പറയും ഞാനെങ്ങനെ...
പറയും ഞാനെങ്ങനെ നറുനിലാവായെന്നിൽ
നീ നിറഞ്ഞൊരാ മധുരമാം നിശകളെപ്പറ്റി..
പറയും ഞാനെങ്ങനെ നീയില്ലാക്കയത്തിൽ
പിടഞ്ഞു പൊലിയുമെൻ സാധുവാം ജീവനെപ്പറ്റി...?
അറിയുമോ നീ അരുമയായ് മൂളിയ
ഈണങ്ങളൊക്കെയും തേന്മഴയായെന്നിൽ ഉതിർന്നുവെന്ന്..
ചെറുകാറ്റിൽ, ഇലയിളക്കങ്ങളിൽ
ഞാൻ തിരയുകയാണെന്നും നിന്നെയെന്ന്...?
അറിഞ്ഞുവോ നീ, എന്റെ ജാലകപ്പാളികൾ
നിന്റെ വഴിയിലേക്കെന്നും തുറന്നിരുന്നു
നിൻ കാലൊച്ച കാതോർത്തു കാത്തിരിക്കെ
എന്തിനോ കണ്ണുനീരുറവയിട്ടു...
മറക്കുവതെങ്ങിനെ അരുണരേണുക്കളായ്
നീയെന്റെ ജീവൻ ജ്വലിപ്പിച്ച നാളുകളെ..?
മറക്കുവതെങ്ങിനെ ഒരുകുടക്കീഴിൽ നാം
നനയാതെ നനഞ്ഞൊരാ പ്രിയവർഷങ്ങളെ...?
പറയുവതെങ്ങിനെ നീയില്ലാസന്ധ്യകൾ
നിറം മറന്നാകെക്കറുത്തുവെന്ന്...
ഇരുൾവീഴും വീഥിയിൽ മിഴിനട്ടിരിക്കുമ്പോൾ
ഉള്ളിൽ ചെരാതുകളണഞ്ഞുവെന്ന്...?
പറയും ഞാനെങ്ങനെ നറുനിലാവായെന്നിൽ
നീ നിറഞ്ഞൊരാ മധുരമാം നിശകളെപ്പറ്റി..
പറയും ഞാനെങ്ങനെ നീയില്ലാക്കയത്തിൽ
പിടഞ്ഞു പൊലിയുമെൻ സാധുവാം ജീവനെപ്പറ്റി...?