ബെംഗളൂരു: കാവേരി നദിയിൽ നിർമിക്കാൻ ലക്ഷ്യമിടുന്ന നിർദിഷ്ട മേക്കദാട്ടു ബാലൻസിങ് റിസർവോയർ പദ്ധതിക്കായി വനഭൂമി ഉൾപ്പെടെ 2,500 ഏക്കർ പകരം ഭൂമി കർണാടക സർക്കാർ കണ്ടെത്തി. വനഭൂമി ഉൾപ്പെടെയുള്ള ഭൂമിയാണ് കണ്ടെത്തിയതെന്ന് കർണാടക മുഖ്യമന്ത്രി ഡികെ ശിവകുമാർ അറിയിച്ചു. മേക്കദാട്ടു സർവോയർ പദ്ധതിക്ക് ആവശ്യമായ അനുമതികൾ ലഭിക്കുന്നതിനായുള്ള നടപടി ക്രമങ്ങളുടെ ഭാഗമായിട്ടാണ് ഭൂമി കണ്ടെത്തിയത്.

തമിഴ്നാട് സർക്കാരിൻ്റെ ഭാഗത്ത് നിന്നും കടുത്ത എതിർപ്പ് തുടരുന്നതിനിടെയാണ് മേക്കദാട്ടു ബാലൻസിങ് റിസർവോയർ പദ്ധതിയുമായി കർണാടക സർക്കാർ ശക്തമായി മുന്നോട്ട് പോകുന്നതിൻ്റെ സൂചനയായിട്ടാണ് ഭൂമി ഏറ്റെടുക്കൽ. പദ്ധതിയുമായി ബന്ധപ്പെട്ട അനുമതികൾ ലഭിക്കുന്നതിനായി കണ്ടെത്തിയ ഭൂമിയുടെ വിശദാംശങ്ങൾ സർക്കാർ 'ഫോറസ്റ്റ് ക്ലിയറൻസ് പോർട്ടലിൽ' (വനാനുമതി പോർട്ടൽ) അപ്‌ലോഡ് ചെയ്യുമെന്ന് മുഖ്യമന്ത്രി ഡികെ ശിവകുമാർ പറഞ്ഞു.

പദ്ധതിക്കായി കർഷകരിൽ നിന്ന് ഏകദേശം 500 ഏക്കർ സ്വകാര്യ ഭൂമി ഏറ്റെടുക്കാനുള്ള നടപടികളും സർക്കാർ ആരംഭിച്ചിട്ടുണ്ട്. ഭൂമിയുടെ വിവരങ്ങൾ ഉൾപ്പെടെയുള്ള എല്ലാ വിശദാംശങ്ങളും പോർട്ടലിൽ അപ്‌ലോഡ് ചെയ്യും. അത് പൂർത്തിയായാൽ, അധികൃതർ ആവശ്യമായ അനുമതി നൽകേണ്ടതാണെന്ന് മുഖ്യമന്ത്രി കൂട്ടിച്ചേർത്തു.

നിർദിഷ്ട റിസർവോയറിൽ 66 ടിഎംസി (ടിഎംസി) അടി വെള്ളം സംഭരിക്കാൻ കഴിയുമെന്നും ഇത് കർണാടകയിലെ ജലക്ഷാമം പരിഹരിക്കാൻ സഹായിക്കുമെന്നും മുഖ്യമന്ത്രി ഡികെ ശിവകുമാർ പറഞ്ഞു. കാവേരി നദിയിൽ നിന്ന് 177 ടിഎംസി വെള്ളം തമിഴ്‌നാടിന് വിട്ടുനൽകാൻ കർണാടകയ്ക്ക് ബാധ്യതയുണ്ട്. എത്ര അളവിൽ എപ്പോൾ വെള്ളം വിട്ടുനൽകണം എന്നതിനെക്കുറിച്ചുള്ള നിർദേശങ്ങൾ നിരന്തരം ലഭിക്കാറുണ്ട്. ഇത്തരം സാഹചര്യങ്ങൾ കൈകാര്യം ചെയ്യാൻ ഈ പദ്ധതി സഹായിക്കുമെന്ന് മുഖ്യമന്ത്രി വ്യക്തമാക്കി.