ലോസ് ആഞ്ചലസ്: പുതിയ സിനിമയുടെ കഥയും തിരക്കഥയുടെ രൂപരേഖയും തയ്യാറാക്കുന്നതിൽ പ്രതിസന്ധി നേരിടുകയാണെന്ന് പ്രശസ്ത ഹോളിവുഡ് സംവിധായകൻ എം. നൈറ്റ് ശ്യാമളൻ. ഗവേഷണ ചർച്ചകളും ഓൺലൈൻ മീറ്റിങ്ങുകളും ലോസ് ആഞ്ചലസിലേക്കുള്ള യാത്രയുമെല്ലാം എഴുത്തിന്റെ താളം തെറ്റിച്ചതായി അദ്ദേഹം വെളിപ്പെടുത്തി.

ഇൻസ്റ്റഗ്രാമിൽ പങ്കുവച്ച വീഡിയോയിലൂടെയാണ് പുതിയ സിനിമയുടെ സൃഷ്ടിപരമായ പ്രവർത്തനങ്ങൾ നേരിടുന്ന വെല്ലുവിളികളെക്കുറിച്ച് ശ്യാമളൻ തുറന്നുപറഞ്ഞത്. പല ആശയങ്ങളും കുറിപ്പുപുസ്തകത്തിൽ രേഖപ്പെടുത്തിയിട്ടുണ്ടെങ്കിലും അവയെല്ലാം കൂട്ടിച്ചേർത്ത് വ്യക്തമായ ഒരു കഥാരൂപത്തിലേക്ക് എത്തിക്കാൻ കഴിയുന്നില്ലെന്നാണ് അദ്ദേഹത്തിന്റെ വെളിപ്പെടുത്തൽ.

സിനിമയുടെ പശ്ചാത്തലവും വിഷയവുമായി ബന്ധപ്പെട്ട വിവരങ്ങൾ അറിയാവുന്നവരുമായി നിരവധി ഗവേഷണ ചർച്ചകളും സൂം മീറ്റിങ്ങുകളും നടത്തിയിരുന്നു. ഇവ പ്രയോജനകരമായിരുന്നെങ്കിലും സ്വന്തം സർഗാത്മക ചിന്തകളിൽ ശ്രദ്ധ കേന്ദ്രീകരിക്കുന്നതിൽനിന്ന് തന്നെ അകറ്റിയെന്നും അദ്ദേഹം പറഞ്ഞു.

 തന്റെ ‘Remain’ എന്ന ചിത്രം പരിചയപ്പെടുത്തുന്നതിനായി ലോസ് ആഞ്ചലസിൽ നടത്തിയ സന്ദർശനം മികച്ച അനുഭവമായിരുന്നുവെങ്കിലും എഴുത്തിൽ കാര്യമായ പുരോഗതിയുണ്ടാക്കാൻ കഴിഞ്ഞില്ലെന്ന് അദ്ദേഹം സമ്മതിച്ചു.

‘എഴുതാത്തതിന് പല കാരണങ്ങളും നമുക്ക് സ്വയം കണ്ടെത്താനാകും. എന്നാൽ യാഥാർഥ്യം, നമ്മൾ എഴുതുന്നില്ല എന്നതാണ്. അതാണ് പ്രധാനം’ എന്നായിരുന്നു ശ്യാമളന്റെ പ്രതികരണം.

തന്റെ ജീവിതത്തിലെ നേട്ടങ്ങൾക്കും സമ്പാദ്യങ്ങൾക്കും അടിസ്ഥാനം എഴുത്താണെന്നും അതിലേക്ക് തിരിച്ചെത്തേണ്ടതുണ്ടെന്നും അദ്ദേഹം പറഞ്ഞു. പുതിയ സിനിമയുടെ രൂപരേഖ തയ്യാറാക്കുന്നതിൽ ഏറെ പിന്നിലാണെന്ന് സ്വയം വിലയിരുത്തിയ ശ്യാമളൻ, ഈ വർഷാവസാനം വരെ കഥയുടെ രൂപരേഖ പൂർത്തിയാക്കാനും ക്രിസ്മസിനുശേഷം തിരക്കഥ എഴുതിത്തുടങ്ങാനുമാണ് തീരുമാനിച്ചിരിക്കുന്നത്.

രൂപരേഖ തയ്യാറാക്കുന്നത് പൂർണമായി ഉപേക്ഷിച്ചാലോ എന്നുപോലും ആലോചിച്ചിരുന്നുവെന്നും എന്നാൽ വീണ്ടും പരിശ്രമിക്കാൻ തീരുമാനിച്ചെന്നും ഇൻസ്റ്റഗ്രാം കുറിപ്പിൽ അദ്ദേഹം വ്യക്തമാക്കി.

സസ്പെൻസ്, അമാനുഷിക സംഭവങ്ങൾ, അപ്രതീക്ഷിത വഴിത്തിരിവുകൾ എന്നിവയ്ക്ക് പ്രാധാന്യം നൽകുന്ന സിനിമകളിലൂടെ ശ്രദ്ധേയനായ സംവിധായകനാണ് എം. നൈറ്റ് ശ്യാമളൻ. ‘ദ സിക്സ്ത് സെൻസ്’, ‘അൺബ്രേക്കബിൾ’, ‘സൈൻസ്’, ‘സ്പ്ലിറ്റ്’ തുടങ്ങിയ ചിത്രങ്ങൾ അദ്ദേഹത്തിന് അന്താരാഷ്ട്ര പ്രശസ്തി നേടിക്കൊടുത്തു. രണ്ട് ഓസ്കർ നോമിനേഷനുകളും രണ്ട് ബാഫ്റ്റ നോമിനേഷനുകളും ഒരു ഗോൾഡൻ ഗ്ലോബ് നോമിനേഷനും അദ്ദേഹത്തിന് ലഭിച്ചിട്ടുണ്ട്.