Image

രാത്രി( കവിത: ദീപ ബിബീഷ് നായര്‍)

ദീപ ബിബീഷ് നായര്‍ Published on 31 May, 2023
രാത്രി( കവിത: ദീപ ബിബീഷ് നായര്‍)

മണ്‍ചിരാതിന്‍ പ്രഭ തൂകിയാ താരങ്ങ -
ളൊന്നായ് വിരിഞ്ഞൊരാ പൗര്‍ണ്ണമിയില്‍

മെല്ലെ മയങ്ങി ഞാനല്ലോ കിനാവുമായ്
മൗന സംഗീതത്തിന്നീരടിയില്‍

നിശയിലുണരുവാന്‍ വാടിയില്‍ പൂക്കളോ
നിമിഷങ്ങളെണ്ണിയും കാത്തിരിക്കേ

വിരിയാന്‍ തുടങ്ങുമാ മുല്ലയും സൗരഭ്യ -
മൊരു ചെറു കാറ്റിലൊഴുക്കിയല്ലോ

ചിറകടിച്ചല്ലോ പറന്നു നിശാപ്പക്ഷി
പതിവെന്നപോലെയൊരാല്‍ മരത്തില്‍

എങ്ങും നിശബ്ദമിന്നല്ലോ വിമൂകമീ 
രാവിന്‍ മടിയിലെനിയ്ക്കലിയാന്‍

കനവുകളെത്തിയെന്‍ മനസിനെയാ -
ശ്യാമ രജനിയില്‍ മെല്ലെത്തഴുകിടുമ്പോള്‍

മതിവരുവോളമെനിക്കൊന്നുറങ്ങണം
മടിയിലായമ്മ തന്‍ പൈതലായി

Join WhatsApp News
Shanima 2024-02-09 02:21:21
I like it. Beautiful poem.
മലയാളത്തില്‍ ടൈപ്പ് ചെയ്യാന്‍ ഇവിടെ ക്ലിക്ക് ചെയ്യുക