പിതൃദിനചിന്തകള്‍ (എല്‍സി യോഹന്നാന്‍ ശങ്കരത്തില്‍, ന്യൂയോര്‍ക്ക്)

പതിവു തെറ്റിക്കാതെ 'ഫാദേഴ്‌സ് ഡേ'യിതാ
പടിവാതില്‍ക്കല്‍ വന്നെത്തി സാഘോഷമായ്
പിതാവില്ലാത്തവര്‍ക്കെന്തു പിതൃദിനം ?
പതിയില്ലാത്തവര്‍ക്കിതു ദുഃഖാര്‍ദ്രവും.

മല്‍പ്രാണനാഥന്‍ കടന്നുപോയ് ജീവിത
തമ്പുരുനാദം നിലച്ചു നിശ്ശബ്ദമായ്
ജീവിതത്തിന്റെ പ്രഭാവമിന്നില്ലാതായ്
ജീവിതവീഥിയില്‍ കൂരിരുളേറുന്നു,
ഓര്‍മ്മകള്‍ പിന്നിലേക്കൊന്നു പായിക്കവേ
കര്‍മ്മ നിരതമായ് അഞ്ചുദശാബ്ദങ്ങള്‍
കമ്രകാന്തിയോടെ വൈവാഹ്യ വീഥിയില്‍,
ഉത്സവപൂരിതം വാണു ദിവാനിശം
രാജ്ഞിയെപ്പോലെ ഞാന്‍ ജീവിച്ചാനാളുകള്‍
രാജകമായിരുന്നെന്നും മല്‍ പാര്‍പ്പിടം
ജീവിക്കാന്‍ സ്വപ്നങ്ങളുണ്‍ടെങ്കില്‍ മുന്നോട്ടു
ജീവിക്കാന്‍ ത്വരയുണ്‍ടു മാനവനെന്നും
എന്നും ഞാനാര്‍ത്തിയില്‍ വാരിപ്പുണര്‍ന്നൊരാ
സുന്ദരസ്വപ്നമാണെന്നുമീ 'ഫാദേഴ്‌സ് ഡേ',
വംശവൃക്ഷത്തിന്റെ വിത്തായ താതന്‍ താന്‍
വംശം നിലനിര്‍ത്തും കണ്ണികള്‍ കോര്‍ക്കുവോര്‍,

വൈധവ്യം നല്‍കിയൊരേകാന്തതീരത്തു
സാധു ഞാനീ ദുഃഖവഹ്നിയില്‍ തപ്തയായ്,

ഈശ്വരന്‍ നല്‍കുന്നതേതും വഹിക്കുവാന്‍
ഈശ്വരപാദത്തിലര്‍ത്ഥിയായ് നിന്നിതേന്‍.
. . . . . . . . . . . . . . . . . . ; .
ആത്മാവനന്തമായ് ജീവിപ്പു ചിന്തിപ്പേന്‍,
വിണ്ടലം വിട്ടവരെങ്ങാണു വാസമോ?
വിണ്ണിലോ ദേവസവിധത്തിലാകുമോ?
മാതൃഗര്‍ഭത്തിലെ വാസം നാം ഓര്‍ക്കുമോ?
മൃത്യുവിന്നപ്പുറത്തോര്‍ക്കുമോ ഭൂവാസം?
ജീവിതം തീര്‍ന്നുപോം, ദേഹം നശിച്ചുപോം
ഭൂവില്‍ നാം നേടിയതൊക്കെ വിട്ടീടണം
മര്‍ത്യന്നു കൂട്ടായിട്ടൊന്നുണ്ടനന്തമായ്
സത്ക്കൃതം മാത്രമാണാത്മാവിന്‍ സമ്പത്തായ്.
ഇല്ലെനി ക്കാശംസ യോതുവാനീ ദിനം ശ്ല
ഇല്ല പിതൃദിന ഭാവുകമെന്‍ ഹൃത്തില്‍!
സല്‍ക്കൃതരായ പിതാക്കളേ, നിങ്ങള്‍ക്ക്
സന്തോഷ സുന്ദര സുദിനം നേരുന്നേന്‍ !

Facebook Comments

Comments

Vayanakkaran 2023-06-16 02:07:12

വ്യർത്ഥമാം ചിന്തയിൽ കാലം കഴിക്കുമീ മർത്യനു മൃതിയാൽ വേർപെടും ദേഹി തൻ ഗേഹത്തെ അറിയുമോ പറയുന്നു ജ്ഞാനികൾക്കു ജ്ഞാനിയായവൻ വാക്കുകൾ ഹാ മായ, മായ, സകലവും മായയത്രേ. പിന്നെയും എന്തിനു ശങ്കിക്ക വേണമോ?

