Image

ടെന്നസിയില്‍ റിപ്പബ്ലിക്കന്‍ കോട്ട തകര്‍ത്ത് ഡെമോക്രാറ്റിക് വിജയം; എട്ട് തവണ കോൺഗ്രസ് അംഗമായ സ്‌കോട്ട് ഡെസ്ജാര്‍ലൈസ് തോറ്റു

പി പി ചെറിയാന്‍ Published on 19 November, 2026
ടെന്നസിയില്‍ റിപ്പബ്ലിക്കന്‍ കോട്ട തകര്‍ത്ത് ഡെമോക്രാറ്റിക് വിജയം; എട്ട് തവണ കോൺഗ്രസ് അംഗമായ സ്‌കോട്ട് ഡെസ്ജാര്‍ലൈസ് തോറ്റു

വാഷിംഗ്ടണ്‍: അമേരിക്കന്‍ ഇടക്കാല തിരഞ്ഞെടുപ്പില്‍ ടെന്നസിയിലെ നാലാം കോണ്‍ഗ്രഷണല്‍ ഡിസ്ട്രിക്റ്റില്‍ എട്ട് തവണ റിപ്പബ്ലിക്കന്‍ പ്രതിനിധിയായിരുന്ന സ്‌കോട്ട് ഡെസ്ജാര്‍ലൈസ്, ഡെമോക്രാറ്റിക് സ്ഥാനാര്‍ത്ഥി വിക്ടോറിയ ബ്രോഡറിക്കിനോട് പരാജയം സമ്മതിച്ചു.

റിപ്പബ്ലിക്കന്‍ പാര്‍ട്ടിക്ക് ശക്തമായ സ്വാധീനമുള്ള മണ്ഡലത്തില്‍ കേവലം ഏതാനും നൂറ് വോട്ടുകളുടെ വ്യത്യാസത്തിലാണ് ഡെസ്ജാര്‍ലൈസിന് അടിതെറ്റിയത്. ഇടക്കാല തിരഞ്ഞെടുപ്പില്‍ പല പ്രമുഖ റിപ്പബ്ലിക്കന്‍ നേതാക്കള്‍ക്കും സീറ്റ് നഷ്ടമാകുന്ന തരംഗത്തിന്റെ ഭാഗമായാണ് ഈ തോല്‍വി.

ബ്രോഡറിക്കിന്റെ വിജയത്തോടെ 435 അംഗ ജനപ്രതിനിധി സഭയില്‍  ഡെമോക്രാറ്റുകളുടെ സീറ്റ് നില 256 ആയി ഉയര്‍ന്നു.

ഏകദേശം രണ്ട് ലക്ഷത്തോളം വോട്ടുകള്‍ രേഖപ്പെടുത്തിയ തിരഞ്ഞെടുപ്പില്‍ നേരിയ വ്യത്യാസത്തിലാണ് തനിക്ക് വിജയം നഷ്ടമായതെന്ന് ഫേസ്ബുക്ക് കുറിപ്പിലൂടെ ഡെസ്ജാര്‍ലൈസ് വ്യക്തമാക്കി. വിജയിയായ വിക്ടോറിയ ബ്രോഡറിക്കിനെ അദ്ദേഹം നേരിട്ട് വിളിച്ച് അഭിനന്ദിക്കുകയും, മണ്ഡലത്തിന്റെ വികസന കാര്യങ്ങളില്‍ തുടര്‍ന്നും ശ്രദ്ധയുണ്ടാകണമെന്ന് ആശംസിക്കുകയും ചെയ്തു.

ഈ വര്‍ഷം ആദ്യം റിപ്പബ്ലിക്കന്‍ പാര്‍ട്ടിക്ക് അനുകൂലമായ രീതിയില്‍ മണ്ഡല പുനര്‍നിര്‍ണ്ണയം നടത്തിയിരുന്നെങ്കിലും അത് ഫലം കണ്ടില്ലെന്നാണ് തിരഞ്ഞെടുപ്പ് ഫലം വ്യക്തമാക്കുന്നത്.

 

Join WhatsApp News
മലയാളത്തില്‍ ടൈപ്പ് ചെയ്യാന്‍ ഇവിടെ ക്ലിക്ക് ചെയ്യുക