ന്യൂയോര്‍ക്ക്: കേരള കള്‍ച്ചറല്‍ അസോസിയേഷന്‍ ഓഫ് നോര്‍ത്ത് അമേരിക്കയുടെ (കെ.സി.എ.എന്‍.എ.) സുവര്‍ണജൂബിലി സമാപനാഘോഷം 2026 നവംബര്‍ 14 ശനിയാഴ്ച വൈകിട്ട് നാലുമുതല്‍ എല്‍മോണ്ടിലെ സെന്റ് വിന്‍സന്റ് ഡി പോള്‍ സ്‌കൂള്‍ ഓഡിറ്റോറിയത്തില്‍ നടക്കും. പൊതുസമ്മേളനവും വൈവിധ്യമാര്‍ന്ന കലാസാംസ്‌കാരിക പരിപാടികളും ഉള്‍പ്പെടുത്തി ഒരുക്കുന്ന ആഘോഷത്തിന്റെ വേദി 1500 De Paul Street, Elmont, NY 11003 ആണ്.

1976-ല്‍ സ്ഥാപിതമായ കെ.സി.എ.എന്‍.എ., കഴിഞ്ഞ അമ്പതുവര്‍ഷമായി ന്യൂയോര്‍ക്ക് നഗരത്തിലും പരിസരപ്രദേശങ്ങളിലും മലയാളികളുടെ സാമൂഹികബന്ധങ്ങള്‍ ശക്തിപ്പെടുത്തുന്നതിനും സാംസ്‌കാരിക പ്രവര്‍ത്തനങ്ങള്‍ക്കും സമൂഹസേവനത്തിനും വേദിയൊരുക്കിവരുന്നു. പ്രവാസജീവിതത്തിനിടയിലും മലയാളഭാഷയോടും കേരളത്തിന്റെ സാംസ്‌കാരിക പൈതൃകത്തോടുമുള്ള ബന്ധം നിലനിര്‍ത്താന്‍ സംഘടനയുടെ കൂട്ടായ്മകളും പരിപാടികളും സഹായകമായിട്ടുണ്ട്.

സംഘടനയുടെ സ്വന്തമായുള്ള കെട്ടിടം ഈ പ്രവര്‍ത്തനങ്ങളുടെ വലിയ കരുത്താണ്. ഒത്തുചേരലുകള്‍ക്കും സാംസ്‌കാരിക പരിപാടികള്‍ക്കും സാമൂഹിക ഇടപെടലുകള്‍ക്കും സ്ഥിരമായ ഇടം നല്‍കുന്ന ഈ ആസ്ഥാനം, തുടര്‍ച്ചയായി പരിപാടികള്‍ സംഘടിപ്പിക്കാന്‍ സംഘടനയെ സഹായിക്കുന്നു. വരുംതലമുറകളെ ഭാഷയോടും പൈതൃകത്തോടും ബന്ധിപ്പിച്ചുകൊണ്ട്, ന്യൂയോര്‍ക്കിലെ മലയാളികളുടെ പ്രധാന സാംസ്‌കാരിക-സാമൂഹിക കേന്ദ്രമായി ഈ ആസ്ഥാനത്തെ കൂടുതല്‍ വികസിപ്പിക്കാനുള്ള സാധ്യതയും സുവര്‍ണജൂബിലി മുന്നോട്ടുവയ്ക്കുന്നു.

ന്യൂയോര്‍ക്ക് സ്റ്റേറ്റ് അസംബ്ലിയിലെ 26-ാം ഡിസ്ട്രിക്ട് അംഗം എഡ്വേര്‍ഡ് സി. ബ്രൗണ്‍സ്റ്റീന്‍ മുഖ്യാതിഥിയായി പങ്കെടുക്കും. നോര്‍ത്ത് ഹെംപ്‌സ്റ്റെഡ് ടൗണ്‍ ക്ലര്‍ക്ക് രാഗിണി ശ്രീവാസ്തവ, നാസൗ കൗണ്ടി ലെജിസ്ലേറ്റര്‍ തോമസ് മക്കെവിറ്റ്, ന്യൂയോര്‍ക്ക് സ്റ്റേറ്റ് കംപ്‌ട്രോളര്‍ ഓഫീസിലെ സ്ട്രാറ്റജിക് പ്ലാനിങ് വിഭാഗം അസിസ്റ്റന്റ് കംപ്‌ട്രോളര്‍ ജോസഫ് ഗലാന്റേ എന്നിവര്‍ വിശിഷ്ടാതിഥികളായിരിക്കും.

