ഫോമാ ക്യാപ്പിറ്റൽ റീജിയൻ   'ഫോമാ ക്യാപിറ്റൽ വിശേഷം' എന്ന പേരിൽ പ്രതിമാസ വാർത്താപത്രിക-ആരംഭിക്കുന്നു. സത്യസന്ധമായ  വാർത്തകൾ ശരിയായ സമയത്ത് ഫോമാ അംഗങ്ങളിലേക്കും അംഗ സംഘടനകളിലേക്കുമടക്കം കൂടുതൽ പേരിലേക്ക്  എത്തിക്കാനുദ്ദേശിച്ചാണ് വാർത്താ പത്രികക്ക് തുടക്കമിടുന്നത് .

ഫോമാ ക്യാപ്പിറ്റൽ  റീജിയൻ  കിക്കോഫ് ചടങ്ങിൽ , പ്രസിഡന്റ് ഡോ.ജേക്കബ് തോമസ്    'ഫോമാ ക്യാപിറ്റൽ വിശേഷം'    ന്യൂസ് ലെറ്ററിന്റെ ആദ്യ വാല്യം ഉദ്ഘാടനം ചെയ്തു.  പ്രതിമാസ പ്രസിദ്ധീകരണം എന്ന നിലയിൽ ആരംഭിക്കുന്ന ന്യൂസ് ലെറ്റർ വാട്സ് ആപ്പ്  ഗ്രൂപ്പുകളിലൂടെയും  സോഷ്യൽ മീഡിയയിലൂടെയും ആളുകളിലെത്തിക്കും .

ബിസിനസുകാർക്കും സ്പോൺസർമാർക്കും പരസ്യങ്ങളിലൂടെയും മറ്റും ഫോമാ കമ്മ്യൂണിറ്റിയിലേക്ക് എത്തിച്ചേരുന്നതിന്  ഫോമാ ക്യാപിറ്റൽ വിശേഷം  സഹായിക്കും. കമ്മ്യൂണിറ്റി സേവനങ്ങളെയും  കുടുംബങ്ങൾക്കും കുട്ടികൾക്കുമായുള്ള  വിവിധ പദ്ധതികളെയും   പിന്തുണയ്ക്കുന്നതിനുള്ള സ്പോൺസർഷിപ്പും ധനസമാഹരണവും വർദ്ധിപ്പിക്കുന്നതിന് ഈ വാർത്താ പത്രിക  സഹായമാകും . ശരിയായ ആശയവിനിമയം ഏതൊരു സംഘടനയുടെയും അംഗങ്ങൾക്കിടയിൽ  പരസ്പര ബന്ധത്തിനും വികസനത്തിനും  സഹായിക്കുന്നു എന്ന ആശയമാണ് വാർത്താ പത്രിക തുടങ്ങുന്നതിന് പിന്നിൽ.