മലയാളം സൊസൈറ്റിയുടെ 2023, മാര്‍ച്ചുമാസ സൂം മീറ്റിങ്ങ് 12ാം തിയതി വൈകിട്ട് നാലുമണിക്ക് നടത്തപ്പെട്ടു. മലയാളം സൊസൈറ്റിയുടെ പ്രസിഡണ്ട് ജോര്‍ജ് മണ്ണിക്കരോട്ട് ഏവര്‍ക്കും സ്വാഗതം ആശംസിച്ചു. വൈസ് പ്രസിഡണ്ട് ശ്രീമതി പൊന്നുപിള്ള, മലയാളം സൊസൈറ്റിയുടെ സജ്ജീവ അംഗമായ  ജെയിംസ് ചെറുതടത്തിലിന്റെ മകന്‍, മനു ജയിംസിന്റെ അകാലനിര്യാണത്തിലുള്ള അനുശോചനം അറിയ്ക്കുകയുണ്ടായി.

'നാന്‍സിറാണി' എന്ന ചിത്രത്തിന്റെ സംവിധായകനായിരുന്നു മനു ജയിംസ്.   സമ്മേളനത്തിന്റെ മോഡറേറ്ററായി അമേരിക്കന്‍ മലയാളികള്‍ക്ക് സുപരിചിതനായ ഏ. സി ജോര്‍ജ് മീറ്റിങ്ങ് നിയന്ത്രിച്ചു. ശ്രീ. ഗോപിനാഥ പിള്ള അവതരിപ്പിച്ച സൃഷ്ടി എന്ന കവിതയായിരുന്നു ആദ്യ വിഷയം. കവിതയുടെ പശ്ചാത്തലം ഒരു മെഡിക്കല്‍ ഓഫീസിന്റെ മുന്‍മുറിയില്‍ അലങ്കാരവസ്തുവായി വച്ചിട്ടുള്ള പ്ലാസ്റ്റിക്ക് ചെടിയില്‍ ഒരു ദിവസം പൂംകുല കാണാനിടയായ കവിയുടെ ഭാവനയാണ് കവിതയുടെ ഇതിവൃത്തം. 

'ആരുതന്നതാണെനിക്കീയാകാരസൗന്ദര്യ
മാരുതന്നോരു ചാരുരൂപവും വര്‍ണ്ണവും?
ആരാകിലെന്ത് അതപ്പരമാത്മ ചൈതന്യ
മൊന്നെന്നോതിന്നിതെന്‍മനം മൗനമായ്' 

എന്നാരംഭിക്കുന്ന കവിത താത്ത്വികമായ പല ചിന്തകളും കേള്‍വിക്കാരില്‍ ഉണര്‍ത്തുകയുണ്ടായി.  കവിതയെ തുടര്‍ന്ന് റഫിഖ് തറയിലിന്റെ (ക്)നോളഡ്ജ് എന്ന കഥ കഥാകൃത്ത് വായിക്കുകയുണ്ടായി. ജീവിതഗന്ധിയായ കഥ സ്വന്ത ജീവിതത്തിന്റെ ഏടുകളില്‍ നിന്ന് അടര്‍ത്തി എടുത്തതാണോ എന്ന് തോന്നത്തക്ക രീതിയിലായിരുന്നു രചന എന്നത് കഥയുടെ മാറ്റ് കൂട്ടി.

തുടര്‍ന്നുണ്ടായ ചര്‍ച്ചകളില്‍ രാജു തോമസ്, ന്യൂയോര്‍ക്ക്, സ്‌റ്റെനി കളപ്പുരയ്ക്കല്‍, ബോസ്റ്റണ്‍, ജോര്‍ജ് മണ്ണിക്കരോട്ട്, പൊന്നുപിള്ള,     ശാന്തപിള്ള, ഗോപിനാഥപിള്ള റഫിഖ് തറയില്‍,  എ.സി. ജോര്‍ജ്, ജോര്‍ജ് പുത്തന്‍കുരിശ് തുടങ്ങിയവര്‍ സജ്ജീവമായി പങ്കുചേര്‍ന്നു.  ഗോപിനാഥപിള്ളയും, റഫിഖ് തറയിലും കവിതയുടേയും കഥയുടേയും വിലയിരുത്തലുകളെ ശ്രദ്ധയോടെ കേള്‍ക്കുകയും സമുചിതമായ മറുപടി നല്‍കുകയും  ചെയ്യുതു.  ഏകദേശം ആറര മണിയോടെ മീറ്റിങ്ങ് അവസാനിച്ചു. 

https://youtu.be/LVR4XTI-V1w

# Malayalam Society News