
ഹോളിവുഡ് സംവിധായകൻ എം. നൈറ്റ് ശ്യാമളൻ തന്റെ പുതിയ ചിത്രമായ ‘റിമെയ്ൻ’ (Remain) ന്റെ ട്രെയിലർ പുറത്തിറക്കി. പ്രശസ്ത എഴുത്തുകാരൻ നിക്കോളാസ് സ്പാർക്സുമായി ചേർന്ന് വികസിപ്പിച്ചെടുത്ത ആശയമാണ് ചിത്രത്തിന് പിന്നിലെന്നും ഏറെ ആത്മാർഥതയോടെയാണ് സിനിമ ഒരുക്കിയിരിക്കുന്നതെന്നും അദ്ദേഹം പറഞ്ഞു.
ഇൻസ്റ്റഗ്രാമിൽ പങ്കുവച്ച വീഡിയോയിലൂടെയാണ് ശ്യാമളൻ ചിത്രത്തിന്റെ ട്രെയിലറിനെക്കുറിച്ചും നിർമാണരീതിയെക്കുറിച്ചും വിശദീകരിച്ചത്. കേവലം പ്രചാരണത്തിനുള്ള ഒരു ഉപാധി എന്നതിലുപരി സിനിമയുടെ കഥ പ്രേക്ഷകരിലേക്ക് എത്തിക്കുന്നതിന്റെ തുടക്കമാണ് ട്രെയിലറെന്ന് അദ്ദേഹം പറഞ്ഞു.
ചിത്രത്തിന്റെ ദൃശ്യഭംഗിക്ക് പ്രത്യേക പ്രാധാന്യം നൽകിയിട്ടുണ്ടെന്നും 40 വർഷം പഴക്കമുള്ള വിസ്റ്റാവിഷൻ (VistaVision) ക്യാമറകളാണ് ചിത്രീകരണത്തിനായി ഉപയോഗിച്ചതെന്നും അദ്ദേഹം വെളിപ്പെടുത്തി. നാടകാവതരണത്തിന്റെ രീതിയിലാണ് സിനിമയുടെ ചിത്രീകരണം മുന്നോട്ടുകൊണ്ടുപോയത്. ഓരോ രംഗവും മുൻകൂട്ടി സ്റ്റോറിബോർഡ് തയ്യാറാക്കി, അഭിനേതാക്കളുമായി റിഹേഴ്സൽ നടത്തിയ ശേഷമാണ് ചിത്രീകരിച്ചതെന്നും അദ്ദേഹം കൂട്ടിച്ചേർത്തു.
ജെയ്ക്ക്, ഫോബി, ആഷ്ലി വാൾട്ടേഴ്സ് എന്നിവരുൾപ്പെടെയുള്ള അഭിനേതാക്കളുമായി വിശദമായ പരിശീലനം നടത്തിയിരുന്നു. ചിത്രത്തിന്റെ എഡിറ്റിങ് പെൻസിൽവാനിയയിലെ സ്റ്റുഡിയോയിൽ ഒരു വർഷത്തോളം നീണ്ടുനിന്നു. പ്രാദേശികമായും കൈത്തൊഴിൽ മികവോടെയും ഒരുക്കിയ സിനിമയാണിതെന്നും സംവിധായകൻ വ്യക്തമാക്കി.
ചിത്രത്തിന്റെ ഓരോ ഘട്ടത്തിലും മനുഷ്യസ്പർശം നിലനിർത്താനാണ് ശ്രമിച്ചതെന്ന് അദ്ദേഹം അഭിപ്രായപ്പെട്ടു. ട്രെയിലർ കാണുമ്പോൾ ആ ആത്മാർഥത പ്രേക്ഷകർക്ക് അനുഭവപ്പെടുമെന്ന പ്രതീക്ഷയും പങ്കുവച്ചു.
വാർണർ ബ്രദേഴ്സിന്റെ മാർക്കറ്റിങ് ടീമുമായുള്ള അടുത്ത സഹകരണത്തെക്കുറിച്ചും ശ്യാമളൻ ഇൻസ്റ്റഗ്രാം കുറിപ്പിൽ പരാമർശിച്ചു. സിനിമയുടെ ആദ്യ എഡിറ്റിങ് പതിപ്പ് മാസങ്ങൾക്കുമുമ്പ് തന്നെ മാർക്കറ്റിങ് ടീമിനെ കാണിച്ചിരുന്നുവെന്നും കഥയുടെ പ്രധാന ഭാഗങ്ങൾ വെളിപ്പെടുത്താതെ പ്രേക്ഷകർക്ക് ആവശ്യമായ സൂചനകൾ മാത്രം നൽകാനാണ് എല്ലാവരും ചേർന്ന് ശ്രമിക്കുന്നതെന്നും അദ്ദേഹം കുറിച്ചു.