കൂട്ടപ്പിരിച്ചുവിടലില് ഗൂഗിള് ചീഫ് എക്സിക്യൂട്ടീവ് ഓഫീസര് സുന്ദര് പിച്ചൈയ്ക്കെതിരേ പ്രതിഷേധം രേഖപ്പെടുത്തി ജീവനക്കാര് രംഗത്ത്.
തൊഴിലാളികളെ പിരിച്ചുവിടുന്നതില് സുന്ദര് പിച്ചൈ കുറച്ചുകൂടി മാന്യമായ സമീപനം കൈക്കൊള്ളണം എന്നാണ് ജീവനക്കാരുടെ ആവശ്യം. ഇക്കാര്യം ആവശ്യപ്പെട്ട് ഗൂഗിള് പാരന്റ് ആല്ഫബെറ്റ് ഇന്കോര്പ്പറേറ്റിലെ ഏകദേശം 1,400 ജീവനക്കാര് ഒരു നിവേദനത്തില് ഒപ്പുവച്ചു.
12,000 ജോലികള് വെട്ടിക്കുറയ്ക്കുന്നതായി കമ്ബനി പ്രഖ്യാപിച്ചതിന് പിന്നാലെയാണ് ചീഫ് എക്സിക്യൂട്ടീവ് ഓഫീസര് സുന്ദര് പിച്ചൈയെ അഭിസംബോധന ചെയ്യുന്ന തുറന്ന കത്തുമായി തൊഴിലാളികള് രംഗത്തെത്തിയിരിക്കുന്നത്. സജീവമായ സംഘട്ടനങ്ങളോ മാനുഷിക പ്രതിസന്ധികളോ ഉള്ള രാജ്യങ്ങളില് നിന്നുള്ള ജീവനക്കാരെ പിരിച്ചുവിടുന്നത് ഒഴിവാക്കണമെന്ന് തൊഴിലാളികള് ആല്ഫബെറ്റിനോട് ആവശ്യപ്പെട്ടു.
പുതിയ നിയമനങ്ങള് മരവിപ്പിക്കുക, നിര്ബന്ധിത ജോലികള്ക്ക് മുമ്ബ് സ്വമേധയാ പിരിച്ചുവിടല് ആവശ്യപ്പെടുക, ജോലി ഒഴിവുകള്ക്കായി പിരിച്ചുവിട്ട തൊഴിലാളികള്ക്ക് മുന്ഗണന നല്കുക, രക്ഷാകര്തൃ അവധി, വിയോഗ അവധിയും പോലെയുള്ള ഷെഡ്യൂള് ചെയ്ത അവധികള് പൂര്ത്തിയാക്കാന് തൊഴിലാളികളെ അനുവദിക്കുക തുടങ്ങി നിരവധി ആവശ്യങ്ങള് ജീവനക്കാര് കത്തില് ഉന്നയിച്ചു.
വരാനിരിക്കുന്ന സാമ്ബത്തിക പ്രതിസന്ധി മറികടക്കുന്നതിന്റെ ഭാഗമായി വന് തോതിലുള്ള കൂട്ടപ്പിരിച്ചുവിടലാണ് ആല്ഫബൈറ്റ് നടപ്പാക്കാനൊരുങ്ങുന്നത്. പ്രസവ അവധിയെടുത്തവര്ക്ക് ഉള്പ്പെടെ പിരിച്ചുവിടല് നോട്ടീസ് ലഭിച്ചതായി പരാതികള് ഉയര്ന്നിരുന്നു. ഇതിനു പിന്നാലെയാണ് കൂട്ടപ്പിരിച്ചുവിടലില് പ്രതിഷേധം രേഖപ്പെടുത്തി ജീവനക്കാര് കൂട്ടത്തോടെ രംഗത്തെത്തുകയും സിഇഒയ്ക്ക് തുറന്ന കത്തെഴുതുകയും ചെയ്തിരിക്കുന്നത്.
"ആല്ഫബെറ്റിന്റെ തൊഴിലാളികളെ കുറയ്ക്കാനുള്ള തീരുമാനത്തിന്റെ ആഘാതം ആഗോളമാണ്," കത്തില് പറഞ്ഞു. "തൊഴിലാളികളുടെ ശബ്ദം ഒരിടത്തും വേണ്ടത്ര പരിഗണിച്ചിട്ടില്ല,"എന്നും കത്തില് പറയുന്നുണ്ട്. പാന്ഡെമിക് മാന്ദ്യത്തെത്തുടര്ന്നുള്ള ചെലവ് കുറയ്ക്കാനുള്ള നിക്ഷേപകരുടെ സമ്മര്ദ്ദത്തെത്തുടര്ന്ന് 6% തൊഴിലാളികളെ വെട്ടിക്കുറയ്ക്കുമെന്ന് ജനുവരിയില് ആല്ഫബെറ്റ് പ്രഖ്യാപിച്ചിരുന്നു.
എന്നാല് തൊഴില് നിയമങ്ങള് ശക്തമായ യൂറോപ്യന് രാജ്യങ്ങളില് പിരിച്ചുവിടലിന് ഗൂഗിള് അത്ര ബലം നല്കിയിട്ടില്ലന്നും ചൂണ്ടിക്കാണിക്കപ്പെടുന്നു.