ഒന്ന് ചിരിക്കാം (കവിത: ജയശ്രീ രാജേഷ് നായര്‍)

ജയശ്രീ രാജേഷ് നായര്‍ Published on 19 January, 2021
 ഒന്ന് ചിരിക്കാം (കവിത: ജയശ്രീ രാജേഷ് നായര്‍)
ഒരു ചിരി മതി 
മൗനത്തിന്‍ നിശാശലഭം
പുറന്തോട്
പൊളിച്ചിറങ്ങാന്‍

ഒരു ചിരി മതി
പിണക്കങ്ങളുടെ
മഞ്ഞുമലകള്‍
ഉരുകിയിറങ്ങാന്‍

ഒരു ചിരി മതി
ദേഷ്യത്തിന്റെ പുകമറ
മഞ്ഞുകണം പോലെ
മാഞ്ഞു പോകാന്‍

ഒരു ചിരി മതി
മറവിയുടെ  ആഴങ്ങളിലെ
പൂക്കാചില്ലകള്‍
പൂത്തു തളിര്‍ക്കാന്‍

ഒരു ചിരി മതി
ഉരുകിയൊലിക്കുന്ന 
അഴലിന്‍ കറുപ്പുകളില്‍
വെളിച്ചം പടരാന്‍

ഒരു ചിരി മതി
കൂടെയുണ്ടെന്ന
സാന്ത്വനത്തിന്‍
കുളിര്‍ക്കാറ്റ് വീശാന്‍

ഒരു ചിരി മതി
അതിജീവനത്തിന്റെ
മുള്‍വഴികളില്‍
നിലാവ് പെയ്യാന്‍

ഒരു ചിരി മതി
സ്‌നേഹത്തിന്റെ
പൂന്തോപ്പില്‍
വസന്തം വിടരാന്‍

ഒരു ചിരിമതി
ഹൃദയങ്ങളുടെ
നിശ്ശബ്ദ ഭാഷകള്‍
വാചാലമാകാന്‍.....

 ഒന്ന് ചിരിക്കാം (കവിത: ജയശ്രീ രാജേഷ് നായര്‍)
മലയാളത്തില്‍ ടൈപ്പ് ചെയ്യാന്‍ ഇവിടെ ക്ലിക്ക് ചെയ്യുക