സെന്റ് ഇഗ്നേഷ്യസ് കത്തീഡ്രലില്‍ വചന ശുശ്രൂഷയും ധ്യാനയോഗവും

Published on 02 August, 2018
സെന്റ് ഇഗ്നേഷ്യസ് കത്തീഡ്രലില്‍ വചന ശുശ്രൂഷയും ധ്യാനയോഗവും
ഡാളസ് സെന്റ് ഇഗ്നേഷ്യസ് മലങ്കര യാക്കോബായ സിറിയക്ക് ക്രിസ്ത്യന്‍ കത്തീഡ്രലില്‍ 2018 ആഗസ്റ്റ് 3, 4, 5 തിയ്യതികളില്‍ (വെള്ളി, ശനി, ഞായര്‍) ഇടുക്കി ഭദ്രാസനാധിപനും, തൂത്തൂട്ടി മോര്‍ ഗ്രിഗോറിയോസ് ധ്യാന കേന്ദ്രം ഡയറക്ടറുമായ അഭിവന്ദ്യ സഖറിയാസ് മാര്‍ പീലക്‌സിനോസ് മെത്രാപോലീത്തായുടെ നേതൃത്വത്തില്‍ വചന ശുശ്രൂഷയും ധ്യാനയോഗവും നടത്തപ്പെടുന്നു.

വെള്ളിയാഴ്ച വൈകീട്ട് 6 മണി മുതല്‍ 9 മണി വരെയും, ശനിയാഴ്ച രാവിലെ 9 മണി മുതല്‍ വൈകീട്ട് 3 മണിവരെയും നടത്തപ്പെടുന്ന ധ്യാനയോഗം ഞായറാഴ്ച വി.കുര്‍ബ്ബാനയോടു കൂടി പര്യവസാനിക്കും.

വിവിധങ്ങളായ പ്രശ്‌നങ്ങളാല്‍ അനുദിനം സങ്കീര്‍ണ്ണമായിക്കൊണ്ടിരിക്കുന്ന ഇന്നത്തെ ജീവിത സാഹചര്യങ്ങളില്‍ ഭയപെടേണ്ട, ഞാന്‍ നിന്നോടു കൂടെയുണ്ട്' എന്ന ക്രിസ്തുവചനത്തില്‍ അടിയുറച്ച് വിശ്വസിച്ച് നല്ലവനായ ദൈവത്തെ രുചിച്ചറിയുവാന്‍ തിരുവചനം നമ്മെ ഓര്‍മ്മിപ്പിക്കുന്നു.

വിശ്വാസികളുടെ ആത്മീയ ഉന്നമനവും ക്രിസ്തീയ കൂട്ടായ്മയും ലക്ഷ്യമാക്കി നടത്തപ്പെടുന്ന ഈ ആത്മീയ വിരുന്നില്‍ വന്ന് സംബന്ധിച്ച് അനുഗ്രഹീതരാകുവാന്‍, എല്ലാ വിശ്വാസികളേയും ഹാര്‍ദ്ദവമായി ക്ഷണിക്കുന്നതായി, വികാരി റവ.ഫാ.യല്‍ദൊ പൈലി അറിയിച്ചു. പള്ളി ഗായകസംഘം ആലപിക്കുന്ന ഭക്തിസാന്ദ്രമായ ഗാനങ്ങള്‍ റിട്രീറ്റിന് കൊഴുപ്പേകും. സെന്റ് ഇഗ്നേഷ്യസ് കത്തീഡ്രല്‍ പി.ആര്‍.ഓ. കറുത്തേടത്ത് ജോര്‍ജ് അറിയിച്ചതാണിത്.


സെന്റ് ഇഗ്നേഷ്യസ് കത്തീഡ്രലില്‍ വചന ശുശ്രൂഷയും ധ്യാനയോഗവും
JOHN 2018-08-02 05:54:22
ധ്യാനം എന്ന് കേൾക്കുമ്പോൾ ഓർക്കുക സമാധാനമായി വളരെവശാന്തമായി ഉള്ള ഒരു പ്രാർത്ഥന അതായത്   മെഡിറ്റേഷൻ. എന്നാൽ ക്രിസ്ത്യൻ ധ്യാന ഗുരുക്കൾ എന്നും പറഞ്ഞു വരുന്ന ഈ ധ്യാന കുറുക്കന്മാർ കാണിക്കുന്നത്  കുറെ ഒച്ചയും ബഹളവും. അവർ എന്നും പറയുന്നത് ഈ കാലഘട്ടത്തിൽ കുടുംബങ്ങൾ തകർച്ചയുടെ വക്കിൽ ആണ്. കര കയറ്റാൻ ദൈവത്തിനു മാത്രമേ കഴിയു. പക്ഷെ ദൈവം നേരിട്ട് ഒരു കേസും എടുക്കില്ല. ഞങ്ങൾ ആണ് മെയിൻ ഏജന്റ് കൗണ്ടറിൽ പണമടച്ചു അഡ്വാൻസ് കൊടുക്കുക ബാക്കി എല്ലാം ഇപ്പൊ ശരിയാക്കിത്തരാം. കാൻസർ ആണ് ഇക്കൂട്ടർ പ്രധാനമായും മാറ്റുന്നത്. അതും ചികിത്സ കഴിയാറായവരുടെ. ഈയിടെ ശാലോം ടി വി സാക്ഷ്യം ഏഴാം മാസം ആയ ഒരു ഗർഭിണിയുടെ പെൺകുഞ്ഞിനെ മാറ്റി ഒരച്ഛൻ ആൺ കുഞ്ഞാക്കി കൊടുത്തു. സ്കാനിങ്ങിൽ പെണ്കഞ്ഞു എന്ന് ശാസ്ത്രം പറഞ്ഞതിനെ ആണ് ആ ധ്യാന കുരു വയറ്റത്ത് കൈ വച്ച് പ്രാർത്ഥിച്ചപ്പോ ആണ്കുഞ്ഞായി മാറിയത്. നോട്ട് ദി പോയിന്റ്. വെള്ള പാണ്ഡു ഒഴികെ ബാക്കി എല്ലാം മാറ്റുന്ന വേറൊരു ആശാൻ എല്ലാ ദിവസ്സവും ടി വി യിൽ സാക്ഷ്യത്തിനു ഇരകളെ കൊണ്ടുവരുന്നു. ഈ വക തട്ടിപ്പുകാർക്ക് എല്ലാവർക്കും തന്നെ ഒരു ഡോക്ടറേറ്റ് കാണാം (ഇരകളെ വീഴ്ത്താൻ ഏതെങ്കിലും ഏതെങ്കിലും നാട്ടിൽ  നിന്നും) ഈ ഉഡായിപ്പെല്ലാം യേശൂവിന്റെ പേരും പറഞ്ഞാണല്ലോ അതുകൊണ്ടു കുഴപ്പമില്ല എന്നതാണ് ഭൂരിപക്ഷം ആളുകളുടെയും മനോഭാവം. അതാണ് ഇക്കൂട്ടരുടെ വളർച്ചക്ക് കാരണം 
മലയാളത്തില്‍ ടൈപ്പ് ചെയ്യാന്‍ ഇവിടെ ക്ലിക്ക് ചെയ്യുക