(നാളെ, ശനി)  ന്യു യോർക്കിൽ യു.എന്നിന് മുന്നിൽ പ്രതിഷേധ റാലി)

ഇന്ത്യയിലെ മണിപ്പൂർ എന്ന സംസ്ഥാനം ഏകദേശം മൂന്ന് മാസമായി അഗ്നിക്കിരയായിക്കൊണ്ടിരിക്കുകയാണ്. ഏറ്റവും പുതിയ വാർത്താ റിപ്പോർട്ടുകൾ അനുസരിച്ച്, നൂറ്റിനാല്പതോ അതിലധികമോ ആളുകൾ കൊല്ലപ്പെടുകയും, അമ്പതിനായിരത്തിലേറെ ആളുകൾക്ക്  തങ്ങൾ  താമസിച്ചിരുന്ന വീടുകൾ  നഷ്ടപ്പെടുകയും ചെയ്തു. പലരും കാടുകളിൽ അഭയം പ്രാപിച്ചിരിക്കുകയാണ്. 317 പള്ളികൾക്ക്  അക്രമികൾ തീ വച്ചു, 6137 വീടുകളും  കത്തിച്ച്‌ ചാമ്പലാക്കി.  

നമ്മുടെ കൺമുന്നിൽ അരങ്ങേറിക്കൊണ്ടിരിക്കുന്ന ഭീമാകാരമായ മനുഷ്യ ദുരന്തമാണ് ഇതെന്ന് പകൽ പോലെ വ്യക്തമായിട്ടും, സംസ്ഥാനത്തിലോ കേന്ദ്രത്തിലോ ഉള്ള അധികാര കേന്ദ്രങ്ങൾ ഇതിനൊരു പരിഹാരം കണ്ടെത്തുന്ന തരത്തിലുള്ള സമീപനമെടുക്കാൻ താല്പര്യപ്പെടുന്നില്ലെന്ന് തോന്നുന്നു.

ഇന്ത്യയിലെ 'ഗോഡി' മാധ്യമങ്ങൾ ഇത് രണ്ട് വംശീയ  വിഭാഗങ്ങൾ തമ്മിലുള്ള മത്സരമാക്കി ചിത്രീകരിക്കുമ്പോൾ, ചില രാഷ്ട്രീയ നിരീക്ഷകർ  ഇത് പലപ്പോഴും സംഭവിക്കാറുള്ള  ഗോത്രവർഗ സംഘട്ടനം മാത്രമാണെന്ന് നിസാരമട്ടിൽ  തള്ളിക്കളയുന്നു. വംശീയ ഉന്മൂലനം ലക്ഷ്യംവച്ച് പഴുതടച്ച് ആസൂത്രണവും രൂപകല്പനയും   ചെയ്ത  ഗോത്രവർഗ്ഗക്കാർ തമ്മിലുള്ള ഭയാനകമായ ഈ ആക്രമണത്തിന്റെ മാരക പ്രത്യാഘാതം, മേയ് 3 മുതൽ കുക്കി-സോമി വിഭാഗക്കാരാണ് അനുഭവിക്കുന്നത് എന്ന കാര്യത്തിൽ സംശയമില്ല.

മണിപ്പൂരിലെ ജനസംഖ്യയുടെ ഏകദേശം 16 ശതമാനം കുക്കി-സോമികളും, പ്രധാനമായും ഹിന്ദുക്കൾ ഉൾപ്പെടുന്ന മെയ്തികൾ 53 ശതമാനവും വരും. നിലവിലെ ഈ കലാപത്തിന്  മതപരമായ കാരണമുണ്ടോ എന്നതിനെക്കുറിച്ചുള്ള ചർച്ചകൾ സജീവമാണ്! ഭൂരിഭാഗം വരുന്ന പട്ടികവർഗക്കാരുടെ (കൂടുതലും ക്രിസ്ത്യാനികൾ) ഭൂമിയുടെ അവകാശത്തിന്റെ പേരുപറഞ്ഞ് ഹിന്ദു ഭൂരിപക്ഷത്തെ ശാക്തീകരിക്കാനുള്ള സംസ്ഥാന ഗവൺമെന്റിന്റെ ശ്രമമാണ് ഇതിന് തിരി കൊളുത്തിയതെന്ന് നിസംശയം പറയാം. ആ ലക്ഷ്യം നേടാനായി മെയ്തി ട്രൈബ് യൂണിയൻ അംഗങ്ങൾ ഹൈക്കോടതിയിൽ സമർപ്പിച്ച ഒരു റിട്ട് പെറ്റീഷന് മെയ്തികൾക്ക് അനുകൂലമായി ഒരു വിധി വന്നു. ഇതാണ് നിലവിലെ കുഴപ്പങ്ങൾക്ക്  കാരണമായത്.  