G. Puthenkurish 2023-06-16 13:17:33

മരണം സൃഷ്ടിക്കുന്ന ശൂന്യത ആർക്കും നികത്താവുന്നതല്ല. (ജെയിംസ് ചിറത്തടത്തിൽ അദ്ദേഹത്തിൻറെ വാക്കുകൾ ഏക മകൻ മരിച്ചപ്പോൾ) പക്ഷെ ആ ശൂന്യതയുടെ നടുവിൽ ഇതുപോലെ കവിത എഴുതാൻ കഴിയുമ്പോൾ, അത് സ്വന്തം ആശ്വാസത്തിനും മറ്റുള്ളവരുടെ ആശ്വാസത്തിനും ഉതകുമ്പോൾ ആ ശൂന്യത അല്പമെങ്കിലും ഇല്ലാതാകുന്നു. 'നീ കൊടുക്കാൻ തയ്യാറാകുമ്പോൾ നേടും' എന്ന ആപ്‌തവാക്യം ഇവിടെ പ്രായോഗികമാകുന്നു. ഈ പിതൃദിനത്തിൽ ശൂന്യത അനുഭവിക്കുന്ന അനേകർ നമ്മൾക്ക് ചുറ്റും ഉണ്ടല്ലോ! അതെ, സ്വപ്‌നങ്ങൾ ഇല്ലാതെ ഒരു ദിവസവും മുന്നോട്ട് പോകുവാൻ കഴിയുകയില്ല . ഭർത്താവും ഏക മകനും നഷ്ടപ്പെട്ട എന്റെ സഹോദരി, കൊച്ചുമക്കളുടെ വളർച്ച സ്വപ്നം കണ്ടു ജീവിക്കുന്നു. നൊമ്പരങ്ങളിൽ വിരിയുന്ന കവിതകൾ സ്വന്തം വേദനയെ ശമിപ്പിക്കുന്നതോടൊപ്പം മറ്റുള്ളവർക്കും ആശ്വാസകരമായി തീരുന്നു . അപര്യപ്‌തമായ എന്റെ വാക്കുകളാൽ കവയിത്രീക്ക് എല്ലാവിധ ആശംസകളും.

Jayan varghese 2023-06-16 14:18:43

വിരഹങ്ങൾക്ക് വിരുന്നൊരുക്കാൻ വിധിക്കപ്പെടുന്ന ജീവിതം. പറന്നകലുന്ന പ്രിയതകളുടെ ഓർമ്മപ്പൂവുകൾ ചൂടി കാലത്തിന്റെ ഒറ്റയടിപ്പാതയിലൂടെ ഏകാന്തമായ അനിവാര്യ പ്രയാണം. അകലെ അവശേഷിക്കുന്ന നമ്മുടെ മൈൽക്കുറ്റിയെ പുണരാനുള്ള അദമ്യമായ ആവേശം. എന്താണ് ജിവിതം , എന്തിനാണ് ജീവിതം എന്ന് ചക്രവർത്തിയെക്കൊണ്ടും യാചകനെക്കൊണ്ടും സ്വയം ചോദിപ്പിക്കുന്ന സാഹചര്യ സംവിധാനങ്ങൾ. ഒന്നേ ആശ്വസിക്കാനുള്ളു: നാം അവശേഷിപ്പിക്കുന്ന കാൽപ്പാടുകളാവുന്ന നമ്മുടെ തലമുറകൾ. മനുഷ്യ വർഗ്ഗ മഹാ വൃക്ഷത്തിൽ നിന്ന് നാം എന്ന പഴുത്ത ഇലകൾ കൊഴിയുമ്പോഴും നാം നൽകിയ ഊർജ്ജം സ്വീകരിച്ചു കോണ്ട് കുരുന്നുകൾ വിരിയുന്നുണ്ട്, അവരിലൂടെ നാം ജീവിക്കുന്നുണ്ട് എന്ന കുളിർമഴ! - അതല്ലേ ആനന്ദം ? അതല്ലേ സ്വർഗ്ഗം? കവിയത്രിയുടെ ഞാൻ വായിച്ച കവിതകളിൽ ഏറ്റവും മനോഹരം എന്ന് സാക്ഷ്യപ്പെടുത്തിക്കൊണ്ട് അഭിവാദനങ്ങൾ അർപ്പിക്കുന്നു! ജയൻ വർഗീസ്.

Elcy Yohannan 2023-06-16 16:29:24

Thanks a lot my loving friends - Vayanakkaran, G Puthenkurish, Jayan Varghese... for your lovely encouraging comments, when a poem oozes out of your heart, no artificiality in it, voice of your soul only. Rgds, EY.

Sudhir Panikkaveetil 2023-06-16 17:23:18

പ്രിയപ്പെട്ടവരെക്കുറിച്ചു എത്ര എഴുതിയാലും മഷി ഉണങ്ങാത്ത പേനയുള്ള കവയിത്രി. ഹൃദയത്തിന്റെ ഭാഷ വശമുള്ള ഇവരുടെ വരികളിൽ സ്നേഹം വഴിഞ്ഞൊഴുകുന്നു. പിതാവിനെയും ഭർത്താവിനെയും ഓർത്തുകൊണ്ട് രചിച്ച ഈ കവിതയിൽ വിഷാദത്തിന്റെ നേരിയ തേങ്ങൽ കേൾക്കുമ്പോഴും ഈശ്വരപാദത്തിൽ അർത്ഥിയായി നിൽക്കുന്ന വിശ്വാസത്തിന്റെ ശക്തി അവർ അനുഭവിക്കുന്നതായി കാണാം. എല്ലാ പിതാക്കൾക്കും സുന്ദര സുദിനം നേരുന്ന ഈ കവിത അവർക്കെല്ലാം സ്നേഹമസൃണമായ ഒരു തലോടലാണ്. കവയിത്രിക്ക് അഭിനന്ദനങ്ങൾ

Mary mathew 2023-06-17 18:50:09

Great poem Memories haunding Father’s Day wishes .

പിതൃദിനചിന്തകള്‍ (എല്‍സി യോഹന്നാന്‍ ശങ്കരത്തില്‍, ന്യൂയോര്‍ക്ക്)

PATHRANGAL

US WEBSITES

EMalayalee Available in MediaAppUSA