തിരുവനന്തപുരം: നിപ പ്രതിരോധ മരുന്നുമായി ബന്ധപ്പെട്ട വിവാദത്തിൽ നിയോഗിച്ച വിദഗ്ധ സമിതിയുടെ റിപ്പോർട്ട് ലഭിച്ച ശേഷമേ കൂടുതൽ പ്രതികരണത്തിന് തയ്യാറാകൂ എന്ന് ആരോഗ്യമന്ത്രി കെ. മുരളീധരൻ. മന്ത്രി എന്ന നിലയിൽ എടുത്തുചാടി അഭിപ്രായം പറയാനില്ലെന്നും വിഷയത്തിൽ സർക്കാരിന് യാതൊരു മുൻവിധിയുമില്ലെന്നും അദ്ദേഹം വ്യക്തമാക്കി. ലഭ്യമായ വിവരങ്ങൾ ഉൾപ്പെടുത്തി ആരോഗ്യവകുപ്പ് തയ്യാറാക്കിയ റിപ്പോർട്ട് ഇതിനകം നിയമസഭയുടെ മേശപ്പുറത്ത് വെച്ചിട്ടുണ്ടെന്നും മന്ത്രി മാധ്യമങ്ങളോട് പറഞ്ഞു.

​കാലാവധി കഴിഞ്ഞ മരുന്നാണോ രോഗികൾക്ക് നൽകിയതെന്ന് ഇതുവരെ സ്ഥിരീകരിച്ചിട്ടില്ലെങ്കിലും സർക്കാരിന് ഇക്കാര്യത്തിൽ സംശയമുണ്ടെന്ന് മന്ത്രി വ്യക്തമാക്കി. കോഴിക്കോട് മെഡിക്കൽ കോളേജിൽ ചികിത്സയിലായിരുന്നവർക്ക് മരുന്ന് നൽകിയിരുന്നു. എന്നാൽ, അത് എങ്ങനെയാണ് ഉപയോഗിച്ചതെന്ന കാര്യത്തിലാണ് നിലവിൽ തർക്കം നിലനിൽക്കുന്നത്. ഈ സാഹചര്യത്തിലാണ് കാര്യങ്ങൾ നിഷ്പക്ഷമായി പരിശോധിക്കാൻ വിദഗ്ധ സമിതിയെ അന്വേഷണത്തിന് നിയോഗിച്ചതെന്നും അദ്ദേഹം പറഞ്ഞു.

​മരുന്നിന്റെ ഗുണനിലവാരത്തെക്കുറിച്ച് തർക്കമില്ലെന്നും കാലാവധി സംബന്ധിച്ച കാര്യങ്ങൾ വിദഗ്ധർ പരിശോധിക്കട്ടെയെന്നും മന്ത്രി ചൂണ്ടിക്കാട്ടി. താൻ എം.ബി.ബി.എസ് ബിരുദധാരിയല്ലെന്നും ശാസ്ത്രീയ പരിശോധനാ ഫലം വന്നാലേ കൃത്യമായി പറയാൻ കഴിയൂ എന്നും അദ്ദേഹം കൂട്ടിച്ചേർത്തു. സാധാരണ മരുന്നുകളിൽ ഉണ്ടാകേണ്ട നിർമ്മാണത്തീയതി (മാനുഫാക്ചറിങ് ഡേറ്റ്) വിവാദമായ മരുന്നിൽ ഉണ്ടായിരുന്നില്ലെന്ന് മെഡിക്കൽ കോളേജ് സൂപ്രണ്ട് സ്ഥിരീകരിച്ചിട്ടുണ്ട്. മുൻ സർക്കാരിന്റെ കാലത്തെ ഏജൻസി സംസ്കാരം കാരണമാണ് കെ.എം.എസ്.സി.എല്ലിന്റെ തലപ്പത്തേക്ക് വരാൻ പോലും ഐ.എ.എസ് ഉദ്യോഗസ്ഥർ മടിക്കുന്നതെന്നും മന്ത്രി വിമർശിച്ചു.