MediaAppUSA

ജന്മം (കവിത: ദീപ ബിബീഷ് നായര്‍)

ദീപ ബിബീഷ് നായര്‍ (അമ്മു) Published on 03 May, 2021
 ജന്മം (കവിത: ദീപ ബിബീഷ് നായര്‍)

കാലചക്രം കറങ്ങുന്നു പിന്നെയും
വീണ്ടുമണയുന്നു രാപ്പകലുകള്‍
ജനന മരണങ്ങള്‍ കൂടുന്നിവിടെ
മാറുന്നനുക്ഷണം ജീവനൊമ്പരങ്ങള്‍!

യാമങ്ങളില്‍ പാടുന്നതേരാപ്പാടികള്‍
യാത്രതന്‍ കാല്‍പ്പാടുകളിരുളില്‍ മറയുന്നു
കണ്ട കിനാവുള്ളവ്യക്തമാകുന്നു
കാത്തിരുന്നൊരാ കാലമേ, ജന്മമിവിടെ തീരുന്നു

തിരിച്ചറിയാനാകാതെ മാറുന്നു കോലങ്ങള്‍
ദര്‍പ്പണത്തിലൊരു പ്രതിബിംബം കാണവേ
ഭയചകിതരായ് പിന്നിലേയ്ക്കായുന്നു
തിരയുന്നെവിടെയോ പോയകാലത്തെയും

നീരവനീലാകാശമിരുളുന്നിവിടെ
ശുഷ്‌ക താരകങ്ങളകന്നു മാറുന്നു
പിടഞ്ഞു വീഴാനൊരുങ്ങുമീയാംപാറ്റയായ്
വെളിച്ചം തേടിയലയുന്നിവിടെ നാം

കുതിച്ചുപായുന്നൊരശ്വമായ് നമ്മള്‍
അലറുന്നണ്ഡകടാഹം നടുങ്ങുമാറുച്ചത്തില്‍
ലക്ഷ്യമില്ലാതലയുന്നൊടുവിലായ്
തളര്‍ന്നു വീഴുന്നേതോ വഴിവക്കിലും

വേണ്ടിനിയൊരു തിക്കും തിരക്കും
നൈമിഷികമീ ജീവിതം മണ്ണില്‍
അന്തര്‍മുഖരായുള്ളിലൊളിക്കാതെ
ഇന്നിവിടെ ജീവിക്കാം.... ജീവിച്ചു മരിക്കാം....
Kishor kumar 2021-05-03 16:26:09
മനോഹരമായ വരികൾ... ഇന്നിന്റെ നേർകാഴ്ച..നന്നായിട്ടുണ്ട്... 🌹🌹🌹💐💐👌👌
മലയാളത്തില്‍ ടൈപ്പ് ചെയ്യാന്‍ ഇവിടെ ക്ലിക്ക് ചെയ്യുക