കൊച്ചി: ലഹരി മാഫിയകളെ സംരക്ഷിക്കുന്നത് ഭരണ രാഷ്ട്രീയ നേതൃത്വങ്ങളാണെന്നും നിയമ സംവിധാനങ്ങളുടെ നിഷ്‌ക്രിയത്വവും രാജ്യദ്രോഹശക്തികളുടെ സ്വാധീനവുമാണ് സംസ്ഥാനത്ത് ലഹരി ഒഴുകി നാശം വിതയ്ക്കുന്നതിന് മുഖ്യകാരണവുമെന്നും കാത്തലിക് ബിഷപ്‌സ് കോണ്‍ഫറന്‍സ് ഓഫ് ഇന്ത്യ ലെയ്റ്റി കൗണ്‍സില്‍ സെക്രട്ടറി ഷെവലിയര്‍ അഡ്വ.വി.സി.സെബാസ്റ്റ്യന്‍.

സംസ്ഥാനത്തുടനീളം മദ്യമൊഴുക്കി സര്‍ക്കാരുതന്നെ മദ്യവിതരണത്തിന് കുടപിടിക്കുന്നത് എതിര്‍ക്കപ്പെടണം. കേരളത്തിലെ ഗ്രാമപ്രദേശ സ്‌കൂളുകളില്‍ നിന്നുപോലും രാസലഹരിയുമായി കുട്ടികളെ പിടികൂടുമ്പോള്‍ ഇതിന്റെ വിതരണ കണ്ണികള്‍ കണ്ടെത്തുവാന്‍ ആഭ്യന്തര നിയമ ഭരണ സംവിധാനങ്ങള്‍ പരാജയപ്പെട്ടിരിക്കുന്നു. കേരളത്തില്‍ അരാജകത്വവും അരക്ഷിതാവസ്ഥയും സൃഷ്ടിക്കാനുള്ള രാജ്യാന്തര ഭീകരപ്രസ്ഥാനങ്ങളുടെ അജണ്ടകളാണ് യുവജനങ്ങളെ കേന്ദ്രീകരിച്ച് ഇപ്പോള്‍ അരങ്ങേറുന്നത്. കലാലയങ്ങളില്‍ രാഷ്ട്രീയ നേതൃത്വങ്ങളുടെ പിന്തുണയോടെ വിദ്യാര്‍ത്ഥി സംഘടനാ നേതാക്കള്‍ ലഹരിവിതരണത്തിന്റെ മൊത്തക്കച്ചവടക്കാരായി മാറിയിരിക്കുന്നത് ഞെട്ടലുളവാക്കുന്നു. അതിഥിത്തൊഴിലാളികളുടെ മറവില്‍ കേരളത്തിലേയ്ക്ക് എത്തിച്ചേരുന്ന ലഹരി ഉല്പന്നങ്ങളെക്കുറിച്ചും വിതരണത്തെക്കുറിച്ചും കേന്ദ്ര ആഭ്യന്തര സുരക്ഷാ ഏജന്‍സികളുടെ ഇടപെടലും അന്വേഷണവും അടിയന്തരമാണ്.  

അഫ്ഗാനിസ്ഥാനില്‍ ഉല്പാദിപ്പിക്കുന്ന രാസലഹരി എങ്ങനെ കേരളത്തില്‍ വിതരണ ശൃംഖല സൃഷ്ടിക്കുന്നുവെന്നും കണ്ടെത്തി നടപടികളുണ്ടാകണം. വിദ്യാഭ്യാസ സ്ഥാപനങ്ങള്‍ കേന്ദ്രീകരിച്ചുള്ള ലഹരിവിതരണ ശൃംഖലകള്‍ അറത്തുമാറ്റുവാന്‍ പൊതുസമൂഹം സംഘടിക്കുന്നില്ലെങ്കില്‍ വലിയ ദുരന്തത്തിന് കേരളം സാക്ഷ്യം വഹിക്കേണ്ടിവരും. കലാലയ രാഷ്ട്രീയത്തിന്റെ കാപഠ്യവും അഹന്തയും തീവ്രവാദബന്ധങ്ങളും തട്ടിപ്പും ഭീകരപ്രസ്ഥാനങ്ങളുടെ താവളമായി കേരളത്തെ തകര്‍ക്കുമെന്നും തിരിച്ചറിയണം. കുടുംബങ്ങള്‍ ശിഥിലമാക്കി നാശത്തിന്റെ വിത്തുവിതയ്ക്കുന്ന ഭീകരവാദ അജണ്ടകള്‍ കേരളമണ്ണില്‍ യാതൊരുകാരണവശാലും അനുവദിച്ചുകൊടുക്കരുതെന്നും വിദ്യാഭ്യാസ സ്ഥാപനങ്ങളും ഹോസ്റ്റലുകളും പരിസരങ്ങളും കേന്ദ്രീകരിച്ച് അന്വേഷണങ്ങളും നടപടികളും ത്വരിതപ്പെടുത്തണമെന്നും നിയമങ്ങള്‍ കര്‍ക്കശമാക്കി നടപ്പിലാക്കണമെന്നും അടിയന്തരസാഹചര്യത്തില്‍ കേന്ദ്ര അന്വേഷണ ഏജന്‍സികളുടെ ഇടപെടലുകളുണ്ടാകണമെന്നും വി.സി.സെബാസ്റ്റ്യന്‍ അഭ്യര്‍ത്ഥിച്ചു.