
ലോസ് ഏഞ്ചല്സ്: പ്രശസ്ത ഹോളിവുഡ് സിനിമ-ടെലിവിഷന് താരം ലാറി പോയിന്ഡെക്സ്റ്റര് (Larry Poindexter - 66) അന്തരിച്ചു. ലോസ് ഏഞ്ചല്സിലെ സ്റ്റുഡിയോ സിറ്റിയില് വെച്ച് ഭക്ഷണം വാങ്ങുന്നതിനായി റോഡ് മുറിച്ചുകടക്കുമ്പോള് കാറിടിച്ചാണ് അപകടമുണ്ടായത്. വാരിയെല്ലുകള്ക്ക് ഗുരുതരമായി പരിക്കേറ്റ അദ്ദേഹത്തെ ആശുപത്രിയില് പ്രവേശിപ്പിച്ചെങ്കിലും ശസ്ത്രക്രിയയ്ക്ക് മുന്പ് ബുധനാഴ്ച (നവംബര് 18) അന്ത്യം സംഭവിക്കുകയായിരുന്നു.
ഡാളസില് ജനിച്ച പോയിന്ഡെക്സ്റ്റര് നാല് പതിറ്റാണ്ടോളം സിനിമ-സീരിയല് രംഗത്ത് സജീവമായിരുന്നു. 2003-ല് പുറത്തിറങ്ങിയ പ്രശസ്ത ആക്ഷന് ചിത്രം 'സ്വാറ്റ്' (S.W.A.T.)-ലെ ക്യാപ്റ്റന് തോമസ് ഫുള്ളര് എന്ന കഥാപാത്രം ഏറെ ശ്രദ്ധിക്കപ്പെട്ടിരുന്നു. കൂടാതെ 'ഡേയ്സ് ഓഫ് അവര് ലൈവ്സ്' (Days of Our Lives), 'ജാഗ്' (JAG), 'ഫ്രണ്ട്സ്' (Friends), 'എന്.സി.ഐ.എസ്' (NCIS), 'അമേരിക്കന് നിന്ജ 2' തുടങ്ങിയ നിരവധി ജനപ്രിയ പരമ്പരകളിലും സിനിമകളിലും അദ്ദേഹം വേഷമിട്ടു.

അഭിനയത്തിന് പുറമെ സംഗീത, നാടക രംഗത്തും അദ്ദേഹം വ്യക്തിമുദ്ര പതിപ്പിച്ചിട്ടുണ്ട്. 1990-കളില് 'ദി ഹൈ ലോണ്സം' (The High Lonesome) എന്ന മ്യൂസിക് ബാന്ഡിന്റെ പ്രധാന ഗായകനായിരുന്ന അദ്ദേഹം, ബ്രോഡ്വേ നാടകമായ 'ദി ഷെര് ഷോ'യുടെ നിര്മ്മാതാക്കളില് ഒരാളുമായിരുന്നു. കാസ്റ്റിംഗ് ഡയറക്ടര് കരോള് ക്രിറ്റ്സറാണ് ഭാര്യ. ഇരട്ട ആണ്മക്കളുണ്ട്.