വിവിധ സംസ്ഥാനങ്ങളിൽ ബിജെപി സർക്കാർ ഇത്തരം ആദിവാസി വിരുദ്ധ നയങ്ങൾ കൂടുതൽ കൂടുതൽ നടപ്പിലാക്കുന്നു. ഇന്ത്യയിലുടനീളമുള്ള തദ്ദേശീയരെയും ഗോത്രവർഗക്കാരെയും ദ്രോഹിച്ചുകൊണ്ട് കുത്തക മുതലാളിമാരെ പിന്തുണയ്ക്കാൻ നടത്തിയ വിനാശകരമായ പ്രവർത്തികൾക്ക് ഇരയായ വ്യക്തിയാണ് ഫാ. സ്റ്റാൻ സ്വാമിയെന്ന് എല്ലാവർക്കും അറിയാം.

ആക്രമണങ്ങൾ മുൻകൂട്ടി ആലോചിച്ച് നന്നായി ആസൂത്രണം ചെയ്തതാണ് എന്നുവേണം കരുതാൻ. ന്യൂനപക്ഷ വിഭാഗങ്ങളുടെ വീടുകൾ തിരഞ്ഞുപിടിച്ച് കത്തിക്കുകയായിരുന്നെന്ന് റിപ്പോർട്ടുകൾ സൂക്ഷ്മമായി പരിശോധിച്ചാൽ വ്യക്തമാകും. മെയ്തികളിൽപെട്ട  അറമ്പായി തെങ്കോൾ, മെയ്തി ലീപുൺ എന്നീ  ഭീകരവാദികൾക്ക്,  പോലീസിന്റെയും നിയമപാലകരുടെയും പരോക്ഷമായ പിന്തുണയുണ്ട്. മണിപ്പൂരിലെ കലാപം ആരംഭിച്ചതിന് ശേഷം അത്യാധുനിക ആയുധങ്ങൾ ഉൾപ്പെടെ 4000-ത്തിലധികം ആയുധങ്ങൾ സംസ്ഥാനത്തെ വിവിധ സ്ഥലങ്ങളിൽ നിന്ന് കൊള്ളയടിച്ചതായാണ് വിവരം. അക്രമം രൂക്ഷമാക്കുന്നതിൽ ഈ ആയുധങ്ങൾ നിർണായക പങ്ക് വഹിച്ചതായാണ് കണക്കാക്കപ്പെടുന്നത്. മരണത്തിൽ നിന്നും സർവ്വനാശത്തിൽ നിന്നും രക്ഷപ്പെടാൻ വനത്തിലേക്ക് ഓടിപ്പോയ കുക്കി-സോമി അഭയാർത്ഥികൾക്കെതിരെ മോർട്ടാർ ഉപയോഗിച്ചത്, ഈ ഭീകരവാദ  ഗ്രൂപ്പുകളെ സഹായിക്കാൻ ഉയർന്ന തലത്തിലുള്ള ഗൂഢാലോചന നടന്നിട്ടുണ്ടെന്നാണ്  ചൂണ്ടിക്കാണിക്കുന്നത്.

