അലാസ്ക ഗവർണർ സ്ഥാനവും ഡെമോക്രാറ്റുകൾ ഉറപ്പാക്കി. ജോനാഥൻ ക്രിസ്-ടോംകിൻസ് 50% കടന്ന ഏക സ്ഥാനാർഥി ആയപ്പോൾ 20 വർഷത്തിനു ശേഷം ഡെമോക്രാറ്റുകൾക്കു വിജയം ഉറപ്പായി. സെനറ്റ് മത്സരത്തിൽ വോട്ടെണ്ണി കഴിഞ്ഞില്ലെങ്കിലും ഡെമോക്രാറ്റ് മേരി പെൽടോള സ്ഥിരമായ ലീഡ് നിലനിർത്തുകയാണ്.

സംസ്ഥാന നിയമസഭാ അംഗമായിരുന്ന ക്രിസ്-ടോംകിൻസ്  തോല്പിച്ചത് ബെർണാഡിറ്റെ വിൽ‌സൺ ഉൾപ്പെടെ മൂന്നു  റിപ്പബ്ലിക്കൻ സ്ഥാനാർഥികളെയാണ്. അദ്ദേഹത്തിന് 50.8% ലഭിച്ചപ്പോൾ വിൽസണ് 28.1% ആണ് കിട്ടിയതെന്നു 90% വോട്ട് എണ്ണിക്കഴിഞ്ഞപ്പോൾ വെള്ളിയാഴ്ച്ച രാത്രി ഡിസിഷൻ ഡെസ്ക് പറഞ്ഞു. ക്രിസ്-ടോംകിൻസ് വിജയിച്ചതായി സി എൻ എൻ ടെലിവിഷനും പ്രഖ്യാപിച്ചു.

റാങ്ക്ഡ് ചോയ്സ് റൺ-ഓഫ് ഒഴിവാക്കി അങ്ങിനെ വിജയത്തിലേക്കെത്താൻ ക്രിസ്-ടോംകിൻസിനു കഴിഞ്ഞു. "ഓരോ ചുവടുവയ്‌പിലും ഞങ്ങൾ ഒറ്റ ടീം ആയിരുന്നു," അദ്ദേഹം പറഞ്ഞു. "വിജയിക്കുമെന്നു ഞങ്ങൾ ഉറച്ചു വിശ്വസിച്ചു."  

റിപ്പബ്ലിക്കൻ ഗവർണർ മൈക്ക് ഡൺലേവിക്കു വീണ്ടും മത്സരിക്കാൻ കഴിയാത്തതിനാലാണ് സീറ്റ് ഒഴിവ് വന്നത്. ഡെമോക്രാറ്റിക്‌ പ്രൈമറിയിൽ ജയിച്ച ടോം ബെജിച് പിന്നീട് ക്രിസ്-ടോംകിൻസിനു വഴിമാറുകയായിരുന്നു. 1988നു ശേഷം അലാസ്ക ഗവർണറായ ആദ്യ ഡെമോക്രാറ്റ് പ്രായത്തിലും റെക്കോർഡ് ഇട്ടിട്ടുണ്ട്: 37 വയസിൽ ഏറ്റവും ചെറുപ്പക്കാരനായ ഗവർണർ.

സെനറ്റിലേക്കുള്ള മത്സരത്തിൽ ഏറ്റവും ഒടുവിൽ പെൽടോള 49.84% (138,240 വോട്ട്) നേടിയപ്പോൾ റിപ്പബ്ലിക്കൻ ഡാൻ എസ്. സള്ളിവൻ 46.09% (127,828 വോട്ട്) വരെ മാത്രമേഎത്തിയിട്ടുള്ളൂ. അദ്ദേഹത്തിനു 50% കടക്കാൻ പ്രയാസമാണ് എന്നിരിക്കെ പെൽടോള കടക്കുമോ എന്നതാണ് കാണേണ്ടത്. ഇല്ലെങ്കിൽ റൺ-ഓഫ് ഉണ്ടാവും.  

Democrat flips Alaska governor’s office