വിണ്ണിലെപ്പൊന്താരകള്
മണ്ണില്വീണതു പോലെയാ
മുറ്റത്തെ കിളിമാവിലല്ലോ
മുല്ലമൊട്ടിന് പുഞ്ചിരി
രാഗദേവനുദിച്ചുയരാന്
കാത്തിരിക്കും കാമിനി
ദേവസുന്ദരി പോലെയല്ലോ
ദീപമായ് പാരിജാതവും
അതിരുതോറും കഥ പറഞ്ഞാ
അഞ്ചിതള്പ്പൂ ചെമ്പരത്തി
അന്നുമിന്നും കന്യയായി
കാത്തിരിപ്പുവതാരെയോ ?
കാതിലോലക്കമ്മലായി
സൂര്യകാന്തിപ്പൈതലായ്
പാതയോരമടക്കിയവളാ
അമ്മിണിപ്പൂ സുന്ദരീ
സുഗന്ധമേറും രാജ്ഞിയായി
പിച്ചകപ്പൂ മലരുകള്
തളിരിലക്കൈത്തുമ്പിലായ്
ഇതള് വിടര്ത്തിവിളിച്ചുവോ ?
രക്തമല്ലികയെന്നു നാമം
ചേര്ത്തുവച്ചൊരു സുന്ദരി
വാടുകില്ലദിനങ്ങളേറെ
നിത്യ യൗവന രാഗിണി
ഒരുമയോടവര് കുഞ്ഞുപൂക്കള്
ഒന്നു ചേര്ന്നൊരു കൂട്ടിലായ്
ചെത്തി പൂത്തൊരുചേലുകണ്ടാല്
നേത്രസുഖമതി സുന്ദരം
കണ്ടിരിക്കാം ചെണ്ടിലായ്
ചുണ്ടിലോളച്ചിരിയുമായ്
പണ്ടു കണ്ടു മറന്നൊരാ
ചെണ്ടുമല്ലിപ്പൂവിനെ
അരളി , ചെമ്പക മലരുകള്
അരികിലെത്തും വണ്ടുകള്
പഴമ കാക്കും പൂക്കളല്ലോ
വനികളില് നിറകതിരുപോല്
പുതുമയോടിന്നോര്ക്കിഡും
പലനിറങ്ങളില് വന്നിതാ
പനിനീര് ചുരത്തും പൂവിനിന്നും
പകരമാകില്ലൊന്നുമേ ....