മെയ്തികളിൽ ക്രിസ്ത്യാനികൾ ഉണ്ടെന്നത് ഏവർക്കും അറിയാവുന്ന  വസ്തുതയാണ്. ഇംഫാൽ ആർച്ച് ബിഷപ്പ് ഡൊമിനിക് ലൂമൺ പറയുന്നതനുസരിച്ച്, അക്രമം ആരംഭിച്ച് 36 മണിക്കൂറിനുള്ളിൽ മെയ്തി  ക്രിസ്ത്യാനികളുടെ 249 പള്ളികളാണ് നശിപ്പിക്കപ്പെട്ടത്. കുക്കികളും മെയ്‌തികളും തമ്മിലുള്ള പോരാട്ടത്തിനിടയിൽ, മെയ്തി വിഭാഗം മെയ്തികളുടെ  ഹൃദയഭൂമിയിലെ 249 പള്ളികൾ കത്തിക്കുകയും നശിപ്പിക്കുകയും ചെയ്തത് എന്തുകൊണ്ടാണ് എന്നതാണ് ആശ്ചര്യം! മെയ്തികളുടെ പള്ളികളിൽ തന്നെ ആക്രമണം ഉണ്ടായത് എങ്ങനെയാണ്?  മുമ്പ് ആസൂത്രണം ചെയ്തിട്ടില്ലെങ്കിൽ പള്ളികൾ എവിടെയാണെന്ന് ജനക്കൂട്ടത്തിന് കൃത്യമായി എങ്ങനെ അറിയാം." അദ്ദേഹം ചോദിക്കുന്നു.

അറമ്പായി തെങ്കോൾ, മെയ്തി ലീപുൺ തുടങ്ങിയ ഗ്രൂപ്പുകളുടെ ആവിർഭാവവും  'സനാമഹിസ'ത്തിന്റെ പുനരുജ്ജീവനവുമാണ് ഈ ആക്രമണങ്ങൾക്ക് കാരണമെന്നാണ് അദ്ദേഹത്തിന്റെ വിലയിരുത്തൽ.

 ഈ കലാപത്തിന് പിന്നിൽ വർഗീയത ഇല്ലെന്ന തരത്തിൽ നിക്ഷിപ്ത താൽപ്പര്യങ്ങൾ ഉയർത്തുന്ന സിദ്ധാന്തം തികച്ചും സംശയാസ്പദമാണ്. വടക്കുകിഴക്കൻ സംസ്ഥാനങ്ങളെ ബിജെപി വളരെക്കാലമായി വിമർശിക്കുകയും വിഘടനവാദ പ്രവണതകൾക്ക് മിഷനറിമാർ ഉൾപ്പെടെയുള്ള വിദേശികളെ കുറ്റപ്പെടുത്തുകയും ചെയ്തുവരുന്നതാണ്. ആ സംസ്ഥാനങ്ങളിലെ ജനങ്ങൾ ഹിന്ദുത്വ അജണ്ടയിൽ ആശങ്കാകുലരാണെങ്കിലും, സംസ്ഥാന അധികാരത്തിനും അതിലും പ്രധാനമായി കേന്ദ്ര ഫണ്ടുകൾക്കുവേണ്ടിയും അവർ പാർട്ടിയെ പിന്തുണയ്ക്കാൻ വഴങ്ങി.  2014-ൽ ബിജെപി കേന്ദ്രസർക്കാരിന്റെ നിയന്ത്രണം ഏറ്റെടുത്തതിന് ശേഷം, ഈ സംസ്ഥാനങ്ങളിലെ രാഷ്ട്രീയ നേതാക്കൾ ക്രമേണ ബി.ജെ.പിയിലേക്ക് കൂറുമാറി. ഇപ്പോൾ, നിർണായക തീരുമാനങ്ങൾ എടുക്കുന്നതിൽ ബോധപൂർവമായ അവഗണന നേരിടുന്നതുൾപ്പെടെ  അവർ വലിയ വില കൊടുത്തു തുടങ്ങിയിരിക്കുന്നു.

