2023ല്‍ പുറത്തെത്തിയ രജനികാന്ത് ചിത്രം ജയിലര്‍    മികച്ച പ്രതികരണങ്ങള്‍ നേടി  പല റെക്കോര്‍ഡുകള്‍ തകര്‍ത്താണ് മുന്നേറിയത്. നെല്‍സണ്‍ ദിലീപ്കുമാറിന്റെ സംവിധാനത്തില്‍ രജനികാന്ത് ടൈഗര്‍ മുത്തുവേല്‍ പാണ്ഡ്യന്‍ എന്ന കഥാപാത്രമായെത്തിയ ചിത്രം ആഗോള ബോക്‌സ് ഓഫീസില്‍ നിന്ന് 600 കോടിയിലേറെ നേടിയിരുന്നു. ചിത്രം വിജയിച്ചത് മുതല്‍ ആരാധകര്‍ കാത്തിരിക്കാന്‍ തുടങ്ങിയതാണ് ചിത്രത്തിന്റെ രണ്ടാം ഭാഗത്തിനായി. ഒരു പ്രൊമോ വീഡിയോയ്‌ക്കൊപ്പം രണ്ടാം ഭാഗത്തിന്റെ ഔദ്യോഗിക പ്രഖ്യാപനം എത്തിയത് ജനുവരി 14 ന് ആയിരുന്നു. ഇന്ന് സിനിമയുടെ ചിത്രീകരണവും ആരംഭിച്ചു. നിര്‍മ്മാതാക്കളായ സണ്‍ പിക്‌ചേഴ്‌സ് ആണ് ഇക്കാര്യം അറിയിച്ചിരിക്കുന്നത്.

‘മുത്തുവേല്‍ പാണ്ഡ്യന്റെ വേട്ട ആരംഭിക്കുന്നു. ജയിലര്‍ ഷൂട്ട് ഇന്ന് ആരംഭിക്കുന്നു’, ചിത്രത്തിന്റെ പുതിയ പോസ്റ്ററിനൊപ്പം നിര്‍മ്മാതാക്കള്‍ സോഷ്യല്‍ മീഡിയയില്‍ കുറിച്ചിട്ടുണ്ട്. രജനികാന്തിനൊപ്പമുള്ള താരനിരയും ചിത്രത്തിന്റെ വലിയ വിജയത്തില്‍ പങ്കുവഹിച്ചിട്ടുണ്ട്. വിനായകന്‍ വര്‍മന്‍ എന്ന പ്രതിനായക കഥാപാത്രമായി ഗംഭീര പ്രകടനം നടത്തിയപ്പോള്‍ മോഹന്‍ലാല്‍, ശിവ രാജ്കുമാര്‍, ജാക്കി ഷ്രോഫ് തുടങ്ങി വ്യത്യസ്ത ഇന്‍ഡസ്ട്രികളില്‍ നിന്നുള്ള താരങ്ങളെ മികച്ച വേഷങ്ങളില്‍ നെല്‍സണ്‍ കൊണ്ടുവന്നു. രണ്ടാം ഭാഗം ആരംഭിക്കുന്നതായ വാര്‍ത്ത വരുമ്പോള്‍ മലയാളികള്‍ക്ക് അറിയാന്‍ ഏറ്റവും ആഗ്രഹമുള്ളത് ചിത്രത്തില്‍ മോഹന്‍ലാലിന്റെ മാത്യു എന്ന ഡോണ്‍ കഥാപാത്രം ഉണ്ടാവുമോ എന്ന് അറിയാനാണ്