MediaAppUSA

വൈധവ്യം ( കവിത : രമണി അമ്മാൾ )

Published on 27 May, 2022
വൈധവ്യം ( കവിത : രമണി അമ്മാൾ )

വിധവയല്ലേയിവളന്നുമിന്നും...?
കഴുത്തിൽ താലിയും
സീമന്ത
സിന്ദൂരവുമണിയുന്ന വിധവ ...!
വെളളയുടുപ്പിച്ച
മോഹങ്ങളെ
പട്ടുടയാടയിൽ
പൊതിയുന്ന വിധവ..!

ഒപ്പമുണ്ടെന്നാലും
നിഴലുപോലെ,
ഒത്തുചേർന്നില്ല
പൊരുത്തമെന്നോ..!
ഒന്നു തൊടാൻപോലും
തോന്നാ മരവിപ്പിൽ
ഒന്നായതില്ലാ
വിധവതന്നെ..!
അഭിനയമറിയാതെ
ഈ രംഗവേദിയിൽ
ആടിത്തിമിർക്കുന്നു വേഷങ്ങളെത്രയോ..
അണിയറയിലും 
നീതി നിഷേധം പെരുകുമ്പോൾ
അപമാനവും പേറി
ഉറയുന്ന വിധവ..!
ചിതയിലോ ചാടാതെ
പുകയുന്നു ദേഹം...
ജനനവും മരണവും
സമശീർഷകം..!
ഒരു വിധവ തന്നിവൾ
അന്നുമിന്നും...!

മലയാളത്തില്‍ ടൈപ്പ് ചെയ്യാന്‍ ഇവിടെ ക്ലിക്ക് ചെയ്യുക