഞ്ഞ ഒരു വർഷമായി സജീവമായി ഇടപെട്ടുവരികയാണ്. ഇന്ത്യയിൽനിന്നുള്ള ഉൽപ്പന്നങ്ങൾക്ക് ട്രംപ് ഭരണകൂടം 50 ശതമാനം വരെ താരിഫ് ഏർപ്പെടുത്തിയതിനെതിരെ അദ്ദേഹം ശക്തമായ വിമർശനമുയർത്തിയിരുന്നു.

ഇന്ത്യയുടെ റഷ്യൻ എണ്ണ വാങ്ങലുമായി ബന്ധപ്പെട്ട് 2025 ഓഗസ്റ്റ് ആറിലെ എക്സിക്യൂട്ടീവ് ഉത്തരവിലൂടെ അധികമായി 25 ശതമാനം താരിഫ് കൂടി ഏർപ്പെടുത്തിയതോടെ ഇന്ത്യൻ ഉൽപ്പന്നങ്ങളുടെ തീരുവ 50 ശതമാനമായി ഉയർന്നിരുന്നു. ചൈനയേക്കാൾ ഉയർന്ന തീരുവ ഇന്ത്യയ്ക്ക് ഏർപ്പെടുത്തിയ ട്രംപ്, വ്യക്തിപരമായ വിരോധം ദീർഘകാലമായി നിലനിൽക്കുന്ന അമേരിക്ക-ഇന്ത്യ തന്ത്രപ്രധാന പങ്കാളിത്തത്തിന് മുകളിൽ സ്ഥാപിക്കുകയാണെന്ന് ഖന്ന ആരോപിച്ചിരുന്നു.

'മോഡി തനിക്ക് സമാധാനത്തിനുള്ള നൊബേൽ സമ്മാനം നിർദേശിക്കാത്തതിന്റെ പേരിൽ ട്രംപ് മൂന്നു പതിറ്റാണ്ടത്തെ ഉഭയകക്ഷി പ്രവർത്തനങ്ങളിലൂടെ കെട്ടിപ്പടുത്ത അമേരിക്ക-ഇന്ത്യ തന്ത്രപ്രധാന ബന്ധം തകർക്കുകയാണ്' എന്നായിരുന്നു 2025 സെപ്റ്റംബറിലെ ഖന്നയുടെ വിമർശനം. ട്രംപിനെ പിന്തുണച്ച ഇന്ത്യൻ അമേരിക്കക്കാരും ഇന്ത്യക്കെതിരായ താരിഫ് നടപടികളിൽ പ്രതികരിക്കണമെന്ന് അദ്ദേഹം ആവശ്യപ്പെട്ടിരുന്നു.

2025 ഒക്ടോബർ എട്ടിന് കോൺഗ്രസ് അംഗം ഡെബോറ റോസിനൊപ്പം ഖന്ന 19 ജനപ്രതിനിധികളുടെ ഒപ്പോടെ ട്രംപിന് കത്തയച്ചു. ഇന്ത്യയുമായുള്ള ബന്ധം പുനഃസ്ഥാപിക്കാനും താരിഫ് നടപടികൾ അവസാനിപ്പിക്കാനും കത്തിൽ ആവശ്യപ്പെട്ടിരുന്നു.