മുംബൈ: മുഗൾ ചക്രവർത്തിയായ ഔറംഗസേബിന്റെ സാംഭാജിനഗറിലെ  ശവകുടീരം പൊളിച്ചുമാറ്റണമെന്നാവശ്യപ്പെട്ട്  ബജ്റംഗ്ദൾ പ്രവർത്തകർ. ഔറംഗസേബിന്റെ ശവകുടീരം നീക്കം ചെയ്യണമെന്ന് ആവശ്യപ്പെട്ട ബജ്റംഗ്ദൾ നേതാവ് നിതിൻ മഹാജൻ, സർക്കാർ അങ്ങനെ ചെയ്യുന്നതിൽ പരാജയപ്പെട്ടാൽ ബാബറി മസ്ജിദിന്റെ അതേ വിധി ഈ ശവകുടീരത്തിനും നേരിടേണ്ടിവരുമെന്ന് പറഞ്ഞു.

‘’സാംഭാജിനഗറിൽ ഔറംഗസേബിന്റെ ശവകുടീരം  ആരാധിക്കപ്പെടുന്നു. സാംഭാജിയുടെ കൊലപാതകിയുടെ ശവകുടീരം നിർമ്മിക്കുന്നു... അത്തരം ശവകുടീരങ്ങളെ ആരാധിക്കുമ്പോൾ സമൂഹവും ആ രീതിയിൽ വികസിക്കുന്നു. അക്കാലത്ത് ഞങ്ങൾ നിസ്സഹായരായിരുന്നു... എന്നാൽ ഇപ്പോൾ അത് നീക്കം ചെയ്യണമെന്ന് വിശ്വഹിന്ദു പരിഷത്തും ബജ്റംഗ് ദളും ആവശ്യപ്പെടുന്നു. ശവകുടീരം  നീക്കം ചെയ്യണമെന്ന് മാർച്ച് 17ന്  ഞങ്ങൾ സർക്കാരിനോട് ആവശ്യപ്പെടും. അവർ അത് നീക്കം ചെയ്താൽ ഞങ്ങൾ സർക്കാരിനെ അഭിവാദ്യം ചെയ്യും, പക്ഷേ അത് സംഭവിച്ചില്ലെങ്കിൽ, വിഎച്ച്പിയും ബജ്റംഗ് ദളും തെരുവിലിറങ്ങി വലിയ പ്രക്ഷോഭം ആരംഭിക്കും, ''നിതിൻ മഹാജൻ ശനിയാഴ്ച എഎൻഐയോട് പറഞ്ഞു.

"ഹിന്ദു സമൂഹം അതിന്റെ നിലനിൽപ്പിനെക്കുറിച്ച് പ്രക്ഷോഭം നടത്തുമ്പോൾ എന്താണ് സംഭവിക്കുകയെന്ന് നമുക്കറിയാം, ബാബറി മസ്ജിദ്  നീക്കം ചെയ്യാൻ അയോധ്യയിൽ എന്താണ് സംഭവിച്ചതെന്ന് നാമെല്ലാവരും കണ്ടു. സർക്കാർ ശവകുടീരം നീക്കം ചെയ്തില്ലെങ്കിൽ ഞങ്ങൾ സ്വയം കർസേവ നടത്തു''മെന്നും നിതിൻ മഹാജൻ കൂട്ടിച്ചേർത്തു.

മുഗൾ ചക്രവർത്തിയായ ഔറംഗസേബിന്റെ ശവകുടീരത്തിന്റെ അറ്റകുറ്റപ്പണികൾക്കായി ആർക്കിയോളജിക്കൽ സർവേ ഓഫ് ഇന്ത്യ (എഎസ്ഐ) അനുവദിച്ചതും ചെലവഴിച്ചതുമായ ഫണ്ടുകളെക്കുറിച്ച് വിശദ  വിവരങ്ങൾ ആവശ്യപ്പെട്ട് ബിജെപി നേതാവും ഗോഷാമഹൽ എംഎൽഎയുമായ ടി രാജ സിംഗ് കേന്ദ്രമന്ത്രി ഗജേന്ദ്ര സിംഗ് ഷെഖാവത്തിന് കത്തെഴുതിയിരുന്നു.

നമ്മുടെ ക്ഷേത്രങ്ങൾ നശിപ്പിക്കുന്നതിനും ഹിന്ദു രാജാക്കന്മാരെ കൊല്ലുന്നതിനും സംസ്കാരത്തെ അടിച്ചമർത്തുന്നതിനും ഉത്തരവാദിയായ ഭരണാധികാരിയായ ഔറംഗസേബിന്റെ ശവകുടീരത്തിനായി സർക്കാർ പണം ചെലവഴിക്കുന്നത് തുടരുന്നതിന്  ന്യായീകരണം തേടിയ ബിജെപി എംഎൽഎ ഔറംഗസേബിന്റെ ശവകുടീരത്തിനായുള്ള കൂടുതൽ ചെലവുകൾ  നിർത്തിവയ്ക്കുന്നത്  ഉടൻ പരിഗണിക്കണമെന്ന്  കേന്ദ്ര സർക്കാരിനോട് അഭ്യർത്ഥിച്ചു.

ഇതേസമയം  മുൻ കോൺഗ്രസ് സർക്കാർ ശവകുടീരം ആർക്കിയോളജിക്കൽ സൊസൈറ്റി ഓഫ് ഇന്ത്യക്ക് കൈമാറി സംരക്ഷിച്ചതിനാൽ നിയമപരമായി മാത്രമേ ശവകുടീരം നീക്കം ചെയ്യാനാകൂവെന്ന്  മഹാരാഷ്ട്ര മുഖ്യമന്ത്രി ദേവേന്ദ്ര ഫഡ്‌നാവിസ് പറഞ്ഞു. നമുക്കാർക്കും ഇക്കാര്യത്തിൽ എതിരഭിപ്രായമില്ല. പക്ഷേ നിയമത്തിന്റെ ചട്ടക്കൂടിനുള്ളിൽ നിന്നുവേണം അതുചെയ്യാൻ. കാരണം ശവകുടീരം സംരക്ഷിത സ്ഥലമാണ്. കുറച്ച് വർഷങ്ങൾക്ക് മുമ്പ് കോൺഗ്രസ് ഭരണകാലത്ത് ഈ സ്ഥലം എ.എസ്.ഐയുടെ സംരക്ഷണയിൽ വിട്ടുനൽകിയെന്നും മുഖ്യമന്ത്രി പറഞ്ഞു