ന്യൂയോര്ക്ക്: ഫൊക്കാനയുടെ 2022 - 24 വര്ഷങ്ങളിലെ സാഹിത്യ അവാര്ഡുകള് പ്രഖ്യാപിച്ചു.
1. ഫൊക്കാന തകഴി ശിവശങ്കരപ്പിള്ള പുരസ്കാരം: നോവല്
കൂത്താണ്ടവര് - വേണുഗോപാലന് കോക്കോഡന്
2. ഫൊക്കാന കാരൂര് നീലകണ്ഠപ്പിള്ള പുരസ്കാരം: ചെറുകഥ
ബോണ്സായി മരത്തണലിലെ ഗിനിപ്പന്നികള് - ബിജോ ജോസ് ചെമ്മാന്ത്ര.
ഫിത്ര് സകാത്ത് - എസ്. അനിലാല്.
3. ഫൊക്കാന എന്. കെ. ദേശം പുരസ്കാരം: കവിത
ഒക്ടോബര് - സിന്ധു നായര്
4. ഫൊക്കാന സുകുമാര് അഴീക്കോട് പുരസ്കാരം: ലേഖനം/നിരൂപണം
അഗ്നിച്ചീളുകള് - ജയന് വര്ഗീസ്
ആര്ട്ടിഫിഷ്യല് ഇന്റലിജെന്സ് - സോണി തോമസ് അമ്പൂക്കന്
5 . ഫൊക്കാന എം.എന്. സത്യാര്ത്ഥി പുരസ്കാരം: തര്ജ്ജമ
Draupadi the Avatar - Dr. Sukumar Canada
6 . ഫൊക്കാന കമലാ ദാസ് പുരസ്കാരം (ആംഗലേയ സാഹിത്യം)
CASA LOCA (The Mad House) - J Avaran
By Choice - Vinod Mathew
2024 ജൂലൈ 18 മുതല് 20 വരെ നോര്ത്ത് ബെഥെസ്ഡയിലെ മോണ്ട്ഗോമറി കൗണ്ടി കോണ്ഫറന്സ് സെന്ററില് (Bethesda North Marriott Hotel & Conference Center, 5701 Marinelli Rd, Rockville, MD 20852) നടക്കാനിരിക്കുന്ന Federation of Kerala Associations in North America (FOKANA) യുടെ 21-ാമത് ദേശീയ കണ്വെന്ഷനിലായിരിക്കും അവാര്ഡുകള് സമ്മാനിക്കുക എന്ന് ഫൊക്കാന പ്രസിഡണ്ട് ഡോ. ബാബു സ്റ്റീഫന് അറിയിച്ചു.
പ്രമുഖ അമേരിക്കന് മലയാളി സാഹിത്യകാരനും കോളേജ് അദ്ധ്യാപകനുമായ പ്രൊഫ. കോശി തലയ്ക്കല് അദ്ധ്യക്ഷനായ ജഡ്ജിംഗ് കമ്മിറ്റിയാണ് മലയാള രചനകളുടെ പുരസ്കാരത്തിന് അര്ഹരായവരെ തിരഞ്ഞെടുത്തത്. ആംഗലേയ സാഹിത്യ പുരസ്കാരത്തിനുള്ള കൃതികള് തിരഞ്ഞെടുത്തത് സാഹിത്യകാരനും കോളേജ് അദ്ധ്യാപകനുമായ പ്രൊഫ. സണ്ണി മാത്യൂസ് അദ്ധ്യക്ഷനായ ജഡ്ജിംഗ് കമ്മിറ്റിയാണ്. മികച്ച സാഹിത്യകാരന്മാരും നിരൂപകരും അടങ്ങിയതായിരുന്നു ജഡ്ജിംഗ് കമ്മിറ്റി.
പുരസ്കാരങ്ങള് നേടിയ സാഹിത്യകാരന്മാരെ പ്രത്യേകം അഭിനന്ദിക്കുന്നതായി പ്രസിഡന്റ് ഡോ. ബാബു സ്റ്റീഫന് അറിയിച്ചു.
ഗീതാ ജോര്ജ്ജ് കോഓര്ഡിനേറ്ററും, ബെന്നി കുര്യന് ചെയര്മാനും, സണ്ണി മറ്റമന കോ-ചെയര്മാനും ആയിട്ടുള്ള അവാര്ഡ് കമ്മറ്റിയുടെയും ജഡ്ജിംഗ് കമ്മിറ്റിയുടെയും നിസ്വാര്ത്ഥമായ പ്രവര്ത്തനങ്ങളെ അദ്ദേഹം അഭിനന്ദിച്ചു.
കേരളത്തില് അക്കാഡമി അവാര്ഡ് പോലെയുള്ള അവാര്ഡുകള്ക്ക് തുല്യമായാണ് ഫൊക്കാന സാഹിത്യ അവാര്ഡിനെ അമേരിക്കന് മലയാളികള് നോക്കികാണുന്നതെന്ന് അവാര്ഡ് കമ്മിറ്റി കോഓര്ഡിനേറ്ററായ ഗീത ജോര്ജ്ജ് അറിയിച്ചു. ഫൊക്കാനയുടെ ആരംഭകാലം മുതല് സാഹിത്യ പുരസ്കാരങ്ങള്ക്ക് മുന്തിയ പരിഗണന നല്കിയിരുന്നതായി ഗീത കൂട്ടിച്ചേര്ത്തു.
മലയാളത്തിന്റെ എക്കാലത്തെയും മികച്ച നോവലിസ്റ്റ് തകഴി ശിവശങ്കരപിള്ളയുടെ വീട്ടിലെ ഷോകേസില് അദ്ദേഹത്തിന് കിട്ടിയ പരമോന്നത സാഹിത്യ പുരസ്കാരമായ ജ്ഞാനപീഠം പുരസ്കരത്തിനൊപ്പം ഫൊക്കാന സാഹിത്യ അവാര്ഡിന്റെ ഫലകവും സ്ഥാനം പിടിച്ചിട്ടുള്ളത് ഫൊക്കാന അവാര്ഡിന്റെ മഹത്വം വിളിച്ചോതുന്നതാണെന്ന് അവാര്ഡ് കമ്മിറ്റി ചെയര്മാന് ബെന്നി കുര്യന് അറിയിച്ചു.
അമേരിക്കയിലും കാനഡയിലുമുള്ള എഴുത്തുകാരുടെ 2022 മെയ് മാസം മുതല് പുസ്തകരൂപത്തില് പ്രസിദ്ധീകരിച്ച കൃതികളാണ് അവാര്ഡിനു പരിഗണിച്ചത്.
അവാര്ഡ് ലഭിച്ച കൃതികള് കേരളത്തില് നിന്നുള്ള സൃഷ്ടികളെക്കാള് ഒട്ടും മാറ്റു കുറഞ്ഞതല്ലെന്ന് ജൂറി വിലയിരുത്തി. അവാര്ഡിന് അര്ഹരായ നിരവധി ജേതാക്കള്ക്ക് തങ്ങളുടെ പ്രഥമ പുസ്തകത്തിനാണ് അവാര്ഡ് ലഭിച്ചിട്ടുള്ളത്. ഏറെ ഇരുത്തം വന്ന സാഹിത്യകാരന്മാരുടെ മികച്ച കൃതികള്ക്കൊപ്പം വയ്ക്കാവുന്ന ഗുണനിലവാരമുള്ള സൃഷ്ടികളാണ് സമ്മാനാര്ഹമായതെന്ന് ജഡ്ജിംഗ് കമ്മിറ്റി വിലയിരുത്തിയതായി കോ-ചെയര്മാനായ സണ്ണി മറ്റമന അറിയിച്ചു. കൂടാതെ, അവാര്ഡിനായി ലഭിച്ച ഓരോ കൃതികളും ഒന്നിനൊന്നു മികച്ചവയായിരുന്നുവെന്നും ഏറെ അവധാനതയോടെ പരിശോധിച്ചാണ് കൃതികള് അവാര്ഡിന് പരിഗണിച്ചതെന്നും കമ്മിറ്റി അറിയിച്ചു.