Image

പ്രവാസി വോട്ടവകാശം: സമരപ്രഖ്യാപന കൺവെൻഷൻ

Published on 15 November, 2026
പ്രവാസി വോട്ടവകാശം: സമരപ്രഖ്യാപന കൺവെൻഷൻ

 

ആക്ഷൻ കൗൺസിൽ ദേശീയ ചെയർമാൻ രാജീവ്‌ ജോസഫിന് ദേശീയ പതാക കൈമാറിക്കൊണ്ട്, സമര പ്രഖ്യാപന കൺവെൻഷൻ ഡോ. ജയനാരായൺജി ഉദ്‌ഘാടനം ചെയ്യുന്നു

 

തിരുവനന്തപുരം: വിദേശ ഇന്ത്യക്കാരുടെ വോട്ടവകാശം നടപ്പിലാക്കണമെന്ന് ആവശ്യപ്പെട്ടുകൊണ്ട്, ലോകമെമ്പാടുമുള്ള പ്രവാസി സംഘടനകളുടെ സഹകരണത്തോടെ, 'ഇന്ത്യൻ ആക്ഷൻ കൗൺസിൽ ഫോർ സിവിൽ റൈറ്റ്സ്' എന്ന ജനകീയ പ്രസ്ഥാനത്തിന്റെ നേതൃത്വത്തിൽ,  ഭൂമിയിൽ എവിടെയെല്ലാം പ്രവാസികളുണ്ടോ, അവിടെയെല്ലാം 'പ്രവാസി വോട്ടവകാശ സമ്മേളനങ്ങൾ' സംഘടിപ്പിക്കുന്നു. ഇതിന്റെ ഭാഗമായി, ആക്ഷൻ കൗൺസിലിന്റെ 'സമര പ്രഖ്യാപന കൺവെൻഷൻ' തിരുവനന്തപുരം പ്രസ്സ് ക്ലബ്ബിൽ നടന്നു.  പ്രമുഖ ജ്യോതിഷ പണ്ഡിതനും ഗിന്നസ്സ് വേൾഡ് റെക്കോർഡ് ജേതാവും പ്രവാസിയുമായ ഡോ. ജയനാരായൻജി കൺവെൻഷൻ ഉദ്ഘാടനം ചെയ്തു. ആക്ഷൻ കൗൺസിൽ ദേശീയ ചെയർമാൻ രാജീവ്‌ ജോസഫ് അദ്ധ്യക്ഷത വഹിച്ചു.

കേരളത്തിൽ 140 അസംബ്ലി മണ്ഡലങ്ങളിലും, രാജ്യത്തെ മുഴുവൻ സംസ്ഥാനങ്ങളിലും, വിവിധ രാജ്യങ്ങളിലും 'പ്രവാസി വോട്ടവകാശ സമ്മേളനങ്ങൾ' സംഘടിപ്പിക്കുവാനാണ് ആക്ഷൻ കൗൺസിൽ തയ്യാറെടുത്തുകൊണ്ടിരിക്കുന്നത്.

രാജ്യത്ത് തിരഞ്ഞെടുപ്പുകൾ വരുമ്പോൾ, വോട്ടു ചെയ്യാനായി ലക്ഷക്കണക്കിന് പ്രവാസികൾ നാട്ടിൽ എത്തണമെന്ന കേന്ദ്ര സർക്കാരിന്റെ ഉത്തരവ് ലോകമെമ്പാടുമുള്ള ഇന്ത്യക്കാരെ വിഡ്ഢികളാക്കുന്നതിന് തുല്യമാണ്. പോസ്റ്റൽ വഴിയോ, ഓൺലൈൻ വഴിയോ, ഇന്ത്യൻ എംബസ്സികൾ വഴിയോ പ്രവാസികൾക്ക് വോട്ടു ചെയ്യുവാനുള്ള അവസരം തിരഞ്ഞെടുപ്പ് കമ്മീഷൻ നടപ്പിലാക്കണമെന്ന് ആക്ഷൻ കൗൺസിൽ ചെയർമാൻ രാജീവ്‌ ജോസഫ് ആവശ്യപ്പെട്ടു. 

ലോകമെമ്പാടും നടക്കുന്ന 'പ്രവാസി വോട്ടവകാശ സമ്മേളനങ്ങൾക്ക്' പുറമെ, 
'ഇന്ത്യൻ ആക്ഷൻ കൗൺസിൽ ഫോർ സിവിൽ റൈറ്റ്സിന്റെ' നേതൃത്വത്തിൽ, ശക്തമായ സമര പോരാട്ടങ്ങൾക്ക് തുടക്കം കുറിക്കുക എന്ന ലക്ഷ്യത്തോടെയാണ് , 'സമര പ്രഖ്യാപന കൺവെൻഷൻ' സംഘടിപ്പിച്ചത്.

പ്രവാസി ബന്ധു, ഡോ. എസ് അഹ്മദ് (ദേശീയ ചെയർമാൻ, എൻ. ആർ. ഐ കൗൺസിൽ ഓഫ് ഇന്ത്യ), 
വില്ലറ്റ് കൊരേയ (സെക്രട്ടറി ജനറൽ, കോൺഫെഡറഷൻ ഓഫ് എൻ. ആർ. ഐ അസോസിയേഷൻസ്), 
ഇമാം കെ. പി അഹമ്മദ് മൗലവി എം. ഡി (രക്ഷാധികാരി, തോയ്‌ബ അക്കാദമി, കിളിമാനൂർ), ഡോ. എഫ്. എം ലാസർ (ചെയർമാൻ, ഡിസബിലിറ്റി റൈറ്റ്സ്), ഡോ. സിറിയേക്ക് മാപ്രയിൽ (വേൾഡ് ചാപ്റ്റർ ചെയർമാൻ, എൻ. ആർ. ഐ കൗൺസിൽ ഓഫ് ഇന്ത്യ), ഡോ. കെ. എസ് പ്രകാശ് ആലുവ (ജനറൽ സെക്രട്ടറി, സേവ് കേരളം മിഷ്യൻ), അവിക്കര സത്താർ (സീനിയർ വൈസ് ചെയർമാൻ, എൻ. ആർ. ഐ കൗൺസിൽ ഓഫ് ഇന്ത്യ),
ജിൻസി ജേക്കബ് (നാഷണൽ കോർഡിനേറ്റർ, ഇന്ത്യൻ ആക്ഷൻ കൗൺസിൽ ഫോർ സിവിൽ റൈറ്റ്സ്), വിഷ്ണുമോഹൻ (നാഷണൽ കോർഡിനേറ്റർ, റിപ്പബ്ലിക്കൻ കോൺഗ്രസ്‌ പാർട്ടി), എഴുത്തുകാരി സുമ പള്ളിപ്രം എന്നിവർ പ്രസംഗിച്ചു. 

വിവിധ രാജ്യങ്ങളിൽ സാമൂഹ്യ - സാംസ്കാരിക - മാധ്യമ രംഗത്ത് സ്തുത്യർഹ സേവനമനുഷിച്ച പ്രതിഭകൾക്ക് 'പി. വി വിവേകാനന്ദ് ഇന്റർനാഷണൽ എക്സലൻസ് അവാർഡ്' നൽകി ആദരിച്ചു.

ആക്ഷൻ കൗൺസിൽ സംസ്ഥാന കോർഡിനേറ്റർമ്മാരായ റോസ് മേരി എം, റജീന ഇഗ്നേഷ്യസ്, ജില്ലാ കോർഡിനേറ്റർ ആന്റണി ഗോമസ് എന്നിവർ പരിപാടികൾക്ക് നേതൃത്വം നൽകി. 

Join WhatsApp News
റെജീസ്🔆നെടുങ്ങാ ഡ പ്പളളി®️ 2026-11-15 16:21:09
💥🔥 ഇത് OCI കാർഡുകാർക്ക് ബാധകമാണോ??? ഇക്കൂട്ടത്തിൽ ഫോമായും, WMC- ഉം, Fokana-യും കൈ നനയാതെ "ഇരട്ട പൗരത്വ അവകാശം" കൂടി അവതരിപ്പിക്കണം. ✳️റെജീസ്
Victor Mahesh 2026-11-15 19:42:43
Very good idea/attempts. Being a Pravasi; fully support on such matters.
മലയാളത്തില്‍ ടൈപ്പ് ചെയ്യാന്‍ ഇവിടെ ക്ലിക്ക് ചെയ്യുക