പണ്ടു ഞാന്‍ പൈതലായ് പാതിരാ കുര്‍ബ്ബാനയ്ക്കായ്
പാതിസുഷുപ്തിയിലും മൈലുകള്‍ താണ്ടിയെത്താന്‍
ചൂട്ടുകറ്റയില്‍ മിന്നും വെട്ടത്തില്‍ നടന്നതും
ചൂടപ്പം കോഴിക്കറി പ്രാതലിനശിച്ചതും,
ഈറയില്‍ വര്‍ണ്ണപ്പേപ്പറൊട്ടിച്ചു സ്റ്റാറുണ്‍ടാക്കി
മുറ്റത്തെ തൈമാവിന്റെ കൊമ്പിലായ് തൂക്കിയതും,
ക്രിസ്തുമസ് ട്രീയന്നില്ല മിന്നുന്ന ബള്‍ബുമില്ല
കൈവിരുതൊരുക്കുന്ന സ്റ്റാറുകള്‍ തോരണങ്ങള്‍ 1
കന്മഷം കലരാത്ത സ്‌നേഹത്തിന്‍ സമ്മാനങ്ങള്‍
അമ്മയച്ഛന്മാര്‍ കൂട്ടുകുടുംബ സദസ്സുകള്‍
നന്മയിന്‍ ചെരാതുകള്‍ സൌഭഗ സമ്മേളങ്ങള്‍
എന്മനമിന്നും തിങ്ങി നില്‍പ്പതാ പൊന്‍വെട്ടമായ്.

ക്രിസ്തുവില്ലാത്ത ക്രിസ്തുമസാഘോഷമോയിന്ന്
ക്രിസ്തുസാന്നിദ്ധ്യമുണ്‍ടോ ഇന്നത്തെ ക്രിസ്തുമസില്‍?
മിന്നിത്തിളങ്ങും മായാ ദീപപ്രഭയാണെങ്ങും
സമ്മാനം കൈമാറാനുള്ളാഘോഷത്തിമിര്‍പ്പെങ്ങും
എമ്മട്ടില്‍ വാരിക്കോരി സന്തോഷം കാട്ടാന്‍ വെമ്പല്‍
'സക്കാത്തു' കൊടുത്തിടുമിസ്ലാമിന്‍ പാരമ്പര്യം
ക്രിസ്തുമസില്‍ സാധുക്കള്‍ക്കേകുവാന്‍ കഴിഞ്ഞെങ്കില്‍!
പാരിനെ കൈവെള്ളയില്‍ പാലിപ്പാന്‍ കഴിവുള്ളോന്‍
പാരില്‍പ്പിറന്നീ ലോക രക്ഷയ്ക്കായ് വന്ന ദിനം
പാരം കരുണ കാട്ടി ചിത്തത്തില്‍ സ്‌നേഹം നീട്ടി
പാരിനെ പൂരിപ്പിക്കും താരകളാകാം നമ്മള്‍!!

ക്രിസ്തുമസ് ആശംസകള്‍ !!!
ഡിസംബര്‍ 25, 2023