ന്യൂഡല്‍ഹി: പ്രമുഖ ഹിന്ദി എഴുത്തുകാരന്‍ വിനോദ് കുമാര്‍ ശുക്ലയ്ക്ക് 2024 ലെ ജ്ഞാനപീഠം പുരസ്‌കാരം. പ്രതിഭാ റേയുടെ അദ്ധ്യക്ഷതയിലുള്ള സമിതിയാണ് വിനോദ് കുമാര്‍ ശുക്ലയെ പുരസ്‌കാരത്തിനായി തിരഞ്ഞെടുത്തത്. 

കവിത, കഥ, നോവൽ എന്നിവയുള്‍പ്പെടെയുള്ള സാഹിത്യ മേഖലയിലെ ശ്രദ്ധേയ സംഭാവനകളെ പരിഗണിച്ചാണ് പ്രതിഭാ റേയുടെ നേതൃത്വത്തിലുള്ള സമിതി പുരസ്കാരത്തിന് വിനോദ് കുമാർ ശുക്ലയെ തെരഞ്ഞെടുത്തത് . ഛത്തീസ്ഗഡിൽ നിന്നുള്ള ആദ്യ ജ്ഞാനപീഠം ജേതാവായി 88കാരനായ വിനോദ് കുമാർ ശുക്ല മാറിയിരിക്കുകയാണ്. 1999ൽ അദ്ദേഹത്തിന് കേന്ദ്ര സാഹിത്യ അക്കാദമി പുരസ്കാരം ലഭിച്ചിരുന്നു. ലഗ്ഭഗ് ജയ്ഹിന്ദ് ആണ് അദ്ദേഹത്തിന്റെ ആദ്യ കവിതാസമാഹാരം. 

ദീവാര്‍ മേം ഏക് ഖിഡ്കി രഹ്തീ ധീ, നൗക്കര്‍ കി കമീസ്, ഖിലേഗാ തോ ദേഖേംഗെ തുടങ്ങിയ പ്രശസ്ത നോവലുകളും വിനോദ് കുമാര്‍ ശുക്ല രചിച്ചു. 11 ലക്ഷം രൂപയും ഫലകവും അടങ്ങുന്നതാണ് ജ്ഞാനപീഠം പുരസ്‌കാരം.