അയോധ്യ: അയോധ്യയിലെ രാമക്ഷേത്രത്തിന് ബോംബ് ഭീഷണി. രാം മന്ദിര്‍ ട്രസ്റ്റിന് ഇമെയില്‍ വഴിയാണ് സന്ദേശം എത്തിയത്. ബോംബ് സ്‌ഫോടനത്തിന് സാധ്യതയുണ്ടെന്നും പ്രദേശത്ത് സുരക്ഷ വര്‍ദ്ധിപ്പിക്കണം എന്നുമാണ് സന്ദേശം. തമിഴ്നാട്ടില്‍ നിന്നാണ് ഇ-മെയില്‍ വന്നതെന്നാണ് പൊലീസിന്റെ പ്രാഥമിക നിഗമനം. രാം മന്ദിറില്‍ നിലവില്‍ നിര്‍മ്മാണം പുരോഗമിക്കുന്ന സ്ഥലത്ത് ബോംബ് സ്‌ഫോടനത്തിന് സാധ്യതയുണ്ടെന്നാണ് ഇ മെയിലില്‍ പറഞ്ഞിരിക്കുന്നത്. രാമ ജന്മഭൂമി ട്രസ്റ്റിന് തിങ്കളാഴ്ച രാത്രിയാണ് സന്ദേശം ലഭിച്ചത്.

ക്ഷേത്രത്തിന്റെയും പരിസരത്തിന്റെയും സുരക്ഷയില്‍ ആശങ്ക ഉന്നയിച്ച്, സുരക്ഷ വര്‍ദ്ധിപ്പിക്കാന്‍ ഇമെയിലിലൂടെ അജ്ഞാതന്‍ അധികൃതരോട് ആവശ്യപ്പെട്ടു. രാമജന്മഭൂമി ട്രസ്റ്റിന് പുറമേ ബരാബങ്കി, ചന്ദൗലി ജില്ലാ കലക്ടര്‍മാര്‍ക്കും ഇ മെയില്‍ ലഭിച്ചു. തുടര്‍ന്ന് പ്രദേശത്തെ സൈബര്‍ പൊലീസ് കേസെടുത്ത് അന്വേഷണം തുടങ്ങി. തമിഴ്നാട്ടില്‍ നിന്നാണ് ഇമെയില്‍ വന്നതെന്നാണ് പൊലീസ് പ്രാഥമികമായി നല്‍കുന്ന വിവരം. ആരാണ് ഇ മെയില്‍ അയച്ചതെന്ന് കണ്ടെത്താന്‍ അന്വേഷണം തുടരുകയാണ്.