വൈകിട്ട് നാലുമുതല്‍ അഞ്ചുവരെ ലഘുഭക്ഷണവും സൗഹൃദസംഗമവും നടക്കും. അഞ്ചുമണിക്ക് ആഘോഷഘോഷയാത്ര ആരംഭിക്കും. തുടര്‍ന്ന് പൊതുസമ്മേളനവും നൂപുര ഡാന്‍സ് സ്‌കൂളിന്റെ നൃത്താവതരണം,  കലാപരിപാടികള്‍ ഉള്‍പ്പെടെയുള്ള സാംസ്‌കാരിക വിനോദപരിപാടികളും അരങ്ങേറും.

സുവനീര്‍ എഡിറ്റര്‍ മാത്യു ജോഷ്വയുടെ നേതൃത്വത്തില്‍ അണിയിച്ചൊരുക്കുന്ന സുവര്‍ണജൂബിലി സ്മരണിക ചടങ്ങില്‍ പ്രകാശനം ചെയ്യും. സംഘടനയുടെ പുതിയ വെബ്സൈറ്റിന്റെ ഉദ്ഘാടനവും ആഘോഷത്തിന്റെ ഭാഗമായിരിക്കും. രാത്രി 8.30-ന് അത്താഴം ഒരുക്കിയിട്ടുണ്ട്.

പ്രസിഡന്റ് റെജി കുര്യന്‍, സെക്രട്ടറി ബാഹുലേയന്‍ രാഘവന്‍, ട്രഷറര്‍ റിനോജ് കോരുത്ത്, വൈസ് പ്രസിഡന്റ് സോസമ്മ ആന്‍ഡ്രൂസ്, ജോയിന്റ് സെക്രട്ടറി ജോബി ജോര്‍ജ്, ജോയിന്റ് ട്രഷറര്‍ ജൂബി ജോസ് എന്നിവരുടെ നേതൃത്വത്തില്‍ എക്‌സിക്യൂട്ടീവ് കമ്മിറ്റി ആഘോഷത്തിന്റെ ഒരുക്കങ്ങള്‍ നടത്തിവരുന്നു.

ജനറല്‍ കണ്‍വീനര്‍ അജിത് കൊച്ചുകുടിയില്‍, സുവനീര്‍ കോര്‍ഡിനേറ്ററും എഡിറ്ററുമായ മാത്യു ജോഷ്വ, ഫിനാന്‍സ് കമ്മിറ്റി കോര്‍ഡിനേറ്റര്‍ ഫിലിപ്പ് മഠത്തില്‍, സാംസ്‌കാരിക പരിപാടികളുടെ കമ്മിറ്റി കോര്‍ഡിനേറ്റര്‍ ശബരിനാഥ് നായര്‍, രാജു ഏബ്രഹാം, ഏബ്രഹാം പുത്തുശ്ശേരി എന്നിവരടങ്ങുന്ന ആറംഗ സുവര്‍ണജൂബിലി കോര്‍ഡിനേഷന്‍ സമിതി സംഘാടനപ്രവര്‍ത്തനങ്ങള്‍ ഏകോപിപ്പിക്കുന്നു. ട്രസ്റ്റി ബോര്‍ഡ് അംഗങ്ങളും വിവിധ സബ് കമ്മിറ്റികളും ഒരുക്കങ്ങളില്‍ പങ്കാളികളാണ്.

അമ്പതുവര്‍ഷത്തെ സേവനപാരമ്പര്യം അടയാളപ്പെടുത്തുന്ന ആഘോഷത്തില്‍ അംഗങ്ങളും കുടുംബങ്ങളും സുഹൃത്തുക്കളും പങ്കെടുക്കണമെന്ന് സംഘാടകര്‍ അഭ്യര്‍ഥിച്ചു. പ്രവേശനം പാസ് മുഖേനയായിരിക്കും.

പാസുകള്‍ക്കും കൂടുതല്‍ വിവരങ്ങള്‍ക്കും പ്രസിഡന്റ് റെജി കുര്യന്‍: 917-975-1690, സെക്രട്ടറി ബാഹുലേയന്‍ രാഘവന്‍: 516-640-9978, ജനറല്‍ കണ്‍വീനര്‍ അജിത് കൊച്ചുകുടിയില്‍: 516-225-2814 എന്നിവരെ ബന്ധപ്പെടാവുന്നതാണ്.

വാര്‍ത്ത നല്‍കുന്നത്:
വര്‍ഗീസ് കോരസണ്‍
പബ്ലിക് റിലേഷന്‍സ് ഓഫീസര്‍
കെ.സി.എ.എന്‍.എ.