കോഴിക്കോട്: നിപ പ്രതിരോധ മരുന്നുമായി ബന്ധപ്പെട്ട വിവാദത്തിൽ ആരോഗ്യമന്ത്രി കെ. മുരളീധരന്റെ വാദങ്ങൾ തള്ളി പ്രമുഖ ആരോഗ്യ വിദഗ്ധൻ ഡോ. അനൂപ് കുമാർ എ.എസ്. കഴിഞ്ഞ മൂന്ന് വർഷത്തിനിടെ സംസ്ഥാനത്ത് നിപ ബാധിച്ച് മരിച്ച ആറുപേരും കോഴിക്കോട് മെഡിക്കൽ കോളേജിൽ നിന്ന് റെംഡെസിവിർ മരുന്ന് സ്വീകരിച്ചിട്ടില്ലെന്ന് അദ്ദേഹം വ്യക്തമാക്കി. ഫേസ്‌ബുക്ക് വീഡിയോയിലൂടെയായിരുന്നു ഡോക്ടറുടെ പ്രതികരണം.

​2023 മുതൽ 2025 വരെയുള്ള കാലയളവിൽ സംസ്ഥാനത്ത് ആകെ 13 പേർക്കാണ് നിപ ബാധ സ്ഥിരീകരിച്ചത്. ഇവരിൽ ഏഴുപേർ രോഗമുക്തി നേടിയപ്പോൾ ആറുപേർ മരണത്തിന് കീഴടങ്ങുകയായിരുന്നു. എന്നാൽ ജീവൻ നഷ്ടപ്പെട്ട ഈ ആറു രോഗികളിൽ ഒരാൾ പോലും കോഴിക്കോട് മെഡിക്കൽ കോളേജിൽ ചികിത്സയിലിരിക്കെ റെംഡെസിവിർ മരുന്ന് എടുത്തിരുന്നില്ലെന്നും അദ്ദേഹം ചൂണ്ടിക്കാട്ടി.

​2018, 2019 കാലഘട്ടങ്ങൾക്ക് ശേഷം കേരളത്തിൽ നിപ ബാധയുണ്ടായപ്പോഴെല്ലാം പ്രധാനമായും റെംഡെസിവിർ മരുന്നാണ് ഉപയോഗിച്ചിട്ടുള്ളതെന്ന് അദ്ദേഹം വിശദീകരിച്ചു. ഇതിനൊപ്പം മോണോക്ലോണൽ ആന്റിബോഡിയും ചികിത്സയ്ക്കായി നൽകിയിരുന്നു. എന്നാൽ ഈ മരുന്നുകൾ നിപ രോഗികളിൽ എത്രത്തോളം ഫലപ്രദമാണെന്നതിന് നിലവിലും കൃത്യമായ ശാസ്ത്രീയ വിവരങ്ങളില്ലെന്നും, എബോള ബാധയിൽ ഫലപ്രദമായെന്ന നിഗമനത്തിന്റെ അടിസ്ഥാനത്തിലാണ് ഇവിടെയും ഈ ചികിത്സാ രീതി അവലംബിച്ചതെന്നും ഡോ. അനൂപ് കുമാർ വ്യക്തമാക്കി.