തിരുവനന്തപുരം: സുപ്രീം കോടതി ചീഫ് ജസ്റ്റിസിനെതിരെ സാമൂഹിക മാധ്യമമായ എക്‌സിൽ അധിക്ഷേപകരമായ പോസ്റ്റിട്ട സംഭവത്തിൽ കെപിസിസി പ്രസിഡന്റിന് വക്കീൽ നോട്ടീസ്. സുപ്രീം കോടതി ബാർ അസോസിയേഷൻ ജോയിന്റ് സെക്രട്ടറിയാണ് നോട്ടീസ് അയച്ചത്. ഏഴു ദിവസത്തിനകം വിശദീകരണം നൽകണമെന്നും പരാമർശത്തിൽ പരസ്യമായി മാപ്പു പറയണമെന്നുമാണ് ആവശ്യം. അല്ലാത്തപക്ഷം കെപിസിസി നേതൃത്വത്തിനെതിരെ ക്രിമിനൽ കോടതിയലക്ഷ്യ നടപടികളുമായി മുന്നോട്ടുപോകുമെന്നും നോട്ടീസിൽ മുന്നറിയിപ്പുണ്ട്. വിവാദ പോസ്റ്റിന്റെ പേരിൽ സുപ്രീം കോടതിയിൽ സമർപ്പിക്കപ്പെട്ട ഹർജിയിൽ കെപിസിസിക്ക് കോടതി നേരത്തെയും നോട്ടീസ് അയച്ചിരുന്നു.

​മുഖ്യ തെരഞ്ഞെടുപ്പ് കമ്മീഷണർ ഗ്യാനേഷ് കുമാറിന്റെ രാജി ആവശ്യപ്പെട്ട് 'ഇന്ത്യ' മുന്നണി സുപ്രീം കോടതിയിലേക്ക് നടത്തിയ മാർച്ചിനിടെയായിരുന്നു കെപിസിസിയുടെ ഔദ്യോഗിക എക്‌സ് അക്കൗണ്ടിൽ വിവാദ പരാമർശം പ്രത്യക്ഷപ്പെട്ടത്. നിയമപരമായ തടസ്സങ്ങളുള്ളതിനാൽ സഖ്യ നേതാക്കളെ നേരിൽ കാണാൻ സാധിക്കില്ലെന്ന് ചീഫ് ജസ്റ്റിസ് അറിയിച്ചതിലുള്ള അമർഷമായിരുന്നു കുറിപ്പിന്റെ ഉള്ളടക്കം. 'സൂര്യകാന്ത് രാജിവയ്ക്കൂ, പകരം ആളെ ഞങ്ങൾ കണ്ടെത്താം' എന്നതടക്കമുള്ള കടുത്ത അധിക്ഷേപങ്ങൾ നിറഞ്ഞ കുറിപ്പ് ദേശീയതലത്തിൽ വലിയ രാഷ്ട്രീയ-നിയമ വിവാദങ്ങൾക്ക് വഴിവെച്ചു.

​പ്രതിഷേധം ശക്തമായതോടെ മണിക്കൂറുകൾക്കകം പോസ്റ്റ് നീക്കം ചെയ്ത കെപിസിസി പ്രസിഡന്റ് സണ്ണി ജോസഫ്, നേതൃത്വത്തിന്റെ അറിവോ സമ്മതമോ ഇല്ലാതെയാണ് കുറിപ്പ് പ്രസിദ്ധീകരിച്ചതെന്ന് വിശദീകരിച്ചു. വിഷയത്തിൽ ഉത്തരവാദിയായ ആളെ ചുമതലയിൽനിന്ന് നീക്കിയതായും ഏത് സാഹചര്യത്തിലാണ് ഇത്തരമൊരു വീഴ്ച സംഭവിച്ചതെന്ന് ആഭ്യന്തരമായി പരിശോധിക്കുമെന്നും അദ്ദേഹം വ്യക്തമാക്കിയിരുന്നു. എന്നാൽ, ജുഡീഷ്യറിയുടെ അന്തസ്സിന് കളങ്കം വരുത്തിയെന്ന് ചൂണ്ടിക്കാട്ടി സമർപ്പിക്കപ്പെട്ട ഹർജികൾക്ക് പിന്നാലെ ബാർ അസോസിയേഷനും നിയമനടപടി കടുപ്പിച്ചതോടെ കോൺഗ്രസ് സംസ്ഥാന നേതൃത്വം കടുത്ത പ്രതിരോധത്തിലായിരിക്കുകയാണ്.