ബിജെപി യുടെ സമീപകാല ചരിത്രത്തിലേക്ക് കണ്ണോടിച്ചാൽ, മണിപ്പൂരിൽ ആദ്യം അധികാരം പിടിച്ചെടുത്തതും പിന്നീട് സംസ്ഥാനത്ത്  അശാന്തിയും അക്രമവും അഴിച്ചുവിട്ടതും ബിജെപിയുടെ കുതന്ത്രമാണെന്ന് മനസ്സിലാകും. ഹ്യൂമൻ റൈറ്റ്‌സ് വാച്ചിന്റെ കണക്കനുസരിച്ച്, 1998-ൽ ക്രിസ്ത്യാനികൾക്കെതിരെ റിപ്പോർട്ട് ചെയ്യപ്പെട്ട അക്രമസംഭവങ്ങളിൽ ഭൂരിഭാഗവും ഗുജറാത്തിലെ പടിഞ്ഞാറൻ സംസ്ഥാനത്തിലാണ് നടന്നത്. അതേ വർഷം തന്നെയാണ് സംസ്ഥാനത്ത് ബിജെപി അധികാരത്തിൽ വന്നത്. ഹിന്ദുത്വ ഗ്രൂപ്പുകളുടെ അഭൂതപൂർവമായ വിദ്വേഷ പ്രചാരണത്തോടെയാണ് ഈ വർഷം ആരംഭിച്ചത്. ക്രിസ്ത്യൻ ഗോത്രവർഗക്കാർക്കെതിരെ പത്ത് ദിവസം തുടർച്ചയായി അക്രമം അഴിച്ചുവിടുകയും വർഷാവസാനം തെക്കുകിഴക്കൻ ജില്ലകളിലെ പള്ളികളും ക്രിസ്ത്യൻ സ്ഥാപനങ്ങളും തകർക്കുകയും ചെയ്തു. തെക്കുകിഴക്കൻ ഗുജറാത്തിലെ ഡാങ്‌സ് ജില്ലയിൽ നടന്ന ഈ ആക്രമണങ്ങളെക്കുറിച്ച് ഹ്യൂമൻ റൈറ്റ്‌സ് വാച്ച് അന്വേഷണം നടത്തിയിരുന്നു. സംഭവങ്ങൾക്ക് മുമ്പ് സംസ്ഥാനത്തുടനീളം അക്രമം വർദ്ധിച്ചു, അതിൽ നിരവധി പോലീസും സംസ്ഥാന ഉദ്യോഗസ്ഥരും ഉൾപ്പെട്ടിരുന്നു.

മണിപ്പൂർ മുഖ്യമന്ത്രി ബിരേൻ സിങ്ങും ഇതേ മാതൃകയാണ് പിന്തുടരുന്നത്. നിലവിലെ പ്രതിസന്ധിക്ക് മുമ്പ്, കയ്യേറ്റ വിരുദ്ധ നീക്കത്തിന്റെ പേരിൽ അദ്ദേഹത്തിന്റെ സർക്കാർ മൂന്ന് പള്ളികൾ ബുൾഡോസർ കൊണ്ട് തകർത്തു. ഇവയിൽ ചിലത് ഇംഫാലിന്റെ ഈസ്റ്റ് ഡിസ്ട്രിക്റ്റ് ട്രൈബൽ കോളനിയിൽ 70-കളുടെ തുടക്കം മുതൽ നിലവിലുള്ളതാണ്.

വ്യാപകമായ നാശനഷ്ടങ്ങളും മനുഷ്യരുടെ ജീവഹാനിയും ഉണ്ടായിട്ടും, ഇന്ത്യയുടെ പ്രധാനമന്ത്രി നരേന്ദ്ര മോഡി  അമേരിക്ക ഉൾപ്പെടെ ലോകമെമ്പാടുമുള്ള വിവിധ രാജ്യങ്ങളിൽ നിരവധി സുപ്രധാന  സന്ദർശനങ്ങൾ നടത്തുമ്പോൾ ഇതേക്കുറിച്ച്  ഇതുവരെയും ഒരക്ഷരം ഉരിയാടിയിട്ടില്ല. ജാതിയോ മതമോ പ്രദേശമോ പരിഗണിക്കാതെ ഇന്ത്യയിലെ ഓരോ പൗരന്റെയും ജീവനും സ്വത്തിനും സംരക്ഷണം നൽകുക എന്നതാണ് അദ്ദേഹത്തിന്റെ ഭരണഘടനാപരമായ പ്രാഥമിക കടമ. എന്നിട്ടും, ഇന്ത്യയെ വിശ്വഗുരു ആക്കുകയെന്ന ലക്ഷ്യത്തോടെ, ഒരു ക്രിക്കറ്റ് കളിക്കാരൻ അപകടത്തിൽ പെട്ടാൽ ഉടൻ ട്വീറ്റ് ചെയ്യുന്ന മഹാനായ ഈ  രാഷ്ട്രത്തലവൻ, തന്റെ മുന്നിൽ കത്തിയെരിയുന്ന ഒരു സംസ്ഥാനത്തിന്റെ നേർക്ക് കണ്ണടയ്ക്കുന്നതാണ് നല്ലതെന്ന് കരുതിയിരിക്കുകയാണ്.

തന്റെ വിദേശ സന്ദർശനങ്ങളിൽ, അദ്ദേഹം പലപ്പോഴും വിദേശ നേതാക്കളോട്, പ്രത്യേകിച്ച് ക്രിസ്ത്യൻ ഭൂരിപക്ഷ രാജ്യങ്ങളിൽ, ഹിന്ദു ആരാധനാലയങ്ങൾ സംരക്ഷിക്കാനും അവയുടെ വിശുദ്ധി സംരക്ഷിക്കാനും ആവശ്യപ്പെടാറുണ്ട്. എന്നാൽ, താൻ ഭരണചക്രം തിരിക്കുന്ന രാജ്യത്തെ മുന്നൂറോ അതിലധികമോ ക്രിസ്ത്യൻ പള്ളികളുടെ നാശത്തെക്കുറിച്ച് തുറന്നുപറയാൻ മോഡിക്ക് ധൈര്യമില്ല. പ്രൊപഗണ്ടയിൽ വൈദഗ്ധ്യം നേടിയ അദ്ദേഹത്തിന്റെ വിദേശകാര്യ മന്ത്രി എസ്. ജയശങ്കറിന് പാരമ്പര്യങ്ങളുടെയും സംസ്കാരത്തിന്റെയും പേരിൽ തന്റെ ചിന്തകളെ എപ്പോഴും യുക്തിസഹമാക്കാൻ പ്രത്യേക കഴിവാണ്. അദ്ദേഹം മനുഷ്യാവകാശങ്ങളെ പുനർനിർവചിച്ചിരിക്കുന്നതുപോലും, വിദേശത്തുള്ള തന്റെ ഒരുകൂട്ടം ആളുകൾക്ക് അനുയോജ്യമായ ഒന്ന്, ജന്മനാട്ടിലെ പാർശ്വവൽക്കരിക്കപ്പെട്ട സമൂഹങ്ങൾക്ക് മറ്റൊന്ന് എന്ന തരത്തിലാണ്.

വിവരമുള്ള രാഷ്ട്രീയ നിരീക്ഷകർക്ക് മണിപ്പൂരും ഇന്ത്യയുടെ മറ്റ് ഭാഗങ്ങളും വിഭജിക്കപ്പെടുകയാണെന്ന് മനസ്സിലാകുന്നുണ്ട്. മോഡി ഭരണകൂടം ഉയർത്തിപ്പിടിക്കുന്ന ധ്രുവീകരണ രാഷ്ട്രീയം മനുഷ്യന്റെ ജീവനും സ്വത്തിനും ഭീഷണി ഉയർത്തുകയാണ്. ജനങ്ങളെ തമ്മിൽ അകറ്റുന്നതിന്  പുറമേ, മഹത്തായ ഒരു രാജ്യത്തിന്റെ ധാർമ്മിക അടിത്തറയെ നശിപ്പിക്കാനും ഇത് കാരണമാകുന്നു. ദേശീയതയിൽ അഭിമാനിക്കുന്ന പാർട്ടി അതിന്റെ അനന്തരഫലങ്ങൾ കണക്കിലെടുക്കാതെ അധികാരത്തിന്റെ സ്വാർത്ഥതയ്ക്കായി രാഷ്ട്രത്തെ ശിഥിലമാക്കാൻ ഭീകരവാദ ഘടകങ്ങൾക്ക് പ്രേരണ നൽകുകയാണ്.

ആരാണ് യഥാർത്ഥത്തിൽ ദേശവിരുദ്ധൻ? വിനാശകരമായ ഫലങ്ങളുള്ള ഒരു ഉപകരണമായി മതത്തെ ഉപയോഗിച്ച് നിന്ദ്യമായ നയങ്ങളിലൂടെ രാജ്യത്തെ ശിഥിലീകരണത്തിലേക്ക് നയിക്കുന്ന ഒരാളാണോ അതോ നിലവിലെ ഭരണത്തിന് കീഴിലുള്ള ഒരു രാജ്യത്തിന്റെ അധഃപതനത്തെ സത്യസന്ധമായി വിമർശിക്കുന്നവനാണോ? ഈ ചോദ്യത്തിന് ഉത്തരം ലഭിച്ചേ മതിയാകൂ!