Image

എൻആർഇ, എൻആർഒ: രണ്ടു പെട്ടികൾ, രണ്ടു നിയമങ്ങൾ (നാട്ടിലെ കണക്ക് 2: സതീഷ് മഠത്തിൽ)

Published on 20 November, 2026
എൻആർഇ, എൻആർഒ: രണ്ടു പെട്ടികൾ, രണ്ടു നിയമങ്ങൾ (നാട്ടിലെ കണക്ക് 2: സതീഷ് മഠത്തിൽ)

അമേരിക്കയിലോ ഗൾഫിലോ ജോലി ചെയ്യുന്ന ഒരു മലയാളിക്കു നാട്ടിൽ സാധാരണ രണ്ട് അക്കൗണ്ടുകൾ വേണം. പേരുകൾ ഒരുപോലെ തോന്നും: എൻആർഇ, എൻആർഒ. പക്ഷേ ഇവ രണ്ടു പെട്ടികളാണ്. ഏതു പണം ഏതു പെട്ടിയിൽ ഇടണം എന്നു തെറ്റിയാൽ പിന്നീടു നികുതിയും കടലാസുപണിയും കൂടും. ബാങ്ക് ശാഖകളിൽ പ്രവാസികുടുംബങ്ങൾ ഏറ്റവും കൂടുതൽ ചോദിക്കുന്ന സംശയങ്ങളിൽ ഒന്നാണിത്.

വിദേശത്തുനിന്നു കൊണ്ടുവരുന്ന പണത്തിന് എൻആർഇ

വിദേശത്തു സമ്പാദിച്ച് ഇന്ത്യയിലേക്ക് അയയ്ക്കുന്ന പണം എൻആർഇ അക്കൗണ്ടിലേക്കാണു പോകേണ്ടത്. ഇതിലെ പണവും പലിശയും എപ്പോൾ വേണമെങ്കിലും തിരികെ വിദേശത്തേക്കു കൊണ്ടുപോകാം. പ്രവാസിയായിരിക്കുന്നിടത്തോളം ഇതിന്റെ പലിശയ്ക്ക് ഇന്ത്യയിൽ ആദായനികുതിയില്ല. പക്ഷേ നിങ്ങൾ താമസിക്കുന്ന രാജ്യത്ത് ആ പലിശ വരുമാനമായി കാണിക്കേണ്ടിവന്നേക്കാം. അമേരിക്കയിലുള്ളവർ ഇക്കാര്യം അവിടത്തെ ടാക്സ് ഉപദേശകനോടു ചോദിക്കണം.

നാട്ടിലെ വരുമാനത്തിന് എൻആർഒ

നാട്ടിലെ വീടിന്റെ വാടക, പെൻഷൻ, ഡിവിഡന്റ്, നാട്ടിലെ സ്വത്തു വിറ്റ പണം: ഇന്ത്യയിൽത്തന്നെ ഉണ്ടാകുന്ന വരുമാനമെല്ലാം എൻആർഒ അക്കൗണ്ടിലാണു വരേണ്ടത്. ഇതിന്റെ പലിശയ്ക്ക് ഇന്ത്യയിൽ നികുതിയുണ്ട്; ബാങ്ക് നികുതി പിടിച്ചിട്ടേ പലിശ തരൂ. ഈ പണം വിദേശത്തേക്കു കൊണ്ടുപോകാം, പക്ഷേ ഒരു സാമ്പത്തികവർഷം പരമാവധി പത്തു ലക്ഷം അമേരിക്കൻ ഡോളർ വരെ മാത്രം, അതും നികുതി അടച്ചെന്നു കാണിക്കുന്ന ഫോമുകളും ചാർട്ടേഡ് അക്കൗണ്ടന്റിന്റെ സാക്ഷ്യപത്രവും സഹിതം. അച്ഛനിൽനിന്നു കിട്ടിയ പഴയ വീടു വിറ്റാൽ ആ പണം സാധാരണ എൻആർഇയിലേക്കു നേരിട്ടു വരില്ല എന്നർഥം.

ഏറ്റവും സാധാരണമായ തെറ്റ്

പ്രവാസിയായിട്ടും പഴയ സാധാരണ സേവിംഗ്സ് അക്കൗണ്ട് അതേപടി തുടരുന്നതാണത്. ഫെമ നിയമമനുസരിച്ചു വിദേശത്തേക്കു താമസം മാറിയാൽ ആ അക്കൗണ്ട് എൻആർഒ ആയി മാറ്റണം. ബാങ്കിനെ അറിയിക്കാത്തതുകൊണ്ടു പലരുടെയും അക്കൗണ്ട് വർഷങ്ങളോളം "റെസിഡന്റ്" ആയി കിടക്കും. പിന്നീടു വലിയ ഒരു ഇടപാടു വരുമ്പോഴാണു പ്രശ്നം പുറത്തുവരിക. നാട്ടിലുള്ള ഏതു ബ്രാഞ്ചിലും ഇപ്പോൾ ഈ മാറ്റം രേഖകൾ സഹിതം അപേക്ഷിച്ചു ചെയ്യാം.

നാട്ടിലുള്ളവരെ ചേർക്കാമോ

എൻആർഇ അക്കൗണ്ടിൽ നാട്ടിലുള്ള അടുത്ത ബന്ധുവിനെ, ഉദാഹരണത്തിന് അമ്മയെ, രണ്ടാമത്തെ പേരുകാരിയായി ചേർക്കാം, "former or survivor" എന്ന രീതിയിൽ. അതായത് നിങ്ങൾ ജീവിച്ചിരിക്കുന്നിടത്തോളം അക്കൗണ്ട് നിങ്ങളുടേതാണ്; അമ്മയ്ക്ക് അതിൽനിന്നു പണം പിൻവലിക്കാൻ പവർ ഓഫ് അറ്റോർണി വേണം. എൻആർഒ അക്കൗണ്ടിൽ നാട്ടിലുള്ള ബന്ധുവിനെ സാധാരണ ജോയിന്റ് ഉടമയായും ചേർക്കാം. ഏതാണു വീട്ടുകാർക്കു സൗകര്യം എന്നു നോക്കി തീരുമാനിക്കുക; രണ്ടിലും നോമിനിയെ ചേർക്കാൻ മറക്കരുത്.

നാട്ടിലേക്കു തിരിച്ചുവരുമ്പോൾ

ജോലി മതിയാക്കി സ്ഥിരമായി തിരികെ വരുമ്പോൾ ബാങ്കിനെ അറിയിക്കണം. എൻആർഇ, എൻആർഒ അക്കൗണ്ടുകൾ സാധാരണ റെസിഡന്റ് അക്കൗണ്ടുകളാക്കി മാറ്റണം. വിദേശ കറൻസിയിൽത്തന്നെ പണം സൂക്ഷിക്കണമെങ്കിൽ ആർഎഫ്സി (റെസിഡന്റ് ഫോറിൻ കറൻസി) അക്കൗണ്ട് എന്നൊരു വഴിയുമുണ്ട്. തിരികെ വന്ന ആദ്യവർഷങ്ങളിലെ നികുതിനിലയ്ക്കു പ്രത്യേക നിയമങ്ങളുള്ളതുകൊണ്ട് ഒരു ടാക്സ് ഉപദേശകനെ കാണുന്നതു നല്ലതാണ്.

ഒറ്റവരിയിൽ: വിദേശത്തെ പണം എൻആർഇയിൽ, നാട്ടിലെ പണം എൻആർഒയിൽ. ഈ ഒരു നിയമം തെറ്റാതിരുന്നാൽ പകുതി തലവേദന ഒഴിവാകും.

(നിയമങ്ങൾ മാറാം; വലിയ ഇടപാടുകൾക്കു മുമ്പു സ്വന്തം ബാങ്കിനോടും ടാക്സ് ഉപദേശകനോടും ഉറപ്പാക്കുക.

സതീഷ് മഠത്തിൽ

(മുൻ സ്റ്റേറ്റ് ബാങ്ക് ഓഫ് ഇന്ത്യ ഉദ്യോഗസ്ഥൻ)

 

Read More: https://www.emalayalee.com/news/385340

 

 

Join WhatsApp News
മലയാളത്തില്‍ ടൈപ്പ് ചെയ്യാന്‍ ഇവിടെ ക്ലിക്ക് ചെയ്യുക