
ആരോഗ്യനില വഷളായിക്കൊണ്ടിരിക്കുകയാണെന്ന് മുൻ പാകിസ്ഥാൻ പ്രധാനമന്ത്രി ഇമ്രാൻ ഖാൻ. നിലവിൽ റാവൽപിണ്ടിയിലെ അദിയാല ജയിലിൽ അദ്ദേഹം തടവിൽ കഴിയുകയാണ്. പാകിസ്ഥാനിലെ ഉന്നത ജഡ്ജിമാർക്ക് അയച്ച തുറന്ന കത്തിൽ, ജയിലിലെ സാഹചര്യങ്ങളെക്കുറിച്ചും തനിക്ക് നൽകുന്ന ചികിത്സയെക്കുറിച്ചും അദ്ദേഹം ആശങ്ക പ്രകടിപ്പിച്ചു.
ഇമ്രാൻ ഖാന് വേണ്ടി ബാരിസ്റ്റർ സൽമാൻ സദർ തയ്യാറാക്കിയ കത്തിൽ, തനിക്ക് മസ്തിഷ്കാഘാതത്തിനും ഹൃദയാഘാതത്തിനും സാധ്യതയുണ്ടെന്ന് ഡോക്ടർമാർ മുന്നറിയിപ്പ് നൽകിയിട്ടുണ്ടെന്നും, രക്തസമ്മർദ്ദം 193-ൽ എത്തിയതായും പാകിസ്ഥാൻ തെഹ്രീക്-ഇ-ഇൻസാഫ് (പി.ടി.ഐ) ചെയർമാൻ വ്യക്തമാക്കിയതായി ജിയോ ടി.വി റിപ്പോർട്ട് ചെയ്തു.
"എനിക്ക് മസ്തിഷ്കാഘാതത്തിനും ഹൃദയാഘാതത്തിനും വലിയ സാധ്യതയുണ്ടെന്നും എന്റെ ഹൃദയത്തിന് ഇതിനകം തകരാർ സംഭവിച്ചിട്ടുണ്ടെന്നുമാണ് ഡോക്ടർമാർ ഇപ്പോൾ പറയുന്നത്. എഴുപത്തിനാലാം വയസ്സിൽ, വിട്ടുമാറാത്ത ഈ അവസ്ഥ എന്നെ ജീവനോടെ തിരിച്ചെത്താൻ കഴിയാത്ത ഒരിടത്തേക്കാണ് കൊണ്ടുപോകുന്നത്." പാകിസ്ഥാൻ സുപ്രീം കോടതി, ഫെഡറൽ കോൺസ്റ്റിറ്റ്യൂഷണൽ കോടതി, ഇസ്ലാമാബാദ് ഹൈക്കോടതി എന്നിവയുടെ ചീഫ് ജസ്റ്റിസുമാരെ അഭിസംബോധന ചെയ്തുകൊണ്ടുള്ള തുറന്ന കത്തിൽ ഇമ്രാൻ ഖാൻ കുറിച്ചു.