വര്‍ഷങ്ങള്‍ക്കുശേഷം ഇന്ത്യന്‍ നാഷണല്‍ കോണ്‍ഗ്രസില്‍ പ്രസിഡന്റ് സ്ഥാനത്തേക്ക് ജനാധിപത്യ രീതിയില്‍ ഒരു തെരഞ്ഞെടുപ്പ് നടക്കുകയാണ്. 

ഹൈക്കമാന്‍ഡിന് ഔദ്യോഗിക സ്ഥാനാര്‍ത്ഥികള്‍ ഇല്ലെന്നും, നെഹ്‌റു കുടുംബത്തില്‍ നിന്നും ആരുംതന്നെ സ്ഥനാര്‍ത്ഥികള്‍ ഇല്ലെന്നും സോണിയാജിയും രാഹുല്‍ജിയും ആദ്യംതന്നെ ആണയിട്ട് പറഞ്ഞതാണ്. അതു വിശ്വസിച്ച് അവരുടെ തന്നെ ആശീര്‍വാദത്തോടുകൂടി ബഹുമാന്യനായ ശശി തരൂര്‍ പ്രസിഡന്റ് സ്ഥാനത്തേക്ക് മത്സരിക്കാന്‍ തീരുമാനിക്കുന്നു. 

എന്നാല്‍ തങ്ങളുടെ ഒരു 'വിശ്വസ്തനെ' കോണ്‍ഗ്രസ് പ്രസിഡന്റ് പദവിയില്‍ അവരോധിക്കണമെന്നുള്ള ഒരു ഗൂഢലക്ഷ്യം അവര്‍ക്കും അവരുടെ ചില പാദസേവകര്‍ക്കും ഉണ്ടായിരുന്നു എന്ന് ഇപ്പോള്‍ പകല്‍പോലെ വ്യക്തമായിരിക്കുകയാണ്. 

രാജസ്ഥാന്‍ മുഖ്യമന്ത്രി അശോക് ഗാലോട്ടിനെയാണ് അതിനുവേണ്ടി അവര്‍ കണ്ടുവെച്ചത്. ആ പദ്ധതി ചക്ക കുഴയുന്നതുപോലെ നാം കണ്ടതാണല്ലോ! കോണ്‍ഗ്രസിന് ഭരണം കൈവിട്ട് പോകുന്നതുവരെ കാര്യങ്ങള്‍ കൊണ്ടെത്തിച്ചു. കഷ്ടിച്ച് രക്ഷപെട്ടു എന്നു പറഞ്ഞാല്‍ മതിയല്ലോ!

അപ്പോഴും തെരഞ്ഞെടുപ്പ് രംഗത്ത് സജീവമായുള്ള ശശി തരൂരിനെ പരിഗണിക്കുന്ന ഒരു വിഷയമേ വന്നില്ല. ഒരു കോണ്‍ഗ്രസ് പ്രസിഡന്റിനു ആവശ്യമില്ലാത്ത പല ക്വാളിഫിക്കേഷന്‍സും അദ്ദേഹത്തിനുണ്ട്. 

ആവശ്യത്തിലധികം വിദ്യാഭ്യാസം-
ഹിന്ദി, ഇംഗ്ലീഷ്, മലയാളം തുടങ്ങിയ വിവിധ ഭാഷകളിലുള്ള പ്രാവീണ്യം-
മികച്ച പ്രാസംഗികന്‍; ഗ്രന്ഥകര്‍ത്താവ്-
യു.എന്നില്‍ ഉന്നത പദവിയിലിരുന്ന ലോക പരിചയം-
മികച്ച പാര്‍ലമെന്റേറിയന്‍-
ഏതൊരു ആള്‍ക്കൂട്ടത്തിലും തലയെടുപ്പോടുകൂടി ഒറ്റപ്പെട്ട് നില്‍ക്കുന്ന പേഴ്‌സണാലിറ്റി-
നെഹ്‌റു കുടുംബത്തോട് പരിപൂര്‍ണ്ണ വിധേയത്വമില്ലായ്മ- 
പോരേ പൂരം?

തരൂരിനെ നേരിടാന്‍ പ്രാപ്തിയുള്ള ഒരു നേതാവിനെ തേടിയുള്ള അന്വേഷണം ചെന്നവസാനിച്ചത് എണ്‍പത് വയസ് കഴിഞ്ഞ മല്ലാകാര്‍ജ്ജു ഖാര്‍ഗെ എന്നൊരു യുവാവിലാണ്! അതിനു കൊടിപിടിച്ചത് ചുക്കിനും ചുണ്ണാമ്പിനും കൊള്ളാത്ത ആന്റണി എന്ന മറ്റൊരു യുവ നേതാവ്!

അടുത്ത പത്തുവര്‍ഷത്തേയ്‌ക്കെങ്കിലും ഇന്ത്യന്‍ നാഷണല്‍ കോണ്‍ഗ്രസിന്റെ ഭാവി ഈ യുവ നേതാവിന്റെ കൈകളില്‍ ഭദ്രം. ആളു താഴെ തട്ടില്‍ നിന്ന് പടിപടിയായി വളര്‍ന്നുവന്നവനാണ്. 

പോരെങ്കില്‍ ഒന്നാംതരം ഒരു ദളിതനും. 
അധികാരമില്ലാത്ത ഒരു അലങ്കാര പദവി വരുമ്പോള്‍ ഇന്ത്യയിലെ രാഷ്ട്രീയ പാര്‍ട്ടികള്‍ക്ക് വലിയ ദളിത് പ്രേമമാണ്. അവരാകുമ്പോള്‍ വെറും ആജ്ഞാനുവര്‍ത്തികളായി നിന്നുകൊള്ളുമെന്നുള്ള മേലാളന്മാരുടെ ധാര്‍ഷ്ട്യം.

തരൂരിനെ സ്ഥാനാര്‍ത്ഥിത്വത്തെ ഏറ്റവുമധികം എതിര്‍ക്കുന്നത് കേരളത്തില്‍ നിന്നുള്ള നേതാക്കന്മാരാണെന്നുള്ളതാണ് ഏറ്റവും രസാവഹം- ആര്‍ക്കുവേണ്ടിയും വോട്ട് ചോദിക്കരുത് എന്നു ഹൈക്കമാന്‍ഡിന്റെ നിര്‍ദേശമുണ്ടായിട്ടുപോലും, പത്രസമ്മേളനം വിളിച്ചാണ് അവര്‍ തരൂരിനോടുള്ള എതിര്‍പ്പും, ഖാര്‍ഗെയ്ക്കുള്ള പിന്തുണയും അറിയിക്കുന്നത്. ക്യാമറയ്ക്കുമുന്നില്‍ തരൂരിനെ എതിര്‍ത്ത് സംസാരിക്കുമ്പോള്‍, വി.ഡി സതീശന്റേയും, മുരളീധരന്റേയും, രമേശ് ചെന്നിത്തലയുടേയും മുഖത്ത് വിരിയുന്ന ആ പ്രകാശം പരത്തുന്ന ചിരി - ശശി തരൂരിനോടുള്ള അസൂയ അതില്‍ മുഴച്ചുനില്‍ക്കുന്നു. 

കേരളാ നേതാക്കന്മാരുടെ നിലപാട് ഇതാണെങ്കില്‍, അടുത്തുവരുന്ന പാര്‍ലമെന്റ് തെരഞ്ഞെടുപ്പില്‍ അവരെ കാത്തിരിക്കുന്നത് ഒരു 'സര്‍പ്രൈസ്' ആയിരിക്കും. 

'ഓവര്‍സീസ് കോണ്‍ഗ്രസുകാര്‍ക്ക്' മിണ്ടാട്ടമില്ല. പാവങ്ങള്‍ക്ക് ഈ തെരഞ്ഞെടുപ്പ് പ്രക്രിയയില്‍ വലിയ കാര്യമൊന്നുമുണ്ടെന്ന് തോന്നുന്നില്ല. ആര് കോണ്‍ഗ്രസ് പ്രസിഡന്റായാലെന്താ? ഫലം അറിഞ്ഞാലുടനെ നമ്മുടെ ഫോട്ടോ സഹിതം വിജയിയെ അഭിനന്ദിച്ചുകൊണ്ടുള്ള പത്രപ്രസ്താവന ഇറക്കണം. 

തരപ്പെടുമെങ്കില്‍ അധികം താമസിയാതെ ഒരു സ്വീകരണവും സംഘടിപ്പിക്കണം- ഹല്ല പിന്നെ!

****** ****** ****** ****** 

ശശി തരൂര്‍ തോല്‍ക്കണം-
തരൂരിനെപ്പോലെ ഒരു നേതാവിനെ 
ഇന്ത്യന്‍ നാഷണല്‍ കോണ്‍ഗ്രസ്
അര്‍ഹിക്കുന്നില്ല. 

# INDIAN NATIONAL CONGRESS ELECTION