നിദ്ര നിതാന്തമാം  നിദ്ര യതിലൊരു 
നിത്യ പ്രകാശ വിലാസം ! 
ഒന്നുമില്ലായ്മയാം  യാദൃശ്ചികങ്ങളിൽ 
പൊന്നിൻ ചിലമ്പൊലിയുമ്മ !

ഒന്ന് ചേരാതെ പിണങ്ങും കണികയോ - 
ടൊന്നുണരാനൊരു മന്ത്രം ! 
സിങ്കുലാരിറ്റി കവിൾ ചോപ്പിലാദ്യമായ്
ഇംഗിത പ്രേമാർദ്ര മുത്തം !

സത്യ പ്രപഞ്ചമായ് ശിൽപ്പിതൻ കൊത്തുളി 
ചുറ്റിക താള മുയർന്നു 
ബിഗ് ബാംഗിൾ സിങ്കുലാരിറ്റി തൻ ഹൃത്തടം 
പൊട്ടിപ്പിളർന്നു വികാസം !

നക്ഷത്ര പാറയിൽ വായു കുമിളയാം 
തൊട്ടിലിലെന്നെയുറക്കാൻ 
എത്ര ശതകോടി വർഷങ്ങൾ പിന്നിട്ട
സ്വപ്ന സാക്ഷാൽക്കാര പുണ്യം !

സത്യ പ്രപഞ്ചത്തിൽ സത്വരം വാഴുന്ന 
ശക്തി തൻ സത്തയീ ജീവൻ
ചിപ്പിയിൽ വീണ മണൽത്തരി പോലൊരു 
മുത്തായി മാറുന്നു നമ്മൾ !

( മുത്തേ, മനുഷ്യക്കൂരുന്നേ നിനക്കായി 
സത്വരം വച്ചൊരീ കൂട്ടിൽ 
സ്വർഗ്ഗം പണിയുവാൻ വേണ്ടി നിന്നാത്മാവിൽ 
സത്യമായ് ഉൾച്ചേർന്ന പോലെ, )

ഒന്നായ വിശ്വ മഹാ പ്രപഞ്ചത്തിന്റെ 
റിംഗ് മാസ്റ്ററാം ശക്തി സത്ത 
എന്നിലും നിന്നിലും പുല്ലിലും പൂവിലും
ഉണ്മയാം ജീവൽത്തുടിപ്പ് !

സ്നേഹമാണെങ്ങും പ്രപഞ്ച വസ്തുക്കളെ 
മാറോടു ചേർത്തു നിൽക്കുമ്പോൾ,
പോകൂ മരണമേ, ദൂരെ ! യിതു വെറും 
രാസമാറ്റത്തിന്റെ